ৰাজ্যৰ বাবে আন এক পৰম আকাংক্ষিত খবৰ। পুনৰ এবাৰ আন্ত:ৰাষ্ট্ৰীয় পৰ্যায়ত জিলিকি উঠি অসমক গৌৰৱান্বিত কৰি তুলিছে এগৰাকী খেলুৱৈয়ে। চলিত বাৰ্মিংহাম কমনৱেলথ গেমছত আজি অসমৰ এগৰাকী খেলুৱৈয়ে নিশ্চিত কৰিছে কমনৱেলথ পদক।
ভাৰতীয় মহিলা লনবল দলটোৱে আজি ফাইনেলত প্ৰৱেশৰ লগে লগে নিশ্চিত হয় স্বৰ্ণ অথবা ৰূপৰ পদক। মহিলাৰ এই দলটোত ভাৰতীয় দলক প্ৰতিনিধিত্ব কৰিছে অসমৰ নয়নমণি শইকীয়াই।
ফাইনেলত প্ৰৱেশৰ পথত ভাৰতীয় দলটোৱে ছেমিফাইনেলত নিউজিলেণ্ডক ১৬-১৩ ব্যৱধানত পৰাস্ত কৰে।
ইয়াৰ লগে লগে দলটোৱে এক নতুন ইতিহাস ৰচি কমনৱেলথ গেমছৰ লনবল ইভেণ্টত প্ৰথমটো পদক নিশ্চিত কৰে।
নয়নমণি শইকীয়াৰ উপৰিও দলৰ আন সদস্য কেইগৰাকী ক্ৰমে লাভলী চৌবে, পিঙ্কি সিং আৰু ৰূপা ৰাণী তিৰ্কী।
স্বৰ্ণ পদক অৰ্জনৰ লক্ষ্যৰে এতিয়া ভাৰতীয় দলটো ফাইনেলত দক্ষিণ আফ্ৰিকাৰ বিৰুদ্ধে অৱতীৰ্ণ হ’ব।