নাগৰিকত্ব সংশোধনী বিধেয়ক বাতিল কৰাত মুখ্য ভূমিকা গ্ৰহণ কৰি উত্তৰ-পূববাসীৰ ব্যাপক সমৰ্থন আদায় কৰিবলৈ সক্ষম হোৱা মেঘালয়ৰ মুখ্য মন্ত্ৰী কনৰাড চাংমাৰ ৰাজনৈতিক দল নেশ্যনেল পিপল’ছ পাৰ্টী চমুকৈ এন পি পি অসমত আত্মপ্ৰকাশ কৰিবলৈ সাজু হৈ উঠিছে।
লোকসভা নিৰ্বাচনৰ প্ৰতি লক্ষ্য ৰাখিয়েই দলটোৱে ২৮ ফেব্ৰুৱাৰিত অসম ৰাজ্যিক কমিটিখন আনুষ্ঠানিকভাৱে ঘোষণা কৰাৰ সম্ভাৱণা আছে। মেঘালয়ৰ গৃহমন্ত্ৰী জেমছ চাংমাৰ তত্ত্বাৱধানতে এন পি পি দলে অসমত আত্মপ্ৰকাশ কৰিব বুলি এক সূত্ৰৰ পৰা জানিব পৰা গৈছে।
উল্লেখ্য যে নাগৰিকত্ব সংশোধনী বিধেয়ক প্ৰসংগত বিজেপিৰ স্থিতিক তীব্ৰ সমালোচনা কৰি বিজেপি ত্যাগ কৰা মীৰা বৰঠাকুৰ, মিত্ৰতা সন্দৰ্ভত দোধোৰ-মোধোৰ স্থিতিত থকা কাৰ্যত অসন্তুষ্টি প্ৰকাশ কৰি অগপ ত্যাগ কৰা নেতা দিলীপ বৰাৰ লগতে প্ৰাক্তন অগপ নেতা জগদীশ ভূঞাৰ দৰে নেতাই ইতিমধ্যে এন পি পি দলত যোগদান নিশ্চিত কৰাৰ কথা দলটোৱে জানিবলৈ দিয়ে।
ইয়াৰ উপৰি এন পি পিৰ সূত্ৰৰ পৰা জানিব পৰা মতে লোকসভা নিৰ্বাচনৰ পূৰ্বে অসমৰ আৰু অধিক শীৰ্ষ পৰ্যায়ৰ ৰাজনৈতিক নেতা দলটোত যোগদান কৰাৰ সম্ভাৱনা আছে। দলটোৱে আগন্তুক লোকসভাত উত্তৰ-পূবৰ আটাইকেইখন ৰাজ্যতে প্ৰতিদ্বন্দ্বিতা আগবঢ়োৱাৰ উদ্দেশ্যে এনেধৰণৰ পদক্ষেপ লোৱা বুলি জানিব পৰা গৈছে।
ইফালে অসমৰ ৰাজ্যিক সমিতিখন ঘোষণা কৰাৰ দিনা মেঘালয়ৰ মুখ্য মন্ত্ৰী কনৰাড চাংমাও উপস্থিত থকাৰ সম্ভাৱনা আছে।
