সামৰিক জুণ্টা প্ৰশাসনৰ বিৰুদ্ধে ম্যানমাৰত অব্যাহত আছে ব্যাপক প্ৰতিবাদ।
সেনাৰ গুলীত আহত কিশোৰী এগৰাকীয়ে বৃহস্পতিবাৰে মৃত্যুক সাৱটি লোৱাৰ পিছত দেশ খনত পুনৰ দুজন প্ৰতিবাদকাৰী সেনাৰ গুলীত নিহত হোৱাৰ খবৰ পোৱা গৈছে।
ম্যানমাৰৰ জৰুৰীকালিন উদ্ধাৰকাৰী দলৰ মুৰব্বী হ্লাইং মিন য়ুয়ে প্ৰকাশ কৰা তথ্য অনুসৰি মান্দালয় চহৰত সেনাৰ গুলীত নিহত হৈছে দুজনকৈ প্ৰতিবাদকাৰী।
নিহত প্ৰতিবাদকাৰীদুজনৰ মাজত এজন নাবালক থকা বুলিও তেওঁ প্ৰকাশ কৰিছে। সেনাই নিক্ষেপ কৰা ৰাবাৰ বুলেটৰ আঘাতত তেওঁলোকৰ মৃত্যু ঘটা বুলি সন্দেহ কৰা হৈছে যদিও বহুতে সেনাই সঁচা বুলেট নিক্ষেপ কৰা বুলি অভিযোগ কৰিছে।
ইয়াকেলৈ ম্যানমাৰত সামৰিক শাসকৰ বিৰুদ্ধে প্ৰতিবাদ কৰিবলৈ গৈ মৃত্যু ঘটা প্ৰতিবাদকাৰীৰ সংখ্যা তিনিগৰাকী হ’লগৈ। সামৰিক শাসকে আজি পৰ্যন্ত দেশ খনত ইণ্টাৰনেট সেৱা বন্ধ কৰি ৰাখিছে।
উল্লেখ্য ম্যানমাৰৰ সামৰিক শাসকৰ বিৰুদ্ধে প্ৰতিবাদ কৰিবলৈ গৈ বৃহস্পতিবাৰে কৰুণ মৃত্যুক সাৱটি লৈছিল এগৰাকী কিশোৰীয়ে।
যোৱা ৯ ফেব্ৰুৱাৰীত ম্যানমাৰৰ ৰাজধানী নাই পি টাওত প্ৰতিবাদী সমদলত ভাগ লৈছিল ১৯ বছৰীয়া মিয়া থে থে খাইং নামৰ কিশোৰীগৰাকীয়ে।
শান্তিপূৰ্ণ ভাবে প্ৰতিবাদ সাৱ্যস্ত কৰা প্ৰতিবাদকাৰীৰ ওপৰত জঁপিয়াই পৰিছিল ম্যানমাৰৰ সেনা।
সেনাই নিক্ষেপ কৰা গুলীয়ে আঘাত কৰিছিল কিশোৰীগৰাকীৰ মূৰত । লগে লগে তেওঁ ঢলি পৰিছিল আৰু ততাতৈয়াকৈ তেওঁক ভৰ্তি কৰোৱা হৈছিল নাই পি টাওৰ ১০০০ খন বিচনাযুক্ত চিকিৎসালয়ত।
মূৰত গুলী লগা কিশোৰীগৰাকীক বচাবলৈ চিকিৎসকে প্ৰাণপণে চেষ্টা চলাইছিল যদিও তেওঁৰ ব্ৰেইন ডেথ হৈছিল আৰু বৃহস্পতিবাৰে চিকিৎসকে তেওঁৰ মৃত্যু ঘটা বুলি আনুষ্ঠানিক ভাবে ঘোষণা কৰিছিল।
তিনিগৰাকীকৈ প্ৰতিবাদকাৰীৰ মৃত্যুৰ খবৰে সেনাৰ বিৰুদ্ধে প্ৰতিবাদ অব্যাহত ৰখা প্ৰতিবাদকাৰীসকলক অধিক উত্তেজিত কৰি তোলা পৰিলক্ষিত হৈছে।
প্ৰতিদিনে দেশ খনৰ ৰাজধানী নাইফিদাও, য়াংগুন আদিৰ লগতে আন প্ৰধান চহৰ সমূহৰ ৰাজপথলৈ ওলাই অহা প্ৰতিবাদকাৰীসকলে সেনাই আটক কৰি ৰখা গণতন্ত্ৰকামী নেত্ৰী আং চান ছ্যুকীৰ মুক্তি দাবী কৰাৰ লগতে দেশত খনত পুনৰ গণতন্ত্ৰৰ শাসন প্ৰতিষ্ঠাৰ দাবী জনাই আহিছে।
উল্লেখ্য ২০০৭ চনত ম্যানমাৰৰ বৌদ্ধ ভিক্ষুসকলৰ নেতৃত্বত সংগঠিত হোৱা গেৰুৱা বিপ্লৱৰ পিছত উক্ত দিনটোতে অভিলেখ সংখ্যক লোকে ৰাজপথলৈ ওলাই আহি সামৰিক শাসকৰ বিৰুদ্ধে প্ৰতিবাদ সাৱস্ত্য কৰি আহিছে।
যোৱা ১ ফেব্ৰুৱাৰীত সামৰিক শাসকে ম্যানমাৰত বলপূৰ্বক ক্ষমতা হস্তগত কৰি এবছৰৰ বাবে জৰুৰীকালিন অৱস্থা ঘোষণা কৰিছিল।
