সেনা আৰু আৰক্ষীৰ যুটীয়া অভিযানত কোকৰাঝাৰ জিলাৰ বিশমুৰি আৰক্ষী চকীৰ অন্তৰ্গত উল্টাপানী লাৱন্যপুৰ অঞ্চলৰ পৰা এজন এন ডি এফ বি (সং) গোটৰ বিদ্ৰোহীক বুধবাৰে সন্ধিয়া গ্ৰেপ্তাৰ কৰা হয়।
এক বিশেষ সূত্ৰৰ তথ্য ভিত্তিত, অসম আৰক্ষী আৰু সেনাৰ এটা দলে বিশমুৰি আৰক্ষী চকীৰ অন্তৰ্গত উল্টাপানী লাৱন্যপুৰ অঞ্চলত এক যৌথ অভিযান চলাই অস্ত্ৰ-শস্ত্ৰৰে সৈতে উগ্ৰপন্থীজনক আটক কৰে।
উগ্ৰপন্থীজনৰ পৰা অভিযানকাৰী দলটোৱে এটা ৭.৬৫ এম এম পিষ্টল, দুই জাঁই সজীৱ গুলীস নগদ ১৪,৬০০ টকা আৰু কিছুমান আপত্তিজনক নথি-পত্ৰ উদ্ধাৰ কৰে।
কোকৰাঝাৰৰ আৰক্ষী অধীক্ষক ৰাজেন সিঙে কয় যে উগ্ৰপন্থী সদস্যজনক থুম্বা ব্ৰহ্ম ওৰফে থুইজৱাম বুলি চিনাক্ত কৰা হৈছে আৰু তেওঁ ম্যানমাৰত প্ৰশিক্ষণপ্ৰাপ্ত বিদ্ৰোহী সংগঠনটোৰ ৪২ নম্বৰ গোটৰ সদস্য আছিল।
কোকৰাঝাৰৰ আৰক্ষী অধীক্ষকগৰাকীয়ে জানিবলৈ দিয়া মতে বিদ্ৰোহী সদস্যজনৰ সৈতে জুৱেল নাৰ্জাৰী ওৰফে তামাং নামৰ আন এজন এন ডি এফ বি (সং)ৰ সদস্যও আছিল যদিও তেওঁ পলাই সাৰিবলৈ সক্ষম হয়।
