বিজেপিৰ আগ্ৰাসী অপাৰেচন ল’টাছ অভিযান আৰু দলীয় বিসম্বাদৰ ফলশ্ৰুতিত মহাৰাষ্ট্ৰৰ ক্ষমতা হেৰুওৱা শিৱসেনাৰ মুৰব্বী উদ্ধৱ ঠাকৰেৰ শক্তি যেন ক্ৰমাৎ লোপ পাবলৈ ধৰিছে। দুমাহ পূৰ্বে ৰাজ্যখনৰ শাসন হেৰুওৱা উদ্ধৱ ঠাকৰেই দলীয় সতীৰ্থ তথা কাৰাৰুদ্ধ সাংসদ সঞ্জয় ৰাউটক সাক্ষাতৰ বাবেও অনুমতি লাভত বিফল হৈছে।
জানিব পৰা মতে ঠাকৰেই দলৰ আন এগৰাকী নেতাৰ জৰিয়তে সঞ্জয় ৰাউটক সাক্ষাতৰ বাবে আৰ্থাৰ ৰোড কাৰাগাৰ কৰ্তৃপক্ষৰ পৰা অনুমতি বিচাৰিছিল যদিও কৰ্তৃপক্ষই তেওঁৰ অনুৰোধ প্ৰত্যাখ্যান কৰে।
ঠাকৰেই সঞ্জয় ৰাউটৰ সৈতে জেইলাৰৰ কেবিনত এক বৈঠকত ভাগ লোৱাৰ ইচ্ছা প্ৰকাশ কৰিছিল যদিও কাৰাগাৰ কৰ্তৃপক্ষই এই বিষয়তো অনুমতি দিবলৈ অস্বীকাৰ কৰে। কৰ্তৃপক্ষই কয় যে বৈঠকৰ বাবে আদালতৰ পৰা অনুমতি বিচাৰিব লাগিব আৰু কাৰাগাৰৰ নিয়ম অনুসৰিহে বৈঠক সম্ভৱ হ’ব।
উল্লেখ্য যে পাত্ৰ চাওল ভূমি কেলেংকাৰীৰ গোচৰত অভিযুক্ত শিৱসেনাৰ সাংসদ সঞ্জয় ৰাউটক যোৱা ১ আগষ্টতে এনফ’ৰ্চমেণ্ট ডাইৰেক্টৰেটে(ইডি) উপনগৰীয় গোৰেগাঁৱত পাত্ৰ চাওলৰ পুনৰ্বিকাশত বিত্তীয় অনিয়মত জড়িত থকাৰ অভিযোগত গ্ৰেপ্তাৰ কৰিছিল।
যোৱা সোমবাৰে সাংসদগৰাকীৰ ন্যায়িক জিম্মাৰ ম্যাদ পুনৰ বৃদ্ধি কৰিছিল মুম্বাইৰ এখন বিশেষ আদালতে। আদালতে শিৱসেনাৰ নেতাগৰাকীক ১৯ ছেপ্টেম্বৰলৈকে ন্যায়িক জিম্মালৈ প্ৰেৰণ কৰিছিল।
ৰাউটৰ লগতে তেওঁৰ পত্নী আৰু আন কেইজনমান লোকৰ বিৰুদ্ধে পাত্ৰ চাওলৰ বিত্তীয় অনিয়মৰ অভিযোগ তুলি এনফ’ৰ্চমেণ্ট ডাইৰেক্টৰেটে অভিযান চলাইছিল।
