প্ৰধানমন্ত্ৰী নৰেন্দ্ৰ মোদীয়ে আজি ইতিহাস ৰচনা কৰিলে। তেওঁ ভাৰতৰ প্ৰথমগৰাকী নিৰ্বাচিত প্ৰধানমন্ত্ৰী জৱাহৰলাল নেহৰুৰ পুৰণি অভিলেখ ভংগ কৰি প্ৰধানমন্ত্ৰী হিচাপে চাৰি হাজাৰ তিনিশ নিৰান্নব্বৈ দিন অতিক্ৰম কৰিলে। প্ৰধানমন্ত্ৰী হিচাপে পণ্ডিত নেহৰুৰ কাৰ্যকাল আছিল চাৰি হাজাৰ তিনিশ আঠান্নব্বৈ দিনৰ। এতিয়া নৰেন্দ্ৰ মোদীয়ে ভাৰতৰ আটাইতকৈ বেছি সময় ধৰি প্ৰধানমন্ত্ৰী পদত থকাৰ অভিলেখ নিজৰ নামত কৰি লৈছে। এই অভিলেখৰ বাবে তেওঁ দেশ আৰু বিদেশৰ পৰা অভিনন্দন লাভ কৰিছে। এতিয়া ইটালীৰ প্ৰধানমন্ত্ৰী জৰ্জিয়া মেলোনীয়েও প্ৰধানমন্ত্ৰী মোদীক অভিনন্দন জনাইছে।
সামাজিক মাধ্যমত প্ৰধানমন্ত্ৰী মোদীৰ সৈতে এখন আলোকচিত্ৰ প্ৰকাশ কৰি মেলোনীয়ে লিখিছে যে আজি ভাৰতৰ ইতিহাসত সৰ্বাধিক সময়ৰ বাবে নিৰ্বাচিত প্ৰধানমন্ত্ৰী হোৱাৰ বাবে নৰেন্দ্ৰ মোদীক অভিনন্দন জনাইছোঁ। শেহতীয়াকৈ ৰোম চহৰত তেওঁক পুনৰ সাক্ষাৎ কৰিবলৈ পোৱা আৰু একেলগে এক বিশেষ কৌশলগত অংশীদাৰিত্ব আৰম্ভ কৰিবলৈ পোৱাটো এক আনন্দৰ বিষয়। এই অংশীদাৰিত্ব ভৱিষ্যতৰ প্ৰতি লক্ষ্য ৰাখি আমাৰ দুয়োখন দেশ আৰু জনসাধাৰণৰ বাবে নতুন সুযোগ সৃষ্টি কৰাৰ ওপৰত কেন্দ্ৰীভূত।
মে মাহত প্ৰধানমন্ত্ৰী মোদীয়ে পাঁচখন দেশ ভ্ৰমণৰ অন্তিম পৰ্যায়ত উনৈশ মে তাৰিখে ইটালীৰ ৰাজধানী ৰোমত উপস্থিত হৈছিল। ৰোমত ইটালীৰ প্ৰধানমন্ত্ৰী মেলোনীয়ে তেওঁক আড়ম্বৰপূৰ্ণ আদৰণি জনাইছিল। এই সময়ছোৱাত প্ৰধানমন্ত্ৰী মোদীৰ বাবে বিশেষ নৈশভোজৰো আয়োজন কৰা হৈছিল। দুয়োগৰাকী নেতাই দ্বিপাক্ষিক বৈঠকত মিলিত হৈ ভাৰত আৰু ইটালীৰ মাজৰ সম্পৰ্ক অধিক সুদৃঢ় কৰাৰ ওপৰত গুৰুত্ব আৰোপ কৰিছিল। প্ৰধানমন্ত্ৰী মোদী আৰু মেলোনীয়ে দুয়োখন দেশৰ মাজত এক বিশেষ কৌশলগত অংশীদাৰিত্বৰো শুভাৰম্ভ কৰিছিল, যাৰ ফলত দুয়োখন দেশৰ সম্পৰ্ক অধিক শক্তিশালী হ’ব। ইয়াৰ উপৰিও প্ৰতিৰক্ষা উদ্যোগৰ ৰূপৰেখা, ব্যৱসায় বৃদ্ধি, স্বচ্ছ শক্তি, প্ৰযুক্তিবিদ্যা, কৃত্ৰিম বুদ্ধিমত্তা আৰু নিৰাপত্তা সহযোগিতাৰ ক্ষেত্ৰতো দুয়োপক্ষৰ মাজত গুৰুত্বপূৰ্ণ চুক্তি স্বাক্ষৰিত হৈছিল। প্ৰধানমন্ত্ৰী মোদী আৰু মেলোনীয়ে একেলগে ক’ল’ছিয়াম দৰ্শন কৰাৰ লগতে তাত ঘূৰি ফুৰিছিল। দুয়োগৰাকী নেতাই মটৰগাড়ীৰে ভ্ৰমণ কৰাৰ উপৰিও একেলগে নিজৰ আলোকচিত্ৰ তুলিছিল আৰু গণতন্ত্ৰৰ মূল্যবোধ তথা ভৱিষ্যতৰ প্ৰতি থকা উমৈহতীয়া দৃষ্টিভংগীৰ বিষয়ে আলোচনা কৰিছিল।
