কাৰাদণ্ডৰ সময়সীমা আছিল এবছৰ। অৱশ্যে জেলত ভাল আচৰণৰ বাবে দহ মাহৰ পাছত মুকলি কৰি দিয়া হয় প্ৰাক্তন ক্ৰিকেটাৰ তথা ৰাজনীতিবিদ নৱজোৎ সিং সিদ্ধুক। ‘ইচ্ছাকৃতভাৱে আঘাত কৰা’ এটা পুৰণি গোচৰত শাস্তি প্ৰদান কৰা হৈছিল সিদ্ধুক।
শুকুৰবাৰে নিজৰ টুইটাৰ হেণ্ডেলৰ পৰা টুইটযোগে জেলৰ পৰা মুক্তিৰ কথা সদৰী কৰিছিল সিদ্ধুৱে। সেই অনুসৰি পঞ্জাৱৰ প্ৰাক্তন কংগ্ৰেছ সভাপতিগৰাকীক শনিবাৰে বিয়লি পাটিয়ালা সংশোধনাগাৰ কেন্দ্ৰৰ পৰা মুকলি কৰি দিয়া হয়।
লগতে পঢ়ক: সঁচা! ২০২৯ চনৰ পৰা অমৰ হ’ব মানুহ? গৱেষণাত বিজ্ঞানীৰ অভূতপূৰ্ব দাবী
কাৰাগাৰৰ পৰা ওলাই আহি পুনৰ ৰাজ্যৰ ৰাজনীতিত সক্ৰিয় হোৱাৰ ইংগিত দিছে সিদ্ধুৱে। তেওঁ কয় যে তেওঁ ৰাজনীতিত সক্ৰিয় হ’ব বিচাৰে। একে সময়তে সিদ্ধুৱে বিজেপিৰ বিৰুদ্ধে সৰৱ হৈ পৰে।
তেওঁৰ কয় “দেশৰ গণতন্ত্ৰ আজি শিকলিৰে বন্ধা।” ৰাহুল গান্ধীৰ সমৰ্থনত সিদ্ধুৱে লগতে কয়, ‘পাঞ্জাব এই দেশৰ সুৰক্ষা কবচ। কিন্তু দেশত চলি আছে একনায়কত্ববাদী শাসন। ইয়াক ৰোধ কৰিবলৈ ৰাহুলৰ নেতৃত্বত এটা বিপ্লৱ আহিব।”
ইতিমধ্যে খালিস্তানী নেতা অমৃতপল সিঙক লৈ উত্তাল হৈ পৰিছে পঞ্জাৱৰ ৰাজনীতি। এই সন্দৰ্ভত সিদ্ধুৱে কয় যে পঞ্জাৱত ৰাষ্ট্ৰপতিৰ শাসন জাপি দিয়াৰ প্ৰচেষ্টা অব্যাহত আছে। কংগ্ৰেছৰ প্ৰতি আনুগত্য প্ৰকাশ কৰি সিদ্ধুৱে কয়, ‘’ৰাহুল, প্ৰিয়ংকা আৰু প্ৰতিগৰাকী কংগ্ৰেছ কৰ্মীৰ সৈতে কান্ধত কান্ধ মিলাই যুঁজ দিম।‘’
লগতে পঢ়ক: পৰ্ণ তাৰকাক মুখ বন্ধ কৰিবলৈ ধন দিয়াৰ অভিযোগ; আত্মসমৰ্পণৰ বাবে সাজু ড’নাল্ড ট্ৰাম্প
পঞ্জাৱ কংগ্ৰেছৰ প্ৰাক্তন সভাপতি সিদ্ধুৱে ৩৫ বছৰীয়া গোচৰটোত ২০২২ চনৰ ২০ মে’ত পাটিয়ালা আদালতত আত্মসমৰ্পণ কৰিছিল। আদালতে তেওঁক এবছৰৰ কাৰাদণ্ডৰ শাস্তি প্ৰদান কৰে। চলিত বৰ্ষৰ ১৯ মে’ত তেওঁক মুকলি কৰি দিয়াৰ কথা আছিল যদিও কাৰাগাৰ কৰ্তৃপক্ষই কয় যে কাৰাগাৰৰ ভিতৰত ভাল আচৰণৰ বাবে সিদ্ধুক আগতেই মুকলি কৰি দিয়া হৈছে।
