কিছুদিন পূৰ্বে ৰিলায়েন্স ইণ্ডাষ্ট্ৰীজৰ স্বত্বাধিকাৰ তথা এছিয়াৰ আটাইতকৈ ধনী ব্যক্তি উদ্যোগপতি মুকেশ আম্বানীৰ ঘৰৰ সন্মুখত বিস্ফোৰক ভৰ্তি বাহন ৰখাৰ অভিযোগত ৰাষ্ট্ৰীয় তদন্তকাৰী সংস্থা নিয়াই শেহতীয়াকৈ মুম্বাইৰ বিমান বন্দৰৰ পৰা এগৰাকী ৰহস্যময়ী মহিলাক আটক কৰিবলৈ সক্ষম হৈছে।
এই ঘটনাত ইতিমধ্যে গ্ৰেপ্তাৰ কৰা হৈছিল মুম্বাই আৰক্ষীৰ জ্যেষ্ঠ বিষয়া শচীন ৱাজেক।
ৰহস্যময়ী মহিলাগৰাকীয়ে ১৬ ফেব্ৰুৱাৰীৰ দিনা মুম্বাইৰ এখন পঞ্চ তাৰকাযুক্ত হোটেলত মুম্বাই আৰক্ষীৰ দৃত বিষয়া গৰাকীৰ সৈতে থকাৰ কথা তদন্তকাৰী সংস্থাটোৱে জানিব পাৰিছে। জানিব পৰা মতে মহিলাগৰাকীয়ে শচীন ৱাজেৰ ক’লা ধন বগা কৰাত সহায় কৰি আহিছিল।
উল্লেখ্য ২৫ ফেব্ৰুৱাৰীত আম্বানীৰ ঘৰৰ সন্মুখত বিস্ফোৰক ভৰ্তি বাহন ৰখাৰ অভিযোগ উত্থাপন হৈছিল আৰক্ষী বিষয়া জনৰ বিৰুদ্ধে।
তাৎপৰ্যপূৰ্ণ ভাবে বাহন খনৰ স্বত্বাধিকাৰ মনসুখ হীৰেণৰ মৃতদেহ পৰৱৰ্তী সময়ত ৰহস্যজনক অৱস্থাত উদ্ধাৰ হৈছিল।
মনসুখৰ পত্নী বিমলা হীৰেণে অভিযোগ কৰা অনুসৰি আৰক্ষী বিষয়া ৱাজেই আম্বানীৰ ঘৰৰ সন্মুখত ৰখা বাহন খন দীৰ্ঘ দিন ধৰি তেওঁৰ স্বামীৰ পৰা নি ব্যৱহাৰ কৰি আছিল।
ইয়াৰ পিছতে নিয়াই তদন্ত আগবঢ়াই নিয়ে আৰু বাৰ ঘণ্টীয়া জেৰাৰ অন্তত আৰক্ষী বিষয়া জনক গ্ৰেপ্তাৰ কৰে।
মুকেশ আম্বানীৰ ঘৰৰ সন্মুখত বিস্ফোৰক ভৰ্তি বাহন ৰখাৰ দায়িত্ব স্বীকাৰ ইছলামিক সন্ত্ৰাসবাদী সংগঠন জইছ-উল-হিন্দে স্বীকাৰ কৰা বুলি কোৱা হৈছিল যদিও সংগঠনটোৱে সেই কাম কৰা নাই বুলি স্পষ্টীকৰণ দিয়াৰ পিছতে ঘটনাটোৱে অন্য মোৰ লৈছিল।
