মধ্যপ্ৰদেশৰ গোৱালিয়ৰত এক অত্যন্ত আচৰিত ঘটনা সংঘটিত হৈছে যিয়ে চিনেমাৰ কাহিনীকো চেৰ পেলাইছে। দুই ভনীয়ে নিজৰ মাজতে স্বামী সলনি কৰিবলৈ বিচাৰি আদালতৰ কাষ চপা ঘটনাই সকলোকে স্তম্ভিত কৰি তুলিছে। মধ্যপ্ৰদেশৰ দাতিয়া জিলাৰ এই অদ্ভুত ঘটনাই এতিয়া সমগ্ৰ দেশতে চৰ্চা লাভ কৰিছে। আনকি আদালতৰ অভিজ্ঞ অধিবক্তাসকলো এই কাণ্ড দেখি আচৰিত হৈ পৰিছে।
এই ঘটনাৰ আৰম্ভণি হৈছিল গিৰিজা শংকৰ নামৰ এজন ব্যক্তিৰ এক আবেদনক কেন্দ্ৰ কৰি। গিৰিজাই অভিযোগ কৰিছিল যে মায়াৰাম নামৰ এজন ব্যক্তিয়ে তেওঁৰ পত্নী আৰু কন্যাক অপহৰণ কৰিছে। আদালতৰ নিৰ্দেশত যেতিয়া গিৰিজাৰ পত্নী বিচাৰপতিৰ সন্মুখত হাজিৰ হ‘ল, তেতিয়া ঘটনাটোৱে এক নতুন মোৰ ল’লে। মহিলাগৰাকীয়ে স্পষ্টকৈ জনালে যে তেওঁক কোনেও অপহৰণ কৰা নাই, বৰঞ্চ তেওঁ নিজৰ ইচ্ছাতে মায়াৰামৰ ওচৰলৈ গৈছে আৰু তেওঁৰ সৈতেহে সংসাৰ কৰিব বিচাৰে।
আচলতে গিৰিজা শংকৰ আৰু মায়াৰাম হ‘ল সম্পৰ্কত শালপতি, অৰ্থাৎ তেওঁলোকে একে পৰিয়ালৰ দুই ভগ্নীক বিয়া কৰাইছে। গিৰিজাৰ পত্নীয়ে আদালতক জনালে যে তেওঁ ইতিমধ্যে গিৰিজাৰ পৰা বিবাহ বিচ্ছেদ বিচাৰিছে আৰু তেওঁ এতিয়া মায়াৰামৰ লগতহে থাকিব। এনে পৰিস্থিতিত মায়াৰামৰ পত্নী অৰ্থাৎ সৰু ভনীয়েকগৰাকীয়ে প্ৰতিবাদ কৰিব বুলি সকলোৱে ভাবিছিল যদিও তেওঁৰ উত্তৰেহে সকলোকে বেছি আচৰিত কৰিলে।
সৰু ভনীয়েকগৰাকীয়ে আদালতত ক‘লে যে বায়েকে যদি তেওঁৰ স্বামীৰ লগত থাকিব বিচাৰে তেন্তে তেওঁৰ কোনো আপত্তি নাই। কিন্তু তাৰ বিনিময়ত তেওঁৰো এটা চৰ্ত আছে। সৰু ভনীয়েকৰ চৰ্তটো হ’ল তেওঁ এতিয়াৰ পৰা তেওঁৰ বায়েকৰ স্বামী গিৰিজা শংকৰৰ সৈতেহে থাকিব আৰু তেওঁৰ লগতে সংসাৰ কৰিব। দুই ভনীয়ে আদালতৰ আগত মুকলিকৈ স্বীকাৰ কৰে যে তেওঁলোক কোনেও নিজৰ বিবাহিত জীৱনত সুখী নহয়। সেয়েহে তেওঁলোকে আপোচ কৰি নিজৰ স্বামী অদলবদল কৰি নতুনকৈ জীৱন আৰম্ভ কৰিব বিচাৰিছে।
দুই প্রাপ্তবয়স্ক ভনীৰ এনে কথা শুনি আদালতৰ বিচাৰপতিও কিং কৰ্তব্য বিমূঢ় হৈ পৰে। মধ্যপ্ৰদেশ উচ্চ ন্যায়ালয়ে স্পষ্ট কৰি দিয়ে যে এইটো কোনো অপহৰণৰ গোচৰ নহয়, বৰঞ্চ এটা পৰিয়ালৰ আভ্যন্তৰীণ বিবাদহে। যিহেতু দুইগৰাকী মহিলাই প্রাপ্তবয়স্ক আৰু নিজৰ ভাল-বেয়া সিদ্ধান্ত নিজে ল’বলৈ সক্ষম, সেয়েহে আদালতে এই আবেদনখন খাৰিজ কৰি দিয়ে। এই ঘটনাই এতিয়া সামাজিক স্তৰত ব্যাপক চৰ্চা আৰু বিতৰ্কৰ সৃষ্টি কৰিছে।
