অনলাইনত খাদ্যৰ অৰ্ডাৰ দিয়াৰ পাছত আৱাসগৃহৰ গেটত পৰিচয় পৰীক্ষাৰ বাবে ডেলিভাৰী বয়ক ৰখাইছিল নিৰাপত্তাৰক্ষীয়ে। এই ঘটনাক লৈ ক্ষুব্ধ হৈ পৰিল এগৰাকী মহিলা। অভিযোগ অনুসৰি, তেওঁ আৱাসগৃহৰ নিৰাপত্তাৰক্ষীৰ সৈতে তীব্ৰ তৰ্কত লিপ্ত হোৱাৰ লগতে অশ্ৰাব্য ভাষাৰে গালি-গালাজ কৰে, ভাবুকি দিয়ে আৰু এগৰাকী নিৰাপত্তাৰক্ষীক হাতেও আঘাত কৰে। ঘটনাৰ ভিডিঅ’ সমাজিক মাধ্যমত ভাইৰেল হোৱাৰ পাছতে সমগ্ৰ দেশতে তীব্ৰ প্ৰতিক্ৰিয়া সৃষ্টি হৈছে।
ঘটনাটো সংঘটিত হৈছে গ্ৰেটাৰ নয়ডা ৱেষ্টৰ বিসৰখ থানাৰ অন্তৰ্গত ‘আম্ৰপালী চেঞ্চুৰিয়ান পাৰ্ক টেৰেছ হোমছ’ নামৰ অভিজাত আৱাসগৃহত। বুধবাৰে নিশা মহিলাগৰাকীয়ে এটা অনলাইন খাদ্য সেৱাৰ জৰিয়তে খাদ্য অৰ্ডাৰ কৰিছিল। আৱাসগৃহৰ নিয়ম অনুসৰি, নিৰাপত্তাৰক্ষীয়ে গেটত ডেলিভাৰী বয়জনক ৰখাই পৰিচয় পৰীক্ষা কৰিবলৈ লয়। এই কথাত ক্ষুব্ধ হৈ মহিলা তললৈ নামি আহি নিৰাপত্তাৰক্ষীসকলৰ সৈতে বাক-বিতণ্ডাত লিপ্ত হয়।
সমাজিক মাধ্যমত ভাইৰেল হোৱা ভিডিঅ’টোত দেখা গৈছে যে গেটৰ সন্মুখত মহিলা আৰু নিৰাপত্তাৰক্ষীসকলৰ মাজত তীব্ৰ তৰ্ক চলিছে। মহিলাগৰাকীয়ে একেৰাহে অশ্ৰাব্য ভাষাৰে গালি-গালাজ কৰা দেখা যায়। কেৱল কথাৰ যুঁজতে তেওঁ থমকি নাথাকি, চকীত বহি থকা এগৰাকী নিৰাপত্তাৰক্ষীক গোৰ মাৰিবলৈ চেষ্টা কৰাৰ লগতে আন এগৰাকী ৰক্ষীক হাতেও আঘাত কৰা বুলি অভিযোগ উঠিছে।
ভিডিঅ’টোত মহিলাগৰাকীয়ে নিৰাপত্তাৰক্ষীসকলৰ সামাজিক আৰু আৰ্থিক অৱস্থাক লৈও কটাক্ষ কৰা শুনা যায়। তেওঁ এজন ৰক্ষীক উদ্দেশ্য কৰি কয়, “মোৰ সন্মুখত তোৰ কোনো যোগ্যতা নাই, তোকে জোতা পৰিষ্কাৰ কৰাম।” আনকি আৰক্ষীক ফোন কৰাৰ বাবেও প্ৰত্যাহ্বান জনাই তেওঁ চিঞৰি কয়, “কাক মাতিবি মাত।” বাক-বিতণ্ডাৰ মাজতে তেওঁ দলিত সম্প্ৰদায় আৰু জাতিগত পৰিচয়ক লৈ অপমানজনক মন্তব্য কৰাৰো অভিযোগ উত্থাপিত হৈছে।
ঘটনাৰ ভিডিঅ’ ৰাজহুৱা হোৱাৰ পাছতে সমাজিক মাধ্যমত ব্যাপক ক্ষোভৰ সৃষ্টি হৈছে। বহু লোকেই মহিলাগৰাকীৰ আচৰণক উদ্ধত, অমানৱীয় আৰু নিন্দনীয় আখ্যা দি কঠোৰ সমালোচনা কৰিছে। বহুজনৰ মতে, ধন-সম্পত্তি বা সামাজিক পৰিচয়ৰ জোৰত পৰিশ্ৰম কৰি জীৱিকা উপাৰ্জন কৰা মানুহক অপমান কৰাৰ কোনো অধিকাৰ কাৰো নাই। একে সময়তে, ইমান উত্তেজনাৰ মাজতো নিৰাপত্তাৰক্ষীসকলে যথেষ্ট ধৈৰ্য ধৰি পৰিস্থিতি নিয়ন্ত্ৰণ কৰাৰ বাবে বহু লোকে তেওঁলোকৰ প্ৰশংসা কৰিছে।
ইফালে, ঘটনাটোক গুৰুত্বসহকাৰে লৈ বিসৰখ থানাৰ আৰক্ষীয়ে তদন্ত আৰম্ভ কৰিছে। আৰক্ষীৰ মতে, ঘটনাৰ সম্পূৰ্ণ ভিডিঅ’ আৰু অন্যান্য প্ৰমাণ পৰীক্ষা কৰা হৈছে। অভিযোগৰ ভিত্তিত তদন্ত সম্পূৰ্ণ কৰি আইন অনুসৰি ব্যৱস্থা গ্ৰহণ কৰা হ’ব। বৰ্তমান আৱাসগৃহখনত পৰিস্থিতি স্বাভাৱিক হৈ আছে বুলি জানিবলৈ দিছে প্ৰশাসনে।
খাদ্যৰ এটা সাধাৰণ ডেলিভাৰী লৈ আৰম্ভ হোৱা এই বচসাই এতিয়া সমাজত শ্ৰমজীৱী লোকৰ প্ৰতি আচৰণ, আৱাসগৃহৰ কঠোৰ নিয়ম আৰু সামাজিক বৈষম্যৰ দৰে গুৰুতৰ প্ৰশ্ন উত্থাপন কৰিছে। নিৰাপত্তাৰক্ষী হওক বা ডেলিভাৰী কৰ্মী, কামৰ সন্মান আৰু মানুহ হিচাপে মৰ্যাদা কোনো পৰিস্থিতিতেই হ্ৰাস পাব নালাগে।
