গুৱাহাটীৰ কাহিলীপাৰাস্থিত গুলীচালনা অনুশীলন ক্ষেত্ৰত চলি থকা এনচিচিৰ বিশেষ প্ৰশিক্ষণ শিবিৰত মঙলবাৰে উপস্থিত হৈ কেডেটসকলক উৎসাহ যোগায় এনচিচি উত্তৰ-পূব আঞ্চলিক সঞ্চালকালয়ৰ অতিৰিক্ত মহাপৰিচালক মেজৰ জেনেৰেল অনুৰাগ বিজে। সপ্তম অসম বেটেলিয়ন এনচিচিৰ উদ্যোগত আয়োজিত এই শিবিৰত আগন্তুক আন্তঃসঞ্চালকালয় ক্ৰীড়া গুলীচালনা প্ৰতিযোগিতাৰ বাবে কেডেটসকলক বিশেষ প্ৰশিক্ষণ প্ৰদান কৰা হৈছে।
পৰিদৰ্শনকালত মেজৰ জেনেৰেল বিজে কেডেটসকলৰ নিৰ্বাচনী প্ৰক্ৰিয়া আৰু চলি থকা প্ৰশিক্ষণৰ অগ্ৰগতিৰ বুজ লয়। তেওঁ গুলীচালনা অনুশীলনৰ সময়সূচী, প্ৰশিক্ষণ ব্যৱস্থা আৰু শিবিৰৰ সামগ্ৰিক কাৰ্যকলাপ সম্পৰ্কে বিস্তৃত তথ্য লাভ কৰে। কেডেটসকলৰ প্ৰস্তুতি আৰু সুবিধাসমূহৰ মানদণ্ড নিজে পৰ্যবেক্ষণ কৰাৰ উদ্দেশ্যে তেওঁ গুলীচালনা ক্ষেত্ৰ পৰিদৰ্শন কৰাৰ লগতে চলি থকা অনুশীলনো লক্ষ্য কৰে।
ইয়াৰ পাছত তেওঁ কেডেটসকলৰ সৈতে মতবিনিময় কৰি শৃংখলা, একাগ্ৰতা আৰু নিষ্ঠাৰে আগবাঢ়ি যাবলৈ আহ্বান জনায়। তেওঁ কয় যে কঠোৰ পৰিশ্ৰম আৰু অধ্যৱসায়েই সফলতাৰ মূল চাবিকাঠি। দেশ আৰু এনচিচিৰ সুনাম অক্ষুণ্ণ ৰাখিবলৈ প্ৰতিজন কেডেটক নিজৰ লক্ষ্যৰ প্ৰতি দৃঢ় থাকিবলৈও তেওঁ অনুৰোধ জনায়।
বৰ্তমান গুৱাহাটীৰ গিৰিজানন্দ চৌধুৰী বিশ্ববিদ্যালয়ত চলি থকা চল্লিশ দিনীয়া বিশেষ প্ৰশিক্ষণ শিবিৰত উত্তৰ-পূবাঞ্চলৰ বিভিন্ন ৰাজ্যৰ চাৰিশৰো অধিক কেডেটে অংশগ্ৰহণ কৰিছে। এই শিবিৰত তেওঁলোকে গুলীচালনাৰ বিশেষ প্ৰশিক্ষণ গ্ৰহণ কৰাৰ লগতে ৰাষ্ট্ৰীয় পৰ্যায়ৰ প্ৰতিযোগিতাৰ বাবে অনুষ্ঠিত নিৰ্বাচনী প্ৰক্ৰিয়াত অংশ লৈ আছে।
পৰিদৰ্শনৰ অন্তত মেজৰ জেনেৰেল বিজে কেডেটসকলক হাতঘড়ী উপহাৰ দিয়ে। তেওঁৰ এই পদক্ষেপে কেডেটসকলৰ মাজত বিশেষ উৎসাহৰ সৃষ্টি কৰে। লগতে তেওঁৰ উপস্থিতি আৰু পৰামৰ্শই অংশগ্ৰহণকাৰীসকলৰ মনোবল বৃদ্ধি কৰাৰ লগতে কঠোৰ পৰিশ্ৰম, অধ্যৱসায় আৰু দলীয় সমন্বয়ৰ গুৰুত্ব অধিক স্পষ্ট কৰি তোলে।
