আয়কৰ বিভাগে ৫৮৮ কোটি টকা কৰ অনাদায় থকাৰ অভিযোগত দেশৰ এটা আগশাৰীৰ চিমেণ্ট কোম্পানীক জাননী প্ৰেৰণ কৰিছিল। প্ৰায় তিনিমাহৰ আইনী যুদ্ধৰ অন্তত সেই সংখ্যা ২২২ কোটি টকালৈ নামি আহিল।
চলিত বিত্তীয় বৰ্ষত এইটোৱেই একমাত্ৰ এনে উদাহৰণ নহয়। গ্ৰাহক সামগ্ৰী নিৰ্মাণ কোম্পানী এটাৰ কৰ বকেয়া ১১০ কোটিৰ পৰা প্ৰায় আধালৈ হ্ৰাস পাইছে। আকৌ এটা চিকিৎসালয় গোষ্ঠীৰ ক্ষেত্ৰত কৰ সংশোধনৰ পিছত প্ৰায় ৯০ কোটি টকাৰ কৰ বকেয়া শূন্যলৈ নামি আহিছে।
এনে শ শ উদাহৰণ আছে। লগতে দেখা গৈছে যে সংশ্লিষ্ট কোম্পানীৰ হাতত বকেয়া ধন আদায় কৰিব পৰাৰ পৰিমানৰ সম্পত্তিও নাই। আৰু এই সকলোবোৰৰ বাবে আয়কৰ বিভাগে কেৱল নিজৰ হিচাপৰ বহীৰ পৰা কোটি কোটি ‘বকেয়া কৰ’ মচি পেলাবলৈ বাধ্য হৈছে। মোডী চৰকাৰৰ ‘বন্ধু’ কৰ্প’ৰেটসমূহে দিবলগীয়া বকেয়া কৰ ‘ৰেহাই’ৰ পৰিমাণ চকু কপালত তুলিব পৰা – প্ৰায় ৩৫ লাখ কোটি টকা।
আজি (দেওবাৰে) সংসদত দাখিল কৰা হ’ব কেন্দ্ৰীয় বাজেট। কেন্দ্ৰীয় বিত্তমন্ত্ৰী নিৰ্মলা সীতাৰমণে পুনৰ আয়কৰ ৰেহাই দিব নেকি সেই কথা জানিবলৈ আগ্ৰহী সাধাৰণ মানুহ। তাৰ ঠিক আগতেই এই চাঞ্চল্যকৰ তথ্য পোহৰলৈ আহিছে।
খোদ চৰকাৰী পৰিসংখ্যা অনুসৰি চলিত বিত্তীয় বৰ্ষ ২০২৫-২৬ৰ আৰম্ভণিতে আয়কৰৰ বকেয়া আছিল প্ৰায় ৪৮ লাখ কোটি টকা। প্ৰায় সকলোবোৰ কৰ্পৰেট শিবিৰৰ পৰা আদায় কৰাৰ কথা আছিল। ইয়াৰ এক বৃহৎ অংশই কোষাগাৰলৈ আনিব নোৱাৰি বুলি ইতিমধ্যে কেন্দ্ৰই উপলব্ধি কৰিছে। সংসদীয় বিত্ত সমিতিৰ প্ৰতিবেদনত কোৱা হৈছে যে বিত্ত মন্ত্ৰালয়ে সেই বৃহৎ বকেয়া প্ৰায় ১৩.৫ লাখ কোটি টকালৈ হ্ৰাস কৰিবলৈ বাধ্য হৈছে। বাকীখিনি আৰু এতিয়া হিচাপত ৰখা হোৱা নাই।
কিন্তু এই পৰিস্থিতি কিয়? চলিত বিত্তীয় বৰ্ষৰ বাবে যোৱা বাজেটত প্ৰতিজন ব্যক্তিৰ বাবে বছৰি ১২ লাখ টকা পৰ্যন্ত আয়ৰ বাবে কৰ ৰেহাই দিয়া হৈছিল। ইয়াৰ বাবেই প্ৰায় ১ লাখ কোটি টকা কোষাগাৰত কম আহিব বুলি চৰকাৰে অনুমান কৰিছিল। সেয়ে, ‘উৎস’ বৃদ্ধি কৰিবলৈ কাৰ্যতঃ উদ্বাউল হৈ পৰিছে বিত্ত মন্ত্ৰালয়।
দেখা যায় যে কৰ্পৰেট কোম্পানীৰ পৰা অনাদায় আয়কৰ, সুত, জৰিমনা আদিৰ পৰিমাণ প্ৰায় ৪৮ লাখ ১৮ হাজাৰ কোটি টকা! সেয়া চৰকাৰৰ হাতলৈ আনিবলৈ আঞ্চলিক কাৰ্যালয়বোৰক দস্তুৰমতে লক্ষ্য বান্ধি দিয়া হৈছে। কিন্তু তেওঁলোকে ইচ্ছা কৰিলেই সেই ধন সংগ্ৰহ কৰিব পাৰিবনে?
আইনী মেৰপেচৰ বাবে বেছিভাগ কৰ জাননী গোচৰলৈ ৰূপান্তৰিত হৈছে। সংসদীয় সমিতিৰ প্ৰতিবেদনত দাবী কৰা হৈছে যে দীৰ্ঘদিনীয়া আইনী যুদ্ধৰ সময়ছোৱাত বহু কোম্পানীত তলা লাগিছে। ইয়াৰ উপৰিও বহু কোম্পানীৰ বহু সম্পত্তি ইতিমধ্যে ইডি-চিবিআইৰ দৰে এজেন্সীৰ দখলত আছে। সেইবোৰ পুনৰুদ্ধাৰ হোৱাৰ সম্ভাৱনা কম।
আকৌ বহু কোম্পানীয়ে কাগজত ‘ভুৱা’ সম্পত্তি দেখুৱাইছে বুলি অভিযোগ উত্থাপন হৈছে। আনকি বহু ক্ষেত্ৰত একেটা আয়কৰ ফাইল দুবাৰকৈ হিচাপত অন্তৰ্ভুক্ত কৰা হৈছে। সেয়ে, এতিয়া সকলো কৰ্তনৰ পিছত আয়কৰ বিভাগে ভাবে যে ১৩ লাখ ৪৮ হাজাৰ কোটি টকা হয়তো সংগৃহীত হ’ব পাৰে। বাকী ৩৪ লাখ ৭০ হাজাৰ কোটি টকা চৰকাৰৰ ওপৰত বোজাৰ বাহিৰে আন একো নহয়।
