নগাঁও চহৰৰ নিকটৱৰ্তী ননৈৰ চাঞ্চল্যকৰ হত্যাকাণ্ডৰ তিনি মূল অভিযুক্ত নগাঁও আৰক্ষীৰ জালত পৰিছে। শনিবাৰে নগাঁও আৰক্ষীয়ে এই হত্যাকাণ্ডৰ লগত জড়িত তিনিজনক আটক কৰিছে। নগাঁও আৰক্ষীৰ এইটো এক বৃহৎ সাফল্য হিচাপে পৰিগণিত হৈছে।
উল্লেখ্য যে, যোৱা ২২ অক্টোবৰৰ সন্ধ্যা ননৈ খাটৰগাঁৱৰ নিজগৃহত প্ৰাক্তন সেনা জোৱান দীপেন নাথক গুলীয়াই হত্যা কৰা হৈছিল। ইতিমধ্যে, আৰক্ষীয়ে হত্যাকাণ্ডত জড়িত প্ৰণৱ নাথ, ৰাজীৱ বণিক আৰু চুলতান আলীক গ্ৰেপ্তাৰ কৰিছে।
জানিব পৰা মতে, দুৰ্ধৰ্ষ চুপাৰী কিলাৰ ৰাজীৱ বণিকে শূন্য দূৰত্বৰ পৰা গুলীয়াইছিল দীপেন নাথক। প্ৰণৱ নাথে ব্যৱসায়িক কথা-বতৰাৰ চলৰে মাতি নিছিল নিহত দীপেন নাথক। কুখ্যাত ডকাইত চুলতান আলীৰ বাইকত পলায়ন কৰিছিল ৰাজীৱ বণিক আৰু প্ৰণৱ নাথে।
আনহাতে, হত্যাকাণ্ড সংঘটিত হোৱাৰ পিছদিনাই নগাঁও আৰক্ষী অধীক্ষক শংকৰব্ৰত ৰায়মেধিৰ নেতৃত্বত যোৱা এটা দলে গ্ৰেপ্তাৰ কৰিছিল প্ৰণৱ নাথক। প্ৰণৱ নাথৰ স্বীকাৰোক্তিৰ ভিত্তিত শনিবাৰে দিনৰ ১১ বজাত ৰহা কাকতি গাঁৱৰ পৰা ৰহাৰ ভাৰপ্ৰাপ্ত বিষয়া মলয় আচাৰ্জীয়ে দুৰ্ধৰ্ষ অপৰাধী ৰাজীৱ বণিকক গ্ৰেপ্তাৰ কৰে।
সেইদৰে, ৰাজীৱ বণিকৰ স্বীকাৰোক্তিৰ ভিত্তিত নগাঁৱৰ অতিৰিক্ত আৰক্ষী অধীক্ষক ৰিপুল দাসৰ নেতৃত্বত অসামৰিক পোছাকত যোৱা আৰক্ষীৰ এটা দলে দিনৰ ২ বজাত নগাঁও বাইপাছৰ সুগন্ধি ধাবাৰ পৰা চুলতান আলীক গ্ৰেপ্তাৰ কৰে।
ইতিমধ্যে, নগাঁৱৰ উপ আৰক্ষী অধীক্ষক জন দাস, পদ্ম পেগু আৰু ৰহাৰ ভাৰপ্ৰাপ্ত বিষয়া মলয় আচাৰ্জীৰ নেতৃত্বত যোৱা এটা দলে বাক্সাৰ তামুলপুৰৰ পৰা হত্যাকাণ্ডত ব্যৱহৃত পিষ্টল আৰু পালচাৰ বাইকখন জব্দ কৰিছে।
উল্লেখযোগ্য যে, ৰাজীৱ বণিক বিভিন্ন কূটাঘাতমূলক কামত জড়িত হৈ আছিল আৰু মাজে-সময়ে গোটেই নগাঁও জিলাতে ত্ৰাসৰ সৃষ্টি কৰি আহিছিল।