‘আধুনিক পৃথিৱীত মোবাইলৰ অত্যধিক ব্যৱহাৰে মানৱ জীৱনত যিবিলাক অনিষ্ট সাধন কৰিছে তাৰ মাজত শ্ৰৱণ শক্তি হ্ৰাস হ’ল অন্যতম। বিশেষকৈ মোবাইল হেডফোনৰ জৰিয়তে উচ্চস্বৰত শুনাৰ ফলত বৰ্তমান সময়ত ১২ৰ পৰা ৩৫ বছৰৰ লোকৰ মাজত শ্ৰৱণ শক্তি হ্ৰাস পোৱাটো অন্যতম কাৰণ হিচাপে পৰিগণিত হৈছে।’ এই মন্তব্য কৰিছে গোলাঘাট বিশিষ্ট চিকিৎসক পার্থ গোহাঁইয়ে।
৩ মাৰ্চত গোলাঘাট কুশল কোঁৱৰ অসামৰিক চিকিৎসালয়ত আয়োজন কৰা বিশ্ব শ্ৰৱণ দিৱস উপলক্ষে অনুষ্ঠিত সভাত সমল ব্যক্তি হিচাপে বক্তব্য ৰাখি চিকিৎসকগৰাকীয়ে এই কথা উল্লেখ কৰে। বিশিষ্ট চিকিৎসক গৰাকীয়ে সকলোকে এনে বদ অভ্যাস পৰিত্যাগৰ আহ্বান জনায়।
উল্লেখযোগ্য যে ৰাষ্ট্ৰীয় বধিৰতা প্ৰতিৰোধ আৰু নিয়ন্ত্ৰণ কাৰ্যসূচীৰ অধীনত যোৰহাটৰ স্বেচ্ছাসেৱী সংস্থা প্ৰেৰণাৰ উদ্যোগত আৰু অ’ এন জি চি ৰ সহযোগত উক্ত কাৰ্যসূচী ৰূপায়ণ কৰা হয়। ইয়াৰ অংশ হিচাপে পুৱা এক সজাগতা সমদল উলিওৱা হয়। ইয়াৰ পিছতে ‘চেভ ইয়াৰ হিয়েৰিং’ শ্ল’গানেৰে মূল সভা অনুষ্ঠিত কৰা হয়। উক্ত সভাতে আঠটি শিশুক শ্ৰৱণযন্ত্ৰ প্ৰদান কৰা হয় আৰু বহুসংখ্যক লোকৰ কাণৰ ৰোগ বিনামূলীয়াকৈ পৰীক্ষা কৰা হয়।