দেশৰ ৰাজনৈতিক মহলত জোকাৰণি তোলা বৃহস্পতিবাৰৰ লোকসভাৰ অভাৱনীয় পৰিস্থিতিক লৈ এতিয়াও তুংগত আছে বিতৰ্ক। ভাৰতীয় গণতান্ত্ৰিক ব্যৱস্থাত পূৰ্বে কেতিয়াও নোহোৱা এই ঘটনাক লৈ শাসকীয় বিজেপিক থকা-সৰকা কৰিছে বিৰোধীয়ে।
এই বিতৰ্কৰ মাজতে বিজেপি সাংসদ ৰমেশ বিধুৰীৰ সাম্প্ৰদায়িক আচৰণৰ চিকাৰ হোৱা বহুজন সমাজবাদী পাৰ্টিৰ সাংসদ দানিশ আলীৰ দিল্লীস্থিত বাসগৃহত উপস্থিত হৈ নিজৰ সমৰ্থন প্ৰত্যক্ষৰূপত আগবঢ়ায় কংগ্ৰেছ নেতা ৰাহুল গান্ধীয়ে।
দানিছ আলীক সাকাৎ কৰাৰ পিছত সংবাদ মাধ্যমৰ সৈতে হোৱা বাৰ্তালাপত ৰাহুল গান্ধীয়ে ঘৃণাৰ বজাৰত প্ৰেমৰ দোকান খুলি দিয়া হ’ব বুলি মন্তব্য কৰে। কংগ্ৰেছৰ সাধাৰণ সম্পাদক কে চি ভেনুগোপাল আৰু সাংসদ ইমৰাণ প্ৰতাপগড়ীয়েও ৰাহুল গান্ধীক সংগ দিয়ে।
ৰাহুল গান্ধীৰ এই ভ্ৰমণৰ পিছতে আৱেগিক হৈ পৰা দানিছ আলীয়ে ব্যক্ত কৰে নিজৰ অনুভৱ। এই সময়ত তেওঁ অকলশৰীয়া নহয় যেন অনুভৱ কৰিছে বুলি মন্তব্য কৰে বহুজন সমাজবাদী পাৰ্টিৰ সাংসদগৰাকীয়ে।
দানিশ আলীয়ে কয়, “ৰাহুল গান্ধীয়ে মোৰ মনোবল বৃদ্ধিৰ বাবে মোৰ বাসগৃহলৈ আহিছিল। তেওঁ এই ঘটনাক হৃদয়ত নল’বলৈ আৰু স্বাস্থ্যৰ যত্ন ল’বলৈ পৰামৰ্শ দিছে। মই সকাহ অনুভৱ কৰিছো যে মই অকলশৰীয়া নহয়।”
বিএছপিৰ সাংসদগৰাকীয়ে লগতে তেওঁৰ প্ৰতি বিজেপি সাংসদগৰাকীয়া কৰা আচৰণ গণতন্ত্ৰ আৰু সংবিধানৰ ওপৰত আক্ৰমণ বুলি অভিহিত কৰে। ‘অমৃতকালৰ সময়ত নতুন সংসদত এতিয়া ঘৃণাৰ দোকান স্থাপন কৰাটো দুখজনক’ বুলি মন্তব্য কৰে দানিশ আলীয়ে।
ইফালে দানিশ আলীৰ সৈতে ৰাহুল গান্ধীৰ এই সাক্ষাতৰ ছবি শ্বেয়াৰ কৰি কংগ্ৰেছে এক টুইট যোগে বিজেপি সাংসদ ৰমেশ বিধুৰীৰ এই লজ্জাজনক আৰু নিম্ন মানদণ্ডৰ কাৰ্যৰ দ্বাৰা সদনৰ মৰ্যাদাৰ ওপৰত দাগ পৰিছে বুলি উল্লেখ কৰে।
গণতন্ত্ৰৰ মন্দিৰত ঘৃণাৰ এনে মানসিকতাক কংগ্ৰেছে তীব্ৰ বিৰোধিতা কৰে বুলিও টুইটটোত উল্লেখ কৰে কংগ্ৰেছে। উল্লেখ্য যে, বৃহস্পতিবাৰে সংসদক এক আলোচনাৰ সময়তে দানিশ আলীক উগ্ৰপন্থী, সন্ত্ৰাসবাদী আদি শব্দৰে সাম্প্ৰদায়িক আক্ৰমণ কৰিছিল বিজেপি সাংসদ ৰমেশ বিধুৰীয়ে।
ইয়াৰ পিছতে উত্তাল হৈ পৰিছিল দেশৰ ৰাজনীতি। বিৰোধীয়ে ইয়াৰ প্ৰতিবাদত ৰমেশ বিধুৰীৰ নিলম্বনৰ দাবী তুলিছিল যদিও আজি লোকসভাৰ অধ্যক্ষ ওম বিৰলাই বিধুৰীক কেৱল সকীয়নিহে প্ৰদান কৰে।
লক্ষনীয়ভাৱে বিৰোধী মিত্ৰজোঁট INDIA ৰ পৰা আঁতৰি আছে বহুজন সমাজবাদী পাৰ্টি। গতিকে দলটোৰ সাংসদ দানিশ আলীৰ প্ৰতি বিৰোধীৰ এই সমৰ্থনে তথা কংগ্ৰেছ নেতা ৰাহুল গান্ধীৰ আজিৰ এই ভ্ৰমণে ৰাজনৈতিক পট পৰিৱৰ্তনৰো ব্যাপক ইঙ্গিত বহন কৰিছে।
