ৰাজস্থানৰ জয়পুৰস্থিত সাৱাই মান সিং ষ্টেডিয়ামৰ ছুইমিং পুলত ৬ আগষ্টৰ পৰা আৰম্ভ হৈছে ৪২ সংখ্যক ছাব জুনিয়ৰ নেশ্যনেল একুৱাটিক চেম্পিয়নশ্বিপ ২০২৬। ৯ আগষ্টলৈ চলিবলগীয়া এই প্ৰতিযোগিতাত অসমে আৰম্ভণিৰে পৰাই দৰ্শনীয় সফলতা লাভ কৰিছে।
অসমৰ সাঁতোৰবিদ কস্তুৰী গগৈয়ে মহিলাৰ ১০০ মিটাৰ ব্ৰেষ্টষ্ট্ৰোক ইভেণ্টত ১ মিনিট ১৬.৮২ ছেকেণ্ড সময় লৈ সোণৰ পদক জয় কৰিছে। এই জয়ে প্ৰতিযোগিতাখনত অসমৰ প্ৰথমটো সোণৰ পদক কঢ়িয়াই আনিছে আৰু ৰাজ্যৰ বাবে গৌৰৱৰ মুহূৰ্ত সৃষ্টি কৰিছে।
অসম সাঁতোৰ সন্থাৰ সাধাৰণ সম্পাদক ভাস্কৰ ৰঞ্জন দাসে দলটোৰ এই উজ্জ্বল আৰম্ভণিক লৈ সন্তোষ প্ৰকাশ কৰিছে। শেহতীয়া বান পৰিস্থিতিৰ মাজতো অসমৰ খেলুৱৈয়ে এনে সাফল্য লাভ কৰাটো ৰাজ্যবাসীৰ বাবে এক অনুপ্ৰেৰণাদায়ক খবৰ বুলি তেওঁ মন্তব্য কৰে। লগতে তেওঁ সোণৰ পদক জয় কৰা কস্তুৰী গগৈক আন্তৰিক অভিনন্দন জনায়।
উল্লেখ্য যে কস্তুৰী গগৈ বৰ্তমান অভিজ্ঞ প্ৰশিক্ষক বাবুল গুৰুঙৰ তত্বাৱধানত উন্নত প্ৰশিক্ষণ গ্ৰহণ কৰি আছে। তেওঁৰ এই সাফল্যই অসমৰ সাঁতোৰ খেললৈ নতুন আশাৰ বতৰা কঢ়িয়াই আনিছে।
