সাংবাদিকক ফোন যোগেৰে ভাবুকি দি সংকটত পৰিছে অসম চৰকাৰৰ ৰাজ্যিক স্বাস্থ্য মন্ত্ৰী পীয়ুষ হাজৰিকা।
দুটা বৈদ্যুতিন সংবাদ মাধ্যমৰ দুই সাংবাদিকক ফোন যোগেৰে চৰম ভাবুকি দিয়া মন্ত্ৰীগৰাকীৰ অডিঅ’ ক্লীপ ভাইৰেল হোৱাৰ পিছতে ৰাজ্যজুৰি চাঞ্চল্যৰ সৃষ্টি হোৱাৰ লগতে মন্ত্ৰীগৰাকীৰ গুণ্ডাগিৰিৰ বিৰুদ্ধে প্ৰতিবাদৰ ঢৌ উঠিছে।
প্ৰাণৰ আশংকাত পৰা দুই সাংবাদিকে ইতিমধ্যে জাগীৰোড আৰক্ষী থানাত মন্ত্ৰী পীযুষ হাজৰিকাৰ বিৰুদ্ধে এজাহাৰ দাখিল কৰিছিল।
ইয়াৰ পিছতে শনিবাৰে মন্ত্ৰী পীযুষ হাজৰিকাই ভাবুকি দিয়া ফোনটো মৰিগাঁও আৰক্ষীয়ে জব্দ কৰিছে।
মৰিগাঁও আৰক্ষীয়ে জব্দ কৰা ফোনটো কণ্ঠস্বৰ পৰীক্ষাৰ বাবে ফৰেনছিক বিভাগৰ লেবৰেটৰীলৈ প্ৰেৰণ কৰিব জনাইছে।
উল্লেখ্য যে মন্ত্ৰীগৰাকীৰ অভিনেত্ৰী পত্নী আইমী বৰুৱাৰ ‘কা’ সম্পৰ্কিত এটা বিতৰ্কিত ভিডিঅ’ ক্লীপৰ বাতৰিৰ সংক্ৰান্তত মন্ত্ৰীগৰাকীয়ে মৰিগাঁৱৰ নজৰুল ইছলাম আৰু জাগীৰোডৰ তুলসী মান্তা নামৰ বৈদ্যুতিন সংবাদ মাধ্যমৰ দুগৰাকী সাংবাদিকক ফোন যোগেৰে চৰম ভাবুকি প্ৰদান কৰিছিল।
উক্ত অডিঅ’ ক্লীপটোত মন্ত্ৰীগৰাকীয়ে বহু আপত্তিজনক মন্তব্য কৰাও পৰিলক্ষিত হৈছে। আনকি প্ৰাণে মৰাৰ ভাবুকি(No Where) প্ৰদানৰ লগতে সাম্প্ৰদায়িক বিষবাষ্প বিয়পাব পৰা মন্তব্যও কৰিছিল মন্ত্ৰী পীযুষ হাজৰিকাই।
ইফালে এই ভাবুকি প্ৰদানৰ খবৰ বিয়পি পৰাৰ পিছতে ৰাজ্য সৰ্বস্তৰতে প্ৰতিবাদৰ ঢৌ উঠাৰ লগতে সামাজিক মাধ্যমত ভীষণভাৱে ট্ৰলৰ সন্মুখীন হৈছে মন্ত্ৰী পীযুষ হাজৰিকাৰ লগতে তেওঁৰ অভিনেত্ৰী পত্নী আইমী বৰুৱা।
সামাজিক মাধ্যমৰ লগতে অসমৰ বিভিন্ন প্ৰান্তত মন্ত্ৰী পীযুষ হাজৰিকাৰ গুণ্ডাগিৰিৰ বিৰুদ্ধে আইনী ব্যৱস্থা গ্ৰহণৰ দাবী উত্থাপন হৈছে।
ইফালে এই অডিঅ’ ক্লীপ ভাইৰেল হোৱাৰ পিছতে মৰিগাঁও আৰক্ষী অধীক্ষক নন্দ সিং বৰকলাই ভাবুকি লাভ কৰা এগৰাকী সাংবাদিক নজৰুল ইছলামক সুৰক্ষাৰ বাবে এগৰাকী নিৰপত্তাৰক্ষী প্ৰদান কৰিছে।
