বিগত বাৰ বছৰ ধৰি একশৰণ হৰি নাম ধৰ্ম আৰু মহাপুৰুষীয়া কৃষ্টি-সংস্কৃতিৰ প্ৰসাৰ আৰু প্ৰচাৰৰ উদ্দেশ্যে গঠিত ‘সঙ্গীতময় শ্ৰীমদ্ভাগৱত কথা প্ৰচাৰ সমিতি’য়ে দ্বাদশ বাৰ্ষিক প্ৰতিষ্ঠা দিৱস উদযাপন কৰাৰ দিহা কৰিছে।
সেই উপলক্ষে অহা ১৪ অক্টোবৰত গুৱাহাটীৰ শ্ৰীমন্ত শংকৰদেৱ কলাক্ষেত্ৰৰ শ্ৰী শ্ৰী মাধৱদেৱ আন্তৰ্জাতিক প্ৰেক্ষাগৃহত বিয়লি তিনিবজাৰ পৰা এক বৰ্ণাঢ্য অনুষ্ঠান অনুষ্ঠিত হ’ব বুলি উদ্যোক্তাসকলে জানিবলৈ দিয়ে।
মাজুলীৰ উত্তৰ কমলাবাৰী সত্ৰৰ সত্ৰাধিকাৰ জনাৰ্দন দেৱ গোস্বামীয়ে বন্তি প্ৰজ্বলনেৰে আৰম্ভণী কৰিবলগীয়া এই অনুষ্ঠানত বিশিষ্ট কন্ঠশিল্পী প্ৰশান্ত ৰাজখোৱাই বৰগীত পৰিবেশন কৰিব। ইয়াৰ পাচতেই সঙ্গীতময় ভাগৱত পাঠ আৰু প্ৰৱচন কৰিব ৰিজু পাঠকে।
‘সঙ্গীতময় শ্ৰীমদ্ভাগৱত কথা প্ৰচাৰ সমিতি’ৰ এই দ্বাদশ প্ৰতিষ্ঠা দিৱসত মইনবড়ী সত্ৰৰ সত্ৰাধিকাৰ গনেশ চন্দ্ৰ অধিকাৰী, সমাজকৰ্মী জি এল আগৰৱালা প্ৰমুখ্যে কুৰিজনতকৈ অধিক মহাপুৰুষীয়া সাহিত্য, কৃষ্টি-সংস্কৃতিৰ সাধকক সম্বৰ্দ্ধনা জনাব বুলি সমিতিয়ে জানিবলৈ দিয়ে।
শ্ৰীমন্ত শংকৰদেৱ কলাক্ষেত্ৰৰ উপ সচিৱ পদ্মশ্ৰী সূৰ্য হাজৰিকাই মুকলি কৰবলগীয়া এই সম্বৰ্দ্ধনা অনুষ্ঠানত অসম চৰকাৰৰ মন্ত্ৰী নৱ কুমাৰ দলে, মুখ্যমন্ত্ৰীৰ প্ৰেছ উপদেষ্টা হৃষিকেশ গোস্বামী আৰু কৃষ্ণকান্ত সন্দিকৈ ৰাজ্যিক মুক্ত বিশ্ববিদ্যালয়ৰ উপাচাৰ্য ড০ হিতেশ ডেকাকে ধৰি কেইবাগৰাকীও বিশিষ্ট ব্যক্তি উপস্থিত থাকিব বুলি উদ্যোক্তা সকলে জানিবলৈ দিয়ে।
