দুবছৰ ধৰি জ্বলি আছে মণিপুৰ। এই সময়চোৱাত বহু লোক স্থানচ্যুত হৈছে। প্ৰধানমন্ত্ৰী এতিয়ালৈকে এবাৰহে তালৈ গৈছে। এইবাৰ মণিপুৰ ভ্ৰমণলৈ গৈ আছে আৰ এছ এছৰ মুৰব্বী মোহন ভাগৱত।
জানিব পৰা মতে ২০ নৱেম্বৰত সংঘৰ মুৰব্বী মণিপুৰলৈ যাব। তিনিদিনীয়া ভ্ৰমণৰ সময়ছোৱাত তেওঁৰ কেইবাটাও কাৰ্যসূচী আছে। মণিপুৰ আৰ এছ এছৰ সভাপতি তৰুণ কুমাৰ শৰ্মাই সংবাদ মাধ্যমৰ আগত কয় যে এই ভ্ৰমণৰ সময়ত তেওঁ ৰাজ্যৰ বিভিন্ন সাধাৰণ লোক, উদ্যোগী আৰু বিভিন্ন জনজাতীয় গোটৰ নেতাক সাক্ষাৎ কৰিব।
শৰ্মাই কয় যে প্ৰথম দিনাই ইম্ফলৰ কাঞ্জেন লাইকাইত এক অনুষ্ঠানত উদ্যোগী আৰু বিশিষ্ট ব্যক্তিক লগ পাব। ইয়াৰ পাছত ২১ নৱেম্বৰত ভাগৱতে মণিপুৰ পাহাৰৰ জনজাতীয় নেতাসকলক সাক্ষাৎ কৰিব। অৱশ্যে শৰ্মাই কয় যে সংঘাতৰ ফলত স্থানচ্যুত হোৱা লোকসকল থকা সাহায্য শিবিৰসমূহ তেওঁ ভ্ৰমণ নকৰে বুলি এতিয়ালৈকে সিদ্ধান্ত লোৱা হৈছে।
২০২৩ চনৰ মে’ মাহৰ পৰা আৰম্ভ হোৱা মেটেই-কুকি সংঘাতত ২৬০ জনতকৈ অধিক লোকৰ মৃত্যু হৈছে।ইয়াৰ উপৰিও হাজাৰ হাজাৰ লোক স্থানচ্যুত হৈছে। কিছুদিন পূৰ্বে দীৰ্ঘদিনীয়া বিতৰ্কৰ অন্তত শনিবাৰে মণিপুৰত ভৰি দিছিল মোদীয়ে। চুৰাচান্দপুৰত এখন ৰাজহুৱা সভাত অংশগ্ৰহণ কৰি প্ৰধানমন্ত্ৰীয়ে হিংসা পাহৰি শান্তিৰ আহ্বান জনায়। তেওঁৰ বাৰ্তা আছিল, ‘উন্নয়নৰ বাবে শান্তি অতি প্ৰয়োজনীয়।’ উত্তৰ-পূব ৰাজ্যত উন্নয়ন চলি থাকিবলৈ সংঘাত বন্ধ কৰিবলৈ তেওঁ আবেদন জনায়। লগতে তেওঁ কয়, “কেন্দ্ৰীয় চৰকাৰে আপোচত উপনীত হ’বলৈ ৰাজ্যৰ বিভিন্ন গোটৰ সৈতে আলোচনা অব্যাহত ৰাখিছে।”
উল্লেখ্য যে বিজেপিৰ ৰাজনীতিৰ আঁৰৰ মূল মতাদৰ্শগত সংগঠন আৰ এছ এছ। সংঘৰ মুৰব্বীগৰাকীয়ে শেষবাৰৰ বাবে ২০২২ চনত মণিপুৰ ভ্ৰমণ কৰিছিল। ৰাজ্যখনত দুবছৰীয়া সংঘাতৰ আঁৰত আৰ এছ এছৰ আঁৰত মণিপুৰৰ বিভিন্ন গোটে অভিযোগ উত্থাপন কৰিছে। মূলতঃ মেটেইসকলে এই অভিযোগ উত্থাপন কৰিছিল। আনহাতে চৰকাৰৰ লগত আলোচনা কৰি কুকিসকলে ৰাষ্ট্ৰীয় ঘাইপথ মুকলি কৰে। এই পৰিস্থিতিত বিশেষজ্ঞসকলৰ মতে ৰাজনৈতিক আৰু সামাজিক দুয়োটা দৃষ্টিকোণৰ পৰা এই ভ্ৰমণ অতি গুৰুত্বপূৰ্ণ।
