মহাৰাষ্ট্ৰৰ নাছিক কুম্ভ মেলাৰ বাবে ধাৰ্য কৰা বাজেটৰ মাত্ৰ ০.১ শতাংশ ব্যয় কৰা হ’লে ৰাজ্যখনত বন্ধ হৈ যোৱা ১০০ৰ পৰা ১২৫ খন মাৰাঠী মাধ্যমৰ বিদ্যালয় ৰক্ষা কৰিব পৰা গ’লহেঁতেন। উচ্চতম ন্যায়ালয়ৰ ন্যায়াধীশ প্ৰসন্ন বি বৰালেয়ে এই গুৰুত্বপূৰ্ণ মন্তব্য কৰিছে। মহাৰাষ্ট্ৰৰ ধুলে জিলাৰ এখন উচ্চ বিদ্যালয়ত ‘স্মাৰ্ট ক্লাছ’ উদ্বোধন কৰি তেওঁ শিক্ষা খণ্ডৰ পুতৌজনক অৱস্থা আৰু ক্ৰমান্বয়ে হ্ৰাস পাই অহা শিক্ষা বাজেটক লৈ গভীৰ উদ্বেগ প্ৰকাশ কৰে।
অনুষ্ঠানত ভাষণ প্ৰদান কৰি ন্যায়াধীশ বৰালেয়ে আঙুলিয়াই দিয়ে যে চৰকাৰে কুম্ভ মেলাৰ বাবে ৩২,০০০ কোটিৰ পৰা ৩৪,০০০ কোটি টকা আৰু কৰিডৰ নিৰ্মাণৰ বাবে ১১,০০০ কোটি টকা আৱণ্টন দিয়ে। যদি এই বৃহৎ অংকৰ ধনৰ মাত্ৰ ০.১ শতাংশ, অৰ্থাৎ প্ৰায় ৩২ কোটি টকা শিক্ষাৰ নামত ব্যয় কৰা হ’লহেঁতেন, তেন্তে সমগ্ৰ ৰাজ্যখনত বন্ধ হৈ যোৱা ১০০ৰ পৰা ১২৫ খন মাৰাঠী মাধ্যমৰ বিদ্যালয় ৰক্ষা পৰিলহেঁতেন। চৰকাৰে বৃহৎ অনুষ্ঠান আৰু প্ৰকল্পৰ বাবে প্ৰচুৰ ধন ব্যয় কৰাৰ বিপৰীতে শিক্ষা খণ্ডক অৱহেলা কৰা কাৰ্যত তেওঁ আক্ষেপ প্ৰকাশ কৰে।
নিজৰ শৈশৱৰ স্মৃতি সুঁৱৰি ন্যায়াধীশগৰাকীয়ে কয় যে তেওঁ দশম শ্ৰেণীলৈকে পৌৰসভা আৰু জিলা পৰিষদৰ মাৰাঠী মাধ্যমৰ বিদ্যালয়তে শিক্ষা গ্ৰহণ কৰিছিল। আঞ্চলিক ভাষাত অধ্যয়ন কৰাটোৱে তেওঁৰ কেৰিয়াৰত কেতিয়াও হেঙাৰ সৃষ্টি কৰা নাছিল, বৰঞ্চ ই তেওঁৰ দৃষ্টিভংগী অধিক প্ৰসাৰিতহে কৰিছিল। পৰৱৰ্তী সময়ত ‘এন ডি টি ভি’ৰ সৈতে হোৱা এক বিশেষ সাক্ষাৎকাৰত তেওঁ কয় যে শিশুসকলেই দেশৰ ভৱিষ্যৎ, সেয়েহে বিদ্যালয়সমূহত প্ৰয়োজনীয় সা-সুবিধা উপলব্ধ কৰাটো অত্যন্ত জৰুৰী। প্ৰাথমিক শিক্ষা আৰু স্বাস্থ্যসেৱা প্ৰতিগৰাকী নাগৰিকৰ মৌলিক অধিকাৰ বুলিও তেওঁ মন্তব্য কৰে।
শিক্ষাৰ্থীৰ সংখ্যা বৃদ্ধি পোৱাৰ পাছতো শিক্ষাৰ বাজেট বৃদ্ধি হোৱাৰ পৰিৱৰ্তে ক্ৰমান্বয়ে হ্ৰাস পোৱাটো এক গুৰুতৰ বিষয় বুলি তেওঁ উল্লেখ কৰে। বিগত কেইবা বছৰ ধৰি এই বাজেট ১৩ শতাংশৰ ঘৰো স্পৰ্শ কৰিব পৰা নাই। গ্ৰামাঞ্চলৰ বিদ্যালয়সমূহৰ দুৰৱস্থাৰ কথা উল্লেখ কৰি তেওঁ এক ধৰ্মীয় অনুষ্ঠানৰ সৈতে জড়িত এখন বিদ্যালয়ৰ এক কৰুণ ঘটনাৰ কথা সুঁৱৰে, য’ত উপযুক্ত আন্তঃগাঁথনিৰ অভাৱত মাটিত শুবলৈ বাধ্য হোৱা তিনিগৰাকী ছাত্ৰীয়ে সাপে খোঁটাৰ ফলত প্ৰাণ হেৰুৱাবলগীয়া হৈছিল।
