কেতিয়া কাৰ ভাগ্য কেনেদৰে উদয় হয় সেয়া কোৱাটো টান। এনেদৰে ভাগ্যৰ চকৰি ঘুৰি নিশাটোৰ ভিতৰতেই লাখপতি হৈ পৰিল এজন সাধাৰণ কৃষক।
মধ্যপ্ৰদেশত এজন কৃষকে কৃষিকৰ্মৰ বাবে মাত্ৰ ২০০টকাত এটুকুৰা মাটি লীজত লৈছিল। সেই মাটিতে তেওঁ পালে এটুকুৰা হীৰা। সেয়া বিক্ৰী কৰি তেওঁ এতিয়া লাখপতি। শুনিবলৈ আচৰিত যেন লাগিলেও এয়া সত্য।
বাতৰি অনুসৰি, লক্ষ্মণ যাদৱ নামৰ কৃষকজনে এটুকুৰা মাটি লীজত লৈছিল। সৰু সেই মাটি টুকুৰাৰ লীজত লওতে তেওঁ ২০০টকাও দিছিল। কিন্তু ইয়াৰ সলনি তেওঁ যি পালে সেয়া তেওঁৰ কল্পনাৰো বাহিৰত।
কৃষিকৰ্মৰ বাবে তেওঁ মাটি টুকুৰা চহ কৰিছিল। তেতিয়াই তেওঁ এটা পাথৰ দেখা পায়। সামান্য পৰিষ্কাৰ কৰিয়েই তেওঁ বুজিব পাৰে যে সেইটো সাধাৰণ কোনো শিল নহয়, হীৰাহে।
ইয়াৰ পাছতে যাদবে চহৰৰ এখন দোকানলৈ গৈ সেইটো দেখায়. দোকানীয়েও সেইটো আচল হীৰা বুলি জানিবলৈ দিয়ে । হীৰা টুকুৰাৰ ওজন আছিল ১৪.৯৮ কেৰেট।
যোৱা শনিবাৰে নীলামত হীৰা টুকুৰা লক্ষ্মণ যাদবে বিক্ৰী কৰে। হীৰা টুকুৰা বিক্ৰী কৰি যাদবে লাভ কৰে ৬০.৬লাখ টকা।
ইমান টকা লাভ কৰি লক্ষ্মণে প্ৰকৃততে কি কৰিব সেয়াও তেওঁ জনাইছে। সেই টকা তেওঁ আজে বাজে খৰচ নকৰে। বেছি অংশ টকাই তেওঁ ফিক্স ডিপ’জিট কৰিব যাতে ভৱিষ্যতে তেওঁৰ সন্তানে ভালদৰে পঢ়াশুনা কৰিব পাৰে।
বৰ্তমান ৪৫বছৰীয়া কৃষক লক্ষ্মণে কয় যে তেওঁ এই টকাৰে বেছি একো নকৰে। নিজৰ পঢ়াশুনা কৰা নহ’ল, গতিকে তেওঁৰ চাৰি সন্তানৰ পঢ়াশুনাত যাতে সমস্যা নহয় তাৰ বাবে জমা কৰি ৰাখিব।
অৱশ্যে, তাৰমাজতে লক্ষ্মম যাদবে নিজ এটা চখ পূৰণ কৰিছে। হীৰা বিক্ৰী কৰি পোৱা প্ৰথম এক লাখ টকাৰে নিজৰ বাবে এখন বাইক কিনিছে লক্ষ্মণ যাদবে।