ৰাজধানী উইণ্ডহ’কত খেলিবলৈ নামিছিল নামিবিয়া। তাতেই তেওঁলোকে ইতিহাস ৰচনা কৰিলে। দক্ষিণ-পশ্চিম আফ্ৰিকাৰ দেশখনে ত্ৰিদেশীয় শৃংখলাৰ প্ৰথমখন মেচত টেষ্টৰ বিশ্ব চেম্পিয়ন দক্ষিণ আফ্ৰিকাক ১৮ ৰাণত পৰাস্ত কৰি চমক দেখুৱালে। যোৱা বছৰ অক্টোবৰ মাহত এই উইণ্ডহ’কতেই নামিবিয়াই প্ৰটিয়াছক পৰাস্ত কৰিছিল। ফলত দক্ষিণ আফ্ৰিকাৰ বিৰুদ্ধে একেৰাহে দুখন টি-২০ত জয়লাভ কৰিলে ‘ইগলছ’য়ে।
টছত পৰাস্ত হোৱাৰ পিছত নামিবিয়াই প্ৰথমে বেটিং কৰিবলৈ নামি ১৬৩/৯ ৰান কৰে। ইয়াৰ উত্তৰত দক্ষিণ আফ্ৰিকাই ৯ উইকেটত ১৪৫ ৰানতে স্তব্ধ হৈ পৰে। লৰেন ষ্টিনকেম্প আৰু জান ফ্ৰেইলিঙে নামিবিয়াৰ ইনিংছৰ ভেটি গঢ়ি তোলে। দুয়োগৰাকী অ’পেনাৰে ৮৪ ৰানৰ পাৰ্টনাৰশ্বিপ গঢ়ে। ষ্টীনকেম্পে ২৯টা বলত ৪১ ৰান সংগ্ৰহ কৰে। ফ্ৰেইলিংক আৰু অধিক আক্ৰমণাত্মক আছিল। তেওঁ ৩৮টা বলত ৬০ ৰান সংগ্ৰহ কৰে। তেওঁৰ ইনিংছত ৬টা চাৰি আৰু দুটা ছয় আছিল।
এটা সময়ত নামিবিয়াই ২০০ ৰানত উপনীত হোৱা যেন লাগিছিল। তেওঁলোকে ১৪ অভাৰত ২ উইকেটত ১২৩ ৰান কৰিছিল। অৱশ্যে প্ৰটিয়াছৰ বলাৰৰ বাবে সেয়া হৈ নুঠিল। শ্লগ অভাৰত নামিবিয়াই কঠিন বলিঙৰ বাবে মাত্ৰ ৪০ ৰানত শেষৰ ৮টা উইকেট হেৰুৱাইছিল। দক্ষিণ আফ্ৰিকাৰ হৈ প্ৰেনেলান সুব্ৰমণিয়ামে ৩২ ৰানত ৩ টা উইকেট দখল কৰে। অধিনায়ক ব’ৰ্ন ফৰ্টুয়েনে ১৭ ৰানত ২ টা উইকেট লয়।
ৰানৰ লক্ষ্য অনুসৰণ কৰি দক্ষিণ আফ্ৰিকাই আৰম্ভণিৰে পৰাই নিজকে বিপদত পেলাইছিল। নামিবিয়াৰ বলাৰসকলে নিয়মীয়াকৈ উইকেট লৈ প্ৰটিয়াছৰ ওপৰত চাপ বৃদ্ধি কৰে। ৰুবেন ট্ৰাম্পেলমেনে ২৪ ৰানত ৩ টা উইকেট দখল কৰে। ডেৱাল্ড ব্ৰেভিছও তেওঁৰ চিকাৰ হয়। জনাথন স্মিথেও ৩টা উইকেট দখল কৰে।
দক্ষিণ আফ্ৰিকৰ হৈ ব্ৰেভিছে অকলে যুঁজ দিছিল। ৫০টা বলত ৭৫ ৰান সংগ্ৰহ কৰা তেওঁৰ বিস্ফোৰক ইনিংছত আছিল চাৰিটা চাৰি আৰু ৫টা ছয়। ১৮ নং অভাৰত ব্ৰেভিছ আউট হোৱাৰ লগে লগে যেন প্ৰটিয়াছে পৰিণতি দেখা পায়। শেষত ডুৱেন জান্সেনে ১৭টা বলত অপৰাজিত ২৫ ৰান কৰাৰ পিছতো দলটো জয়ৰ ওচৰ চাপিব নোৱাৰিলে।
অৱশ্যে নামিবিয়াৰ জয়ৰ সমান্তৰালকৈ মেচখনৰ সম্প্ৰচাৰ বিভ্ৰাটেও বাতৰিৰ শিৰোনাম দখল কৰিছিল। ছবিৰ মানদণ্ড বেয়া হোৱাৰ বাবে ছুপাৰস্প’ৰ্টে সম্প্ৰচাৰ বন্ধ কৰিবলৈ বাধ্য হৈছিল।
প্ৰটিয়াছ মেনে এক বিবৃতিত কয়,“আজিৰ টি-২০ মেচখনৰ সম্প্ৰচাৰ বন্ধ কৰিবলগীয়া হৈছিল কাৰণ খেল প্ৰাংগণৰ পৰা অহা ছবিৰ মানদণ্ড অতি বেয়া আছিল।” তেওঁলোকে লগতে দৰ্শকৰ অসুবিধাৰ বাবে ক্ষমা বিচাৰে।
২০২৭চনৰ এদিনীয়া বিশ্বকাপৰ আয়োজক দক্ষিণ আফ্ৰিকা, জিম্বাবুৱে আৰু নামিবিয়া। মন কৰিবলগীয়া যে লীগৰ ছয়খন মেচ আৰু এই ত্ৰিদেশীয় ছিৰিজৰ ফাইনেলখন উইণ্ডহ’কতে অনুষ্ঠিত হ’ব। ফলত তাত থকা আন্তঃগাঁথনি আৰু সম্প্ৰচাৰ ব্যৱস্থাৰ ওপৰত দৃষ্টি ৰাখিছে ক্ৰিকেট বিশ্বই। নামিবিয়াই তাতেই মহাশক্তিধৰ দক্ষিণ আফ্ৰিকাক পৰাস্ত কৰি বিশ্বক স্তম্ভিত কৰি তুলিছে।
