১২ মে’ত দেশবাসীক সম্বোধন কৰি প্ৰধান মন্ত্ৰী নৰেন্দ্ৰ মোদীয়ে ২০ লাখ কোটি টকাৰ অৰ্থনৈতিক পেকেজ ঘোষণা কৰিছিল। প্ৰধান মন্ত্ৰীৰ ঘোষণাৰ পাছতে কেন্দ্ৰীয় বিত্ত মন্ত্ৰী নিৰ্মলা সীতাৰমণে এই ধন কেনেধৰণে ব্যৱহাৰ কৰা হ’ব এই সম্পৰ্কে বিস্তৃত বিবৰণ দাঙি ধৰিছিল।
বিত্তমন্ত্ৰীৰ সংবাদমেলৰ পাছতে ইয়াক কেন্দ্ৰ কৰি সৰৱ হৈ পৰিছে নগাঁৱৰ কংগ্ৰেছী সাংসদ প্ৰদ্যুত বৰদলৈ।
‘‘প্ৰধান মন্ত্ৰী নৰেন্দ্ৰ মোদীয়ে এনে সময়ত ঘোষণা কৰিলে যে ইনজেক্সন দি ভাৰতীয় অৰ্থনীতিত ২০ লাখ কোটি টকা সুমুৱাই দিব যাতে অৰ্থনীতিটো পুনৰ জীৱিত হৈ উঠে কিন্তু সেই ধন কেনেকৈ খৰচ কৰিব তাৰ বাখ্যা কেন্দ্ৰীয় বিত্ত মন্ত্ৰীয়েও দাঙি ধৰিলে তেতিয়া আচল কথা ওলাই পৰিল যে সাধাৰণ লোকৰ মাজলৈ এই ২০ লাখ কোটি টকা অহাৰ কোনো ৰাস্তা নায়,’’ নৰ্থ-ইষ্ট নাওলৈ প্ৰেৰণ কৰা এক ভিডিঅ’ত সাংসদ গৰাকীয়ে কয়।
‘‘এই ২০ লাখ কোটি টকা চৰকাৰে ঋণ হিচাপে ক্ষুদ্ৰ উদ্যোগ বা ব্যৱসায় চলাবৰ বাবে ঋণ হিচাপে দিব। ঋণ হিচাপে দিয়াটো আদৰণি জনাইছো কিন্তু যি ১৩ কোটি পৰিয়াল আছে সেই পৰিয়ালৰ হাতত নগদ ধন দিয়াৰ ব্যৱস্থা চৰকাৰে কৰা হ’লে ভাৰতীয় অৰ্থনীতি পুনৰজ্জীৱিত হ’লহেঁতেন,’’ বৰদলৈয়ে লগতে কয়।
সাংসদ গৰাকীৰ মতে, কল-কাৰখানাসমূহে পুনৰ তেওঁলোকৰ উৎপাদন যিকোনো প্ৰকাৰে আৰম্ভ কৰিবই কিন্তু সেইবোৰ ক্ৰয় কৰিবৰ কাৰণে সাধাৰণ মানুহৰ হাতত পইচা-পাতিৰ দৰকাৰ হ’ব। এই সময়ত জনসাধাৰণে ৰেফ্ৰিজেৰেটৰ, গাড়ী, এচি এইবোৰ ক্ৰয় নকৰে, মাত্ৰ চাউল-দাইলকে ধৰি অন্যান্য অত্যাৱশ্যকীয় সামগ্ৰী ক্ৰয় কৰিব।’’
তাৎপৰ্য্যপূৰ্ণভাৱে, মোদীয়ে ঘোষণা কৰা আৰ্থিক পেকেজৰ ধন পোনপটীয়াকৈ ভাৰতৰ সাধাৰণ লোকৰ একাউন্টত জমা কৰাহেঁতেন তেওঁলোক বেছিকৈ উপকৃত হ’লহেঁতেন বুলি দাবী কৰে নগাঁৱৰ সাংসদ গৰাকীয়ে।
‘‘আমি আশা কৰিছিলো চৰকাৰে সাধাৰণ লোকৰ বেংক একাউন্টত প্ৰতক্ষ্যভাৱে কমেও ৭৫০০ টকাকৈ জমা কৰি দিব। ১৩ কোটি জনতাক যদি ৭৫০০ টকাকৈ জমা কৰি দিয়ে তেন্তে চৰকাৰখনৰ খৰচ হ’ব মাথো ১ লাখ কোটি টকা। এই ধন জমা কৰি দিয়াহেঁতেন সাধাৰণ মানুহৰ জীৱন চন্দময় হৈ উঠিলহেঁতেন,’’ প্ৰদ্যুত বৰদলৈয়ে লগতে কয়।
এই চৰকাৰখনে ডাঙৰ ডাঙৰ উদ্যোগপতিৰ ঋণ মাফ কৰি দিলে কিন্তু ক্ষুদ্ৰ উদ্যোগৰ ঋণ মাফ কৰি নিদিলে বুলি সমালোচনা কৰি এই ২০ লাখ কোটি টকা শুনিবলৈ ডাঙৰ যেন লাগিলেও ভাৰতীয় অৰ্থনীতিলৈ যে পোহৰ আহিব সেই কথা সুদূৰ পৰাহত যেন লাগিছে বুলিও কটাক্ষ কৰে।
বৰদলৈৰ মতে ভাৰতীয় অৰ্থনৈতিক ব্যৱস্থা ত্ৰিভুজৰ দৰে। একেবাৰে ওপৰত থাকে আনম্বানী -আদানীৰ দৰে ঐশ্বৰ্য্যশালী ব্যক্তি। কিন্তু ত্ৰিভুজটোৰ একেবাৰে তলত অৱস্থান গ্ৰহণ কৰা কোটি কোটি কৃষক শ্ৰমিক বা খাটি খোৱা মানুহ আৰু মধ্যবিত্ত লোকসকল। এনেকুৱা ১৩ কোটি পৰিয়ালৰ দৈনন্দিন জীৱন যাত্ৰাত এক ডাঙৰ প্ৰত্যাহ্বান আহি পৰিছে।
