সমগ্ৰ দেশতে কোভিদ-১৯ ৰ আতংক চলি থকাৰ সময়তে সোমবাৰে বাক্সা জিলাৰ সদৰ মুছলপুৰত উপস্থিত হৈ কোৱাৰেণ্টাইন শিবিৰ পৰিদৰ্শন কৰে জনস্বাস্থ্য আৰু কাৰিকৰী মন্ত্ৰী ৰিহন দৈমাৰীয়ে।
কোৱাৰেণ্টাইন শিবিৰ পৰিদৰ্শনৰ পিছত মন্ত্ৰী দৈমাৰীয়ে বাক্সা জিলাৰ উপায়ুক্ত কাৰ্যালয়ৰ সভাগৃহত জিলাখনৰ বিভিন্ন বিভাগৰ বিষয়াৰ সৈতে এক আলোচনাত মিলিত হয়।
বৈঠকত মন্ত্ৰী গৰাকীয়ে বাক্সা জিলাৰ তিনিটা মহকুমাত মুঠ ১৫০ খন বিচনাৰ ব্যৱস্থাৰে কোৱাৰেণ্টাইন শিবিৰ সাজু থকাৰ কথা উল্লেখ কৰে৷ লগতে বাক্সা জিলাৰ ২৪৮২ জনক হোম কোৱাৰেণ্টাইন আৰু ১৫ জনক মেডিকেল কোৱাৰেণ্টাইন কৰাৰ তথ্য জনায়।
ইফালে লকডাউনৰ সময়ত খাদ্যৰ নাটনি যাতে হ’ব নোৱাৰে তাৰ বাবে চৰকাৰে ব্যৱস্থা গ্ৰহণ কৰি ৰেচন কাৰ্ড থকা লোক সকলক বিনামূলীয়া চাউল বিতৰন আৰু যিসকল লোক দৰিদ্ৰ সীমাৰেখাৰ তলত আছে অথচ চৰকাৰী কাৰ্ড নাই সেই সকল লোকক ১০০০ টকাকৈ দিয়াৰ ব্যৱস্থা কৰাৰ কথা সদৰী কৰে মন্ত্ৰী গৰাকীয়ে।
বাক্সা জিলাৰ উত্তৰাঞ্চলত দেখা দিয়া বিশুদ্ধ খোৱা পানীৰ কিছু সমস্যা থকাৰ কথা উল্লেখ কৰি মন্ত্ৰী গৰাকীয়ে খোৱাপানীৰ সমস্যাটো পৰ্য্যায় ক্ৰমে সমাধান হ’ব বুলিও মন্তব্য কৰে।
আনহাতে স্বাস্থ্য কৰ্মীৰ বাবে চৰকাৰে ৫০,০০০ টকাৰ বীমা পলিচি ঘোষণা কৰাৰ পাছত দুৰ্যোগৰ সময়ত কৰ্তব্যত নিয়োজিত সংবাদ কৰ্মী সকলকো চৰকাৰী বীমা পলিচিৰ আওতালৈ অনাৰ বাবে চৰকাৰৰ লগত আলোচনা কৰিব বুলি জনায় মন্ত্ৰী গৰাকীয়ে।
বাক্সা জিলা উপায়ুক্ত ৰঞ্জন শৰ্মাই আঁত ধৰা অনুষ্ঠানত কেইবাগৰাকী অতিৰিক্ত উপায়ুক্তকে ধৰি বাক্সা জিলাৰ বিভিন্ন বিভাগৰ মুৰব্বী বিষয়া সকল উপস্থিত থাকে।
