পেৰিছৰ বিদ্যালয়সমূহত বিগত এবছৰ ধৰি পোহৰলৈ অহা এক ভয়াৱহ ঘটনাই সমগ্ৰ ফ্ৰান্সত তীব্ৰ চাঞ্চল্যৰ সৃষ্টি কৰিছে। ফ্ৰান্সৰ ৰাজধানী চহৰখনত বিদ্যালয়ৰ সহায়ক বা এনিমেটৰ হিচাপে কাম কৰা প্ৰায় পোন্ধৰ হাজাৰ অশিক্ষক কৰ্মচাৰী এতিয়া চৰ্চাৰ কেন্দ্ৰবিন্দু হৈ পৰিছে। এইসকল কৰ্মচাৰীৰ বহুতেই সৰু সৰু শিশুৰ সৈতে অশালীন আচৰণ আৰু যৌন নিৰ্যাতন চলোৱাৰ গুৰুতৰ অভিযোগ উত্থাপন হৈছে। সাধাৰণতে এই সহায়কসকলে শিশুসকলক আহাৰ খোৱাৰ সময়ত আৰু বিদ্যালয়ৰ ছুটীৰ পিছত তদাৰক কৰাৰ লগতে খেল-ধেমালি আৰু অন্যান্য কাম-কাজত সহায় কৰে। কিন্তু এতিয়া ক্ৰমান্বয়ে বৃদ্ধি পোৱা অভিযোগৰ বাবে কৰ্তৃপক্ষই তেওঁলোকৰ ভুমিকাৰ ওপৰত কঠোৰ নজৰ ৰাখিবলগীয়া হৈছে।
এই ঘটনাৰ শেহতীয়া খবৰ অনুসৰি, মঙলবাৰে পেৰিছত এগৰাকী বিদ্যালয় সহায়কৰ বিৰুদ্ধে আদালতত বিচাৰ প্ৰক্ৰিয়া আৰম্ভ হ’ব। পেৰিছৰ ১১ নং জিলাৰ আলফন্স বডিন জুনিয়ৰ স্কুলৰ এই কৰ্মচাৰীগৰাকীৰ বিৰুদ্ধে পাঁচগৰাকী শিশুক অশালীনভাৱে স্পৰ্শ কৰাৰ অভিযোগ আছে। এই বিচাৰ প্ৰক্ৰিয়াটো সমগ্ৰ পেৰিছৰ অভিভাৱকসকলক জোকাৰি যোৱা এক বৃহৎ তদন্তৰ অংশহে মাত্ৰ। বৰ্তমান কৰ্তৃপক্ষই পেৰিছৰ কমেও এশখন ক্ৰেচ, অংগনৱাড়ী আৰু জুনিয়ৰ স্কুলত এনে ধৰণৰ নিৰ্যাতনৰ অভিযোগৰ তদন্ত চলাই আছে। ইয়াৰ উপৰিও এই গ্ৰীষ্মকালত আন তিনিটা গোচৰৰ বিচাৰ চলিব আৰু অলপতে শুনানি হোৱা আন এটা গোচৰৰ ৰায়দানৰ বাবে অপেক্ষা কৰা হৈছে।
যোৱা সপ্তাহত আৰক্ষীয়ে পেৰিছৰ ৭ নং জিলাৰ তিনিখন বিদ্যালয়ত অভিযান চলাই ষোল্লগৰাকী লোকক আটক কৰিছিল। ইয়াৰে তিনিগৰাকীৰ বিৰুদ্ধে পৰৱৰ্তী সময়ত শিশুৰ সৈতে অশালীন আচৰণ কৰাৰ আনুষ্ঠানিক অভিযোগ ৰুজু কৰা হয়। বিবিচিৰ এক প্ৰতিবেদন অনুসৰি, ২০২৫ চনৰ এপ্ৰিল মাহত এই কেলেংকাৰীটোৱে ব্যাপক চৰ্চা লাভ কৰিছিল। এগৰাকী পিতৃয়ে নিজৰ চাৰি বছৰীয়া কন্যাৰ আচৰণত অস্বাভাৱিক পৰিৱৰ্তন লক্ষ্য কৰাৰ পিছতেই আন এগৰাকী অভিভাৱকে তেওঁৰ সন্তানক নিৰ্যাতন কৰাৰ অভিযোগ উত্থাপন কৰিছিল আৰু তাৰ পিছতেই সমগ্ৰ ঘটনা পোহৰলৈ আহে।
এই ভয়ংকৰ অভিযোগসমূহে সমগ্ৰ পেৰিছৰ অভিভাৱকসকলৰ মাজত তীব্ৰ ভয় আৰু অবিশ্বাসৰ সৃষ্টি কৰিছে। এছ অ’ এছ পেৰিছক’লায়াৰ নামৰ এটা সংস্থাৰ মতে, এই সমস্যাৰ মূল কাৰণ হৈছে কৰ্মচাৰী নিযুক্তি প্ৰক্ৰিয়াৰ দুৰ্বলতা। কিয়নো এই সহায়কসকলক অতি কম দৰমহা দিয়া হয় আৰু কেৱল মাত্ৰ সাধাৰণ প্ৰমাণপত্ৰৰ জৰিয়তে তেওঁলোকক চাকৰিত মকৰল কৰা হয়। পৰিস্থিতি বেয়াৰ ফালে যোৱা দেখি পেৰিছৰ মেয়ৰ ইমানুৱেল গ্ৰেগৰিয়ে নিযুক্তি প্ৰক্ৰিয়াত সংস্কাৰ অনাৰ প্ৰতিশ্ৰুতি দিছে। কৰ্মচাৰীসকলৰ প্ৰশিক্ষণ আৰু নিৰীক্ষণ ব্যৱস্থা উন্নত কৰাৰ উদ্দেশ্যে তেওঁ ২০ মিলিয়ন ইউৰোৰ এখন বৃহৎ আঁচনি ঘোষণা কৰিছে।
