দুৰ্গোৎসৱ উপলক্ষে বিদ্যালয় বন্ধ থকাৰ সময়ত তিনিচুকীয়া জিলাৰ মাৰ্ঘেৰিটা মহকুমাৰ অন্তৰ্গত লিডুৰ লিডু শংকৰদেৱ বিদ্যাপীঠ মধ্য ইংৰাজী বিদ্যালয়ত অচিনাক্ত দুৰ্বৃত্ত দলে প্ৰৱেশ কৰি তাণ্ডৱ চলোৱা ঘটনা আজি পুৱা পোহৰলৈ আহে৷ বিদ্যালয় খনৰ দুটা কাৰ্যালয় কোঠাৰ সা-সামগ্ৰী লণ্ড ভণ্ড কৰে দুস্কৃতিকাৰীয়ে৷
দুস্কৃতিকাৰীৰ তাণ্ডৱত আগন্তুক গুণোৎসৱৰ বাবে প্ৰস্তুতি চলোৱা বিদ্যালয়খনৰ কেইবাটাও গুৰুত্বপূৰ্ণ নথিপত্ৰ আৰু আচবাব নষ্ট কৰি যায়৷
উল্লেখ্য যে দুৰ্গোৎসৱৰ বাবে বিদ্যালয় বন্ধ আছিল৷ আজি বিদ্যালয় খোলাত ছাত্ৰ-ছাত্ৰী, শিক্ষয়িত্ৰী বিদ্যালয়ত উপস্থিত হোৱাত বিদ্যালখনত লণ্ড ভণ্ড হৈ থকা গম পাই হতভম্ব হৈ পৰে৷
দশমীৰ নিশা বিদ্যালয়ৰ টিনপাট, চিলিং ভাঙি প্ৰৱেশ কৰি বিদ্যালয়খনৰ দুটা কাৰ্যালয় কোঠাৰ সা-সামগ্ৰী লণ্ড ভণ্ড কৰে দুৰ্বৃত্তৰ দলটোৱে৷
জানিব পৰা মতে আগন্তুক ১ নৱেম্বৰ তাৰিখৰ পৰা বিদ্যালয়খনত গুণোৎসৱ আছে৷ বিদ্যালয়খনৰ গুণোৎসৱৰ প্ৰস্তুতি বিনষ্ট কৰাত চিন্তিত হৈ পৰিছে শিক্ষক শিক্ষয়িত্ৰীসকল৷
ইতিমধ্যে লিডু আৰক্ষী ঘটনাস্থলীত উপস্থিত হৈ ঘটনাৰ তদন্ত আৰম্ভ কৰিছে৷ পবিত্ৰ শিক্ষানুষ্ঠানত দুস্কৃতিকাৰী দলৰ ক্ষতি সাধন ঘটনাই ক্ষুদ্ধ কৰি তুলিছে স্থানীয় সচেতন লোকসকলৰ লগতে, বিদ্যালয়খনৰ ছাত্ৰ-ছাত্ৰী আৰু শিক্ষক কৰ্মচাৰীসকলক।
