ইজৰাইল-গাজা সংঘাত ৰোধৰ বাবে আমেৰিকাৰ ৰাষ্ট্ৰপতি ডোনাল্ড ট্ৰাম্পে প্ৰস্তাৱ কৰা বিস্তৃত শান্তি পৰিকল্পনাক প্ৰশংসা ভাৰতৰ প্ৰধানমন্ত্ৰী নৰেন্দ্ৰ মোদীৰ। মঙ্গলবাৰে এক্সত (পূৰ্বৰ টুইটাৰ) এক পোষ্ট প্ৰচাৰ কৰি তেওঁ কয় যে, ট্ৰাম্পৰ এই পৰিকল্পনাই পেলেষ্টাইন আৰু ইজৰাইলৰ জনসাধাৰণৰ বাবে “স্থায়ী শান্তিৰ” পথ প্ৰশস্ত কৰিছে। ইয়াৰ লগতে বৃহত্তৰ পশ্চিম এছিয়া অঞ্চলৰ বাবেও নিৰাপত্তা আৰু উন্নয়নৰ সুবিধা প্ৰদান কৰিব বুলি মত প্ৰকাশ কৰিছে।
প্ৰধানমন্ত্ৰী মোদীয়ে এক্সত লিখিছে, “গাজা সংঘাতৰ অন্ত পেলোৱাৰ বাবে ৰাষ্ট্ৰপতি ডোনাল্ড ট্ৰাম্পে কৰা বিস্তৃত পৰিকল্পনাৰ ঘোষণাক আমি আদৰণি জনাইছো। ই পেলেষ্টাইন আৰু ইজৰাইলৰ জনসাধাৰণৰ লগতে বৃহত্তৰ পশ্চিম এছিয়া অঞ্চলৰ বাবেও স্থায়ী শান্তি, নিৰাপত্তা আৰু উন্নয়নৰ এক কাৰ্যকৰী পথ প্ৰশস্ত কৰিব।” তেওঁ অৰ্থনৈতিক সমৃদ্ধি আৰু স্থায়ী শান্তিৰ পথত এই পৰিকল্পনাই সহায়ক হ’ব বুলি আশা প্ৰকাশ কৰিছে। তেওঁ লগতে কয়, “আমি আশা কৰিছো যে ৰাষ্ট্ৰপতি ট্ৰাম্পৰ এই পদক্ষেপৰ আঁৰত সংশ্লিষ্ট সকলোৱে একত্ৰিত হ’ব আৰু সংঘাতৰ অন্ত পেলোৱা তথা শান্তি প্ৰতিস্থা কৰাৰ এই প্ৰচেষ্টাক সমৰ্থন কৰিব।”
ট্ৰাম্পৰ এই পৰিকল্পনা অনুসৰি গাজাক উগ্ৰপন্থী-মুক্ত আৰু সন্ত্ৰাসমুক্ত অঞ্চল কৰা হ’ব, যি প্ৰতিৱেশী দেশসমূহৰ বাবে কোনো ভাবুকি সৃষ্টি কৰিব নোৱাৰে। দুয়োপক্ষই এই প্ৰস্তাৱ গ্ৰহণ কৰিলে যুদ্ধ তৎক্ষণাত অন্ত হ’ব। ইজৰাইলে চুক্তি গ্ৰহণৰ ৭২ ঘণ্টাৰ ভিতৰত জীৱিত আৰু মৃত সকলো পণবন্দীক ঘূৰাই দিব। পিছত ইজৰাইলে ২৫০ জন যাবজ্জীৱন কাৰাদণ্ডৰ বন্দী আৰু ২০২৩ চনৰ ৭ অক্টোবৰৰ পিছত আটক কৰা ১৭০০ গাজাবাসী মহিলা-শিশুক মুক্তি দিব। শান্তিপূৰ্ণ হামাছ সদস্যসকলক ক্ষমা দিয়া হ’ব আৰু গাজা এৰিব বিচাৰা সদস্যসকলক নিৰাপদ পথত অন্য দেশলৈ পঠোৱা হ’ব। চুক্তি গ্ৰহণৰ লগে লগে গাজালৈ সম্পূৰ্ণ মানৱীয় সাহায্য প্ৰেৰণ কৰা হ’ব, য’ত আন্তঃগাঁথনি পুনৰ্বাসন, চিকিৎসালয়, বেকাৰী পুনৰ্বাসন আৰু ধ্বংসাৱশেষ আঁতৰাবলৈ সঁজুলিৰ প্ৰৱেশ অন্তৰ্ভুক্ত। ৰাষ্ট্ৰসংঘ আৰু ৰেড ক্ৰীচেন্টৰ জৰিয়তে সাহায্য বিতৰণ হ’ব আৰু ৰাফাহ ক্ৰছিং মুকলি কৰা হ’ব।
ইয়াৰ পূৰ্বে কানাডা, কাতাৰ, জৰ্ডান, সংযুক্ত আৰব আমিৰেট, ইণ্ডোনেছিয়া, পাকিস্তান, তুৰ্কী, চৌদি আৰব আৰু ইজিপ্তৰ দৰে মুছলমান দেশসমূহে ট্ৰাম্পৰ এই পৰিকল্পনাক সমৰ্থন জনাইছে।
