দেওবাৰে শিৱসাগৰত অনুষ্ঠিত হৈ থকা অসম ৰাজ্যিক জনতা যুৱ মৰ্চাৰ ৰাজ্যিক কাৰ্যনিৰ্বাহক সভাত উদাত্ত ভাষণ প্ৰদান কৰে প্ৰতাপী মন্ত্ৰী হিমন্ত বিশ্ব শৰ্মাই।
মন্ত্ৰীগৰাকীয়ে ভাষণত কংগ্ৰেছ দল আৰু বদৰুদ্দিন আজমলক তীব্ৰ সমালোচনা কৰে।
আনহাতে, ২০১৬ৰ নিৰ্বাচনত মন্ত্ৰী হিমন্ত বিশ্ব শৰ্মাৰ মুখত সততে শুনা গৈছিল এই নিৰ্বাচন শৰাইঘাটৰ শেষ যুঁজ বুলি। কিন্তু এইবাৰ মন্ত্ৰীজনৰ মুখত শুনা গৈছে সভ্যতাৰ যুঁজৰ কথা।
তেওঁ কয়, ”এইবাৰ দুটা সভ্যতাৰ যুঁজ হব। এটা সভ্যতাই কব আমি শংকৰদেৱক চিনি নাপাও, আমাক শংকৰদেৱৰ জন্মস্থানৰ মাটিখিনি লাগে। ভাগৱত কি আমি বুজি নাপাও। এই সভ্যতাই কব ফেচবুকত হিন্দু ল’ৰাৰ নাম লৈ আমাৰ ছোৱালী বিলাকক মাটি নি অপমান কৰিব লাগে, লাভ জেহাদৰ দৰে কু-কৰ্ম কৰিব লাগে আৰু অৰ্নমাই বড়াৰ দৰে শিক্ষয়ত্ৰীক ৰাজপথত সতীত্ব হৰণ হব লাগে”।
”ইয়াৰ বিপৰীতে আন এক সভ্যতা থাকিব যিটো সভ্যতাই শংকৰদেৱৰ জন্মস্থানৰ মাটিৰ কাষত তোমালোকক থিয় হবলৈ দিয়া নহব, বেদখল দূৰৰ কথা। ফেচবুকত প্ৰলোভন দি আমাৰ ছোৱালীৰ পবিত্ৰতা নষ্ট কৰাৰ অধিকাৰ আমি দিব নোৱাৰো আৰু অৰ্নমাই বড়াৰ দৰে মহিলাৰ গাত হাত দিলে তাৰ শাস্তি ফাঁচী কাঠৰ ৰচীত হব”বুলি কয়।
তেওঁ লগতে কয়, বিজেপিৰ প্ৰতিজন সদস্যই সংকল্প লব লাগে যে দেহত শেষ বিন্দু তেজ থকালৈকে বদৰুদ্দিন আজমল যাতে দিচপুৰত বহিব নোৱাৰে।
আনহাতে, নৱগঠিত ৰাইজৰ দল সন্দৰ্ভত মন্ত্ৰী গৰাকীয়ে কয়,”তেওঁলোকে উজনি অসম খন নিজৰ জমিনদাৰী বুলি ভাৱে। কিন্তু উজনিৰ ৰাইজে প্ৰতিটো নিৰ্বাচনত বিজেপিক জিকাইছে। তেওঁ লগতে কয় আমাৰ লক্ষ্য ১০০ আৰু আমি ১০০ সম্পূৰ্ণ কৰিম”।
শিক্ষকৰ নিয়মীয়াকৰণৰ সন্দৰ্ভত মন্ত্ৰীগৰাকীয়ে কয়, শিৱসাগৰত ১৫৩০ গৰাকী শিক্ষকৰ এটা সমস্যা আছে, সেই সমস্যা অহা নৱেম্বৰ মাহত পূৰ্ণ বা আংশিকভাৱে সমাধান কৰা হব বুলি ঘোষণা কৰে মন্ত্ৰী হিমন্ত বিশ্ব শৰ্মাই।