পৰিয়াল, চুবুৰীয়াৰ পৰা পৰিত্যক্ত গণেশ লোহাৰ নামৰ দৰিদ্ৰ লোক এজনে উপায়হীন হৈ মৃত পত্নীৰ দেহ নাদত পেলাই দিয়াৰ এক ঘটনাই চাঞ্চল্যৰ সৃষ্টি কৰিছে নগাঁৱৰ চামগুৰিত।
দেওবাৰে পুৱাই পত্নী মাইনু এক্কাৰ মৃত্যু হোৱাৰ পাছত সোমবাৰে বিয়লি পৰ্য্যন্ত কোনো লোক সৎকাৰৰ বাবে আগবাঢ়ি নহাত লোহাৰে সন্ধিয়া মৃতদেহটো ঘৰৰ বাৰীৰ নাদত পুতি পেলায়।
খৰি-খেৰ গোটোৱাকে ধৰি অন্ত্যেষ্টিক্ৰিয়াৰ যাৱতীয় যোগাৰত সহযোগিতা কৰাৰ সলনি ২০হাজাৰ টকাহে বিচাৰে পৰিয়ালে, লোহাৰৰ মন্তব্য।
ঘটনাটো পোহৰলৈ অহাৰ পাছত স্থানীয় গাওঁবুঢ়াই আৰক্ষীক খবৰ দিয়াত উচ্চপদস্থ বিষয়াসহ আৰক্ষী-অৰ্ধ সামৰিক বাহিনী ঘটনাস্থলীত উপস্থিত হৈ মৃতদেহটো মৰণোত্তৰ পৰীক্ষাৰ বাবে নগাঁও ভোগেশ্বৰী ফুকননী অসামৰিক চিকিৎসালয়লৈ প্ৰেৰণ কৰে।
মহিলাগৰাকী দীৰ্ঘদিন ধৰি শাৰীৰিক অসুস্থতাত ভুগি আছিল। মৰণোত্তৰ পৰীক্ষাৰ অন্ততহে মৃত্যুৰ কাৰণ সন্দৰ্ভত নিশ্চিত হ’ব পৰা যাব বুলি মন্তব্য কৰিছে আৰক্ষীয়ে।
