কেইবাটাও ভয়ংকৰ ঘটনাৰ পিছতো অসমত লোপ পোৱা নাই মৰেল পুলিচ। বন্ধন গোটৰ ঋণ মাৰিব নোৱৰাৰ অভিযোগত বিহালীৰ ৰৌমাৰী গাঁৱত এগৰাকী মহিলাক মৰিয়াই আধামৰা কৰিছে গাওঁখনৰে একাংশ মহিলাই।
বুধবাৰে ঘটা ঘটনাটোৰ ভুক্তভোগীগৰাকীক ইতিমধ্যে বিহালী আৰক্ষীয়ে উদ্ধাৰ কৰি চিকিৎসালয়ত ভৰ্তি কৰিছে যদিও মহিলাগৰাকীয়ে তেওঁক কৰা আক্ৰমণৰ ফলত কাণেৰে নুশুনা হোৱা বুলি অভিযোগ কৰিছে।
ভুক্তভোগীগৰাকীৰ পৰিয়ালৰ মতে গাঁৱৰ মহিলা মৰেল পুলিচৰ দলটোৱে মহিলাগৰাকীক বাঁহেৰে আক্ৰমণ কৰিছিল। আক্ৰমণত মহিলাগৰাকীয়ে মুখমণ্ডলতো আঘাত পাইছে৷
ঘটনাটোৰ লগত জড়িত ৬ গৰাকী মহিলাক আৰক্ষীয়ে গ্ৰেপ্তাৰ কৰিছে৷ ‘ঘটনা সন্দৰ্ভত মৰমী বৰা, জিনা বৰা, ববী ৰাজখোৱা, জোনালী ৰাজখোৱা, মৌচুমী শইকীয়া আৰু ৰূপা বৰাক গ্ৰেপ্তাৰ কৰা হৈছে,’ নৰ্থ ইষ্ট নাও-ক জনালে বিশ্বনাথ জিলাৰ আৰক্ষী অধীক্ষক দিগন্ত কুমাৰ চৌধুৰীয়ে।
ঘটনাটো সন্দৰ্ভত মহিলাগৰাকীৰ স্বামীয়ে বিহালী আৰক্ষী থানাত এজাহাৰ দাখিল কৰাৰ বিপৰীতে মহিলাগৰাকীৰ ওপৰতো গাঁৱৰ মহিলাসকলে ঋণ পৰিশোধ নকৰি পলাই থকা সন্দৰ্ভত এজাহাৰ দাখিল কৰিছে৷
বিহালী আৰক্ষীয়ে দুয়োপক্ষৰে অভিযোগৰ ভিত্তিত ১০১/১৮ আৰু ১০২/১৮ নম্বৰৰ দুটা গোচৰ ৰুজু কৰি তদন্ত আৰম্ভ কৰিছে৷
অভিযোগ অনুসৰি দৰিদ্ৰ মহিলাগৰাকীয়ে গোটটোৰ পৰা ৬০ হাজাৰ টকা সুদলৈ লৈ কিস্তি পৰিশোধ নকৰি ‘পলাই আছিল’।
বুধবাৰে গোটটোৰ একাংশ মহিলাই মহিলাগৰাকীক গাঁৱৰ নামঘৰৰ সন্মুখত বিদ্যুতৰ খুঁটাত বান্ধি মুখত ক’লা ছাই আৰু চূণ সানি, ছুলি কাটি মাৰধৰ কৰি পিছত সমদল উলিয়াই গোটেই গাওঁখন সমদল কৰি ঘূৰায়।