সমাগত ২০২১ৰ বিধানসভাৰ নিৰ্বাচন, সেয়েহে উঠিছে আঁচনি ঘোষণাৰ ঢৌ। অহা ১৫ ছেপ্তেম্বৰলৈকে সপ্তাহত একোখনকৈ আঁচনি লোৱাৰ কথা সংবাদমেলত ঘোষণা কৰে মন্ত্ৰী হিমন্ত বিশ্ব শর্মাই।
সংবাদমেলত তেওঁ কয় ‘১৫ চেপ্তেম্বৰলৈকে প্ৰতি সপ্তাহতে একোটাকৈ আঁচনি লোৱা হ’ব।‘
এই আঁচনিসমূহৰ ভিতৰত আজি ঘোষণা কৰা অৰুণোদয় আঁচনিয়েই সৰ্ববৃহৎ আৰু অনন্য বুলি সংবাদমেলত হিমন্তই দাবী কৰে।
মন্ত্ৰীগৰাকীয়ে সংবাদমেলত জনোৱা অনুসৰি ‘অৰুণোদয় আঁচনিৰ জৰিয়তে নিম্ন মধ্যবিত্ত আৰু দৰিদ্ৰ সীমাৰেখাৰ তলৰ লোকসকলে আঁচনিৰ ধন ক’ত খৰচ কৰিব সেই সিদ্ধান্ত পৰিয়ালটোৱে নিজে ল’ব।‘
ইপিনে, অৰুণোদয়ৰ জৰিয়তে এটা ফ্ৰেমৱৰ্কৰ সৃষ্টি কৰা হ’ব বুলি উল্লেখ কৰি হিমন্তই কয়, ‘পৰিয়ালসমূহলৈ ফিক্সড ধন প্ৰতি মাহে দি থকা হ’ব।‘
মন্ত্ৰীগৰাকীয়ে জনোৱা অনুসৰি অহা ২ অক্টোবৰৰ পৰা অসমৰ ১৭ লাখ পৰিয়ালক মাহত ৮৩০ টকাকৈ দি যোৱা হ’ব। এইটো এককালীন নহয়। পৰিয়ালটো অৰ্থনৈতিকভাৱে সবল নোহোৱালৈকে লাভ কৰি যাব।‘
চৰকাৰী কাৰ্যালয়ত কাম কৰাসকলক মেডিকেল এলাৱেঞ্চ দিয়াৰ দৰে অৰুণোদয় আঁচনিৰ অন্তৰ্ভুক্ত হোৱাসকলে ঔষধ ক্ৰয়ৰ বাবে প্ৰত্যেক মাহত ৩০০ টকাকৈ দিয়া হ’ব বুলি মন্ত্ৰীগৰাকীয়ে সংবাদমেলত ঘোষণা কৰে।
‘চাৰি কিল’গ্ৰাম চেনী ক্ৰয়ৰ বাবে প্ৰতি পৰিয়ালক ৮০ টকাকৈ দিয়া হ’ব। ৫০ শতাংশ ৰেহাই দিয়া হ’ব। ঠিক সেইদৰে চাৰি কি:গ্ৰা দাইল ক্ৰয় কৰিবলৈ ৫০ শতাংশ ৰেহাই অৰ্থাৎ ২০০ টকাকৈ দিব লাগিব।‘ সংবাদমেলত হিমন্তই জনায়।
ইপিনে, ২ লাখতকৈ কম ভোট থকা সমষ্টিত ১৫ হাজাৰ পৰিয়ালক এই অৰুণোদয় আঁচনিৰ অধীনত ধন দিয়া হ’ব বুলি তেওঁ জনোৱাৰ উপৰিও এক তৃতীয়াংশ লোকক স্পৰ্শ কৰা হ’ব বুলি তেওঁ কয়।
ইয়াৰোপৰি, ২ লাখতকৈ অধিক ভোট থকা সমষ্টিত ১৭ হাজাৰ পৰিয়ালক সাহায্য দিয়া হ’ব বুলি তেওঁ জনায়।
এই অৰুণোদয় আঁচনিৰ বাবদ প্ৰতি মাহত ২ কোটি ১০ লাখ টকাকৈ ৰাজ্য চৰকাৰৰ খৰচ হোৱাৰ উপৰিও ২৮০০ কোটি টকা অৰুণোদয় আঁচনিৰ নামত ধন ধাৰ্য কৰা হৈছে বুলি মন্ত্ৰীগৰাকীয়ে জনায়।
ইপিনে, ১৭ আগষ্টৰ পৰা এই অৰুণোদয় আঁচনিৰ কাম-কাজসমূহ আৰম্ভ হ’ব বুলি উল্লেখ কৰি মন্ত্ৰীগৰাকীয়ে কয় ‘আঁচনি কাৰ্যকৰী কৰিব পৰাকৈ জিলা পৰ্যায়ত একোখনকৈ কমিটি গঠন কৰা হ’ব। পৰিয়ালৰ এগৰাকী মহিলাৰ একাউন্টতহে এই ধন জমা হ’ব। পুৰুষৰ নামত নহ’ব।‘
এই আঁচনিৰ হিতাধিকাৰীৰ তালিকা প্ৰস্তুত বা সাহায্য প্ৰদান ইত্যাদি কামত প্ৰতি সমষ্টিত তিনি মাহৰ বাবে দুজনকৈ সহায়ক নিযুক্তি দিয়া হ’ব বুলি তেওঁ উল্লেখ কৰে।
হিমন্তই আৰু কয় ‘চৰকাৰৰ আৰ্থিক অৱস্থা ভাল হ’লে এই পৰিয়ালসকলৰ ধনৰ পৰিমাণ পৰ্যায়ক্ৰমে বৃদ্ধি কৰিব। আংশিকভাৱে হ’লেও জোৰা-টাপলি মৰাত কোভিডে কোঙা কৰা দৰিদ্ৰ লোকসকলক সহায় কৰিব।‘
