হাৰিয়ানাৰ ভীৱানী জিলাত বাহনসহ দুই মুছলমানক যুৱকক জীৱন্তে জ্বলাই কৰা হত্যাকাণ্ডৰ কেতবোৰ বিস্ফোৰক আৰু ন ন তথ্য পোহৰলৈ আহিছে। এইবাৰ চৰ্চালৈ আহিছে আন এক তথ্য। প্ৰকাশিত খবৰ অনুসৰি, এই লোমহৰ্ষক হত্যাকাণ্ডৰ অভিযুক্তৰ সৈতে হাৰিয়ানাৰ শীৰ্ষ আৰক্ষী বিষয়াৰ আছিল ঘণিষ্ঠ সম্পৰ্ক।
উল্লেখ্য, যোৱা সপ্তাহত ৰাজস্থানৰ বাসিন্দা জুনাইদ আৰু নাছিৰ নামৰ ৰাজস্থানৰ দুই মুছলমানক যুৱকক এখন বলেৰ’ বাহনৰ সৈতে জীৱন্তে জ্বলাই হত্যা কৰাৰ অভিযোগ উত্থাপন হৈছিল। হাৰিয়ানাৰ ভীৱানীত জ্বলি যোৱা ভস্মীভূত বলেৰ’ বাহনখনৰ সৈতে অগ্নিদগ্ধ দুটাকৈ মৃতদেহ উদ্ধাৰ হৈছিল।
এই ঘটনাত বজৰং দলৰ নেতা তথা কট্টৰ হিন্দুত্ববাদী নেতা মনু মানেছাৰ জড়িত থকাৰ অভিযোগ কৰিছে ভুক্তভোগী দুই যুৱকৰ পৰিয়ালৰ লগতে স্থানীয় লোকে। ভুক্তভোগী পৰিয়ালে এজাহাৰত অভিযুক্তসকলৰ নাম স্পষ্টভাৱে উল্লেখ কৰাৰ পাছতো আৰক্ষীয়ে কোনো ব্যৱস্থা নোলোৱাৰ গুৰুতৰ অভিযোগো উত্থাপন হৈ আহিছে।
ইয়াৰ পাছতে এই চাঞ্চল্যকৰ তথ্য পোহৰলৈ আহিছে। মূল অভিযুক্ত মনু মানেছাৰসহ অভিযুক্তসকলৰ হাৰিয়ানাৰ নুহ জিলাৰ শীৰ্ষ আৰক্ষী বিষয়াৰ সৈতে ঘণিষ্ঠ সম্পৰ্ক আছে। গো সৰবৰাহকাৰীৰ ওপৰত অভিযান চলোৱাৰ লগতে সন্দেহযুক্ত গৰু সৰবৰাহকাৰীৰ বিষয়ে আৰক্ষীক অৱগত কৰা আদি কামতো আৰক্ষীক সহযোগ কৰি আহিছে এই অভিযুক্তসকলে।
দ্য ইণ্ডিয়ান এক্সপ্ৰেছে প্ৰকাশ কৰা অনুসৰি যোৱা দুমাহত নুহৰ ফিৰোজপুৰ ঝিৰকা আৰু নগিনা থানাত দাখিল কৰা অতি কমেও চাৰিখন এফআইআৰত মনু মানেছাৰসহ ৰিংকু ছাইনী, লোকেশ চিংলা আৰু শ্ৰীকান্তক তথ্যদাতা হিচাপে উল্লেখ কৰা হৈছে।
জুনাইদ আৰু নাছিৰৰ হত্যাকাণ্ডৰ সন্দৰ্ভত আৰক্ষীক দিয়া এজাহাৰত এই ৰিংকু ছাইনী, লোকেশ চিংলা আৰু শ্ৰীকান্তৰ নামো উল্লেখ আছে। এই তিনিগৰাকী ব্যক্তিও গৰু সুৰক্ষা গোটৰ সদস্য। বজৰং দলৰ জিলা পৰ্যায়ৰ নেতা মনু মানেছাৰৰ নামো এই তালিকাত সন্নিবিষ্ট কৰা হৈছে, যিজনক মূল অভিযুক্ত বুলি কোৱা হৈছে।
মনু মানেছাৰ বজৰং দলৰ সদস্য তথা গুৰগাঁৱৰ হাৰিয়ানা চৰকাৰৰ গৰু সুৰক্ষা টাস্ক ফ’ৰ্চৰ মুখীয়াল। সোমবাৰে ৰাজস্থান আৰক্ষীয়ে নাম উল্লেখ কৰাসকলৰ তালিকাত আৰু ৮ গৰাকী অভিযুক্তৰ নামো সন্নিৱিষ্ট কৰিছে।
