যদি সকলো ঠিকে থাকে তেন্তে ভাৰতৰ গ্ৰুপ কেপ্তেইন সুভাংশু শুক্লাই আন্তঃৰাষ্ট্ৰীয় মহাকাশ কেন্দ্ৰ (আই এছ এছ)ত ভৰি দিব।
আমেৰিকাৰ মহাকাশ সংস্থা নাছাই এই সিদ্ধান্ত গ্ৰহণ কৰিছে। শুকুৰবাৰে ভাৰতীয় মহাকাশ গৱেষণা সংস্থাই এক বিবৃতিত এই কথা প্ৰকাশ কৰিছে। এই সন্দৰ্ভত আগষ্ট মাহৰ প্ৰথম সপ্তাহৰ পৰা আৰম্ভ হ’বলৈ গৈ আছে প্ৰশিক্ষণ।
বিবৃতিটোত কোৱা হৈছে যে ইছৰোৰ হিউমেন স্পেচ ফ্লাইট চেণ্টাৰে এক্সিয়াম-৪ মিছনৰ বাবে আমেৰিকাৰ এক্সিয়াম স্পেচৰ সৈতে স্পেচ ফ্লাইট এগ্ৰিমেণ্ট (এছএফএ)ত স্বাক্ষৰ কৰিছে। সেই অভিযানৰ পাইলট হিচাপে শুক্লাক নিৰ্বাচিত কৰা হৈছিল। বেকআপ মিছনৰ পাইলট হ’ব গ্ৰুপৰ কেপ্তেইন প্ৰশান্ত বালকৃষ্ণণ নায়ৰ।
আমেৰিকাৰ পেগী হুইটছনেও এই অভিযানৰ অধিনায়ক হ’ব, আৰু পোলেণ্ডৰ ছাউজ উজানস্কি আৰু হাংগেৰীৰ টিব’ৰ কাপু মিছন বিশেষজ্ঞ হ’ব।
সুভাংশুৰ জন্ম হৈছিল লক্ষ্ণৌত। শুক্লাৰ জ্যেষ্ঠ ভগ্নীয়ে সংবাদ সংস্থাটোক জনাইছে যে কাৰ্গিল যুদ্ধৰ সময়ত সুভাংশুৰ বয়স আছিল মাত্ৰ ১৪ বছৰ। সেই সময়ৰ ভাৰতীয় জোৱানৰ বীৰ কাহিনী পঢ়ি তেওঁ দেশৰ সশস্ত্ৰ বাহিনীত যোগদান কৰিবলৈ অনুপ্ৰাণিত হৈছিল। সেই ভিত্তিতে তেওঁক নেশ্যনেল ডিফেন্স একাডেমীত ভৰ্তি কৰা হৈছিল।
জানিব পৰা মতে যোৱা বছৰ গগণযান অভিযানৰ বাবে বায়ুসেনাৰ চাৰিজন টেষ্ট পাইলট নিৰ্বাচিত হৈছিল আৰু তেওঁলোকে বাংগালুৰুত প্ৰাৰম্ভিক প্ৰশিক্ষণ গ্ৰহণ কৰিছিল।
