শনিবাৰে নিশা শিৱসাগৰ নগৰৰ মাজমজিয়াস্থিত দুটা মছজিদত চুৰি হোৱা ঘটনাই চাঞ্চল্যৰ সৃষ্টি কৰিছে। শিৱসাগৰৰ এল কে বি ৰোডত থকা ন মছজিদ আৰু বাবুপট্টি মছজিদত সংঘটিত হৈছে এই চুৰি কাৰ্য।
চোৰে দুয়োটা মছজিদৰ দান পাত্ৰৰ তলা ভাঙি সকলো ধন লৈ যোৱাৰ লগতে আন বহু সামগ্ৰী চুৰি কৰি নিয়ে।
পুৱা স্থানীয় ৰাইজে মছজিদত চুৰি হোৱা ঘটনাৰ বিষয়ে জানিব পৰি শিৱসাগৰ আৰক্ষীক খবৰ দিয়ে আৰু আৰক্ষীয়ে ঘটনাস্থলীলৈ আহি অনুসন্ধান অব্যাহত ৰাখিছে।
উল্লেখ্য যে দুয়োটা মছজিদ শিৱসাগৰ সদৰ থানাৰ সমীপতে অৱস্থিত। থানাৰ সমীপতে থকা দুয়োটা মছজিত সংঘটিত হোৱা চুৰি ঘটনাক লৈ ৰাইজৰ মাজত ব্যাপক প্ৰতিক্ৰিয়াৰ সৃষ্টি হৈছে।
উল্লেখ্য যে কিছুদিন পূৰ্বে দিনদুপৰতে নগৰৰ মাজমজিয়াৰ পৰা এগৰাকী মহিলাৰ হাতৰ পৰা পঞ্চাশ হাজাৰ টকা থপিয়াই নিছিল।
আৰক্ষীৰ নিচিদ্ৰ নিৰাপত্তা থকাৰ পাছতো এইদৰে নগৰখনত এটাৰ পাছত এটাকৈ চুৰি কাৰ্য সংঘটিত হোৱা ঘটনাই শংকিত কৰি তুলিছে শিৱসাগৰবাসীক।