দেশজুৰি অনুষ্ঠিত হোৱা নিট-ইউজি পৰীক্ষাৰ প্ৰশ্নকাকত ফাদিল হোৱা ঘটনাই এতিয়া সমগ্ৰ দেশৰ ২২ লাখৰো অধিক পৰীক্ষাৰ্থীক তীব্ৰ বিভ্ৰান্তি আৰু হাৰাশাস্তিৰ মাজলৈ ঠেলি দিছে। শেহতীয়া তদন্তৰ পৰা পোহৰলৈ আহিছে যে মহাৰাষ্ট্ৰৰ নাছিকত প্ৰথমে মাত্ৰ ১০ লাখ টকাত এই প্ৰশ্নকাকত ক্ৰয় কৰা হৈছিল। পৰৱৰ্তী সময়ত সেই একেখন প্ৰশ্নকাকত হাৰিয়ানাত ১৫ লাখ টকাত বিক্ৰী কৰা হয়। তদন্তকাৰী বিষয়াসকলে জানিবলৈ দিয়া মতে, এই বৃহৎ কেলেংকাৰীৰ আৰম্ভণি নাছিক চহৰৰ পৰাই হৈছিল আৰু তাতেই প্ৰশ্নকাকতখনৰ প্ৰথমটো ডিজিটেল কপি ফাদিল কৰা হৈছিল।
এই কেলেংকাৰীৰ সৈতে জড়িত থকাৰ অভিযোগত কেন্দ্ৰীয় তদন্তকাৰী সংস্থা চিবিআইয়ে শুভম খাইৰনাৰ নামৰ এজন আয়ুৰ্বেদিক চিকিৎসা বিজ্ঞানৰ ছাত্ৰক আটক কৰিছে। নাছিকৰ নন্দগাঁৱৰ বাসিন্দা শুভমে পুনেৰ ধনঞ্জয় নামৰ আন এজন ব্যক্তিৰ সৈতে মিলি প্ৰশ্নকাকত ফাদিলৰ এই বৃহৎ ষড়যন্ত্ৰ ৰচনা কৰিছিল। অভিযোগ অনুসৰি, শুভমে ধনঞ্জয়ৰ পৰা ১০ লাখ টকাত প্ৰশ্নকাকতখন কিনিছিল আৰু পিছত টেলিগ্ৰাম এপৰ জৰিয়তে ১৫ লাখ টকাত আনক বিক্ৰী কৰিছিল। তেওঁক সোধা-পোছা কৰাৰ পিছতে তদন্তকাৰী সংস্থাই জানিব পাৰিছে যে এই ফাদিল হোৱা প্ৰশ্নকাকত মহাৰাষ্ট্ৰৰ পৰা হাৰিয়ানাৰ গুৰুগ্ৰাম, ৰাজস্থানৰ জয়পুৰ আৰু ছিকাৰৰ লগতে বিহাৰ আৰু জম্মু-কাশ্মীৰলৈকো বৃহৎ ধনৰ বিনিময়ত বিয়পি পৰিছিল।
তদন্তৰ এক অংশ হিচাপে চিবিআইয়ে ৰাজস্থানৰ পৰা মংগিলাল আৰু দিনেশ বিৱাল নামৰ দুজন ভাতৃক গ্ৰেপ্তাৰ কৰিছে। জামৱা ৰামগড়ৰ বাসিন্দা এই দুই ভাতৃয়ে পৰীক্ষাৰ এসপ্তাহ পূৰ্বে, অৰ্থাৎ ২৬ এপ্ৰিলত গুৰুগ্ৰামৰ এজন চিকিৎসকৰ পৰা ৩০ লাখ টকাত নিটৰ প্ৰশ্নকাকত কিনিছিল। পিছত ২৯ এপ্ৰিলত তেওঁলোকে সেইখন আৰু অধিক দামত আন বহুতকে বিক্ৰী কৰে। তেওঁলোকৰ মাজৰে এজনে ছিকাৰত চিকিৎসা বিজ্ঞানৰ প্ৰৱেশ পৰীক্ষাৰ বাবে প্ৰস্তুতি চলাই আছিল। সেয়েহে তদন্তকাৰীয়ে সন্দেহ কৰিছে যে ছিকাৰ অঞ্চলটোৱেই এই সমগ্ৰ কেলেংকাৰীৰ মূল কেন্দ্ৰবিন্দু হিচাপে কাম কৰিছিল।
যোৱা ৩ মে’ত ৰাষ্ট্ৰীয় পৰীক্ষণ সংস্থাই অনুষ্ঠিত কৰা এই নিট পৰীক্ষাত প্ৰায় ২৩ লাখ ছাত্ৰ-ছাত্ৰীয়ে অংশগ্ৰহণ কৰিছিল। কিন্তু অতিৰিক্ত সঞ্চালক প্ৰধান বিশাল বংশালে প্ৰকাশ কৰা অনুসৰি, পৰীক্ষাৰ এমাহ আগতেই একাংশ ছাত্ৰৰ হাতত ৪১০টা প্ৰশ্নৰ এটা গোট পৰিছিল। পৰীক্ষাৰ অন্তত দেখা গ’ল যে তাৰে ১২০টা ৰসায়ন বিজ্ঞানৰ প্ৰশ্ন প্ৰকৃত প্ৰশ্নকাকতৰ সৈতে হুবহু মিলি গৈছে। কেৱল প্ৰশ্নই নহয়, উত্তৰৰ বিকল্পসমূহো একেই আছিল। আন এক সূত্ৰই দাবী কৰা অনুসৰি, ফাদিল হোৱা ২৮১টা প্ৰশ্নৰ ভিতৰত ১৩৫টা প্ৰশ্নই মূল পৰীক্ষাত অহা প্ৰশ্নৰ সৈতে মিলি গৈছিল।
এই সমগ্ৰ খণ্ডটোক লৈ কংগ্ৰেছৰ সাংসদ ৰাহুল গান্ধী আৰু আম আদমী পাৰ্টীৰ মুৰব্বী অৰবিন্দ কেজৰিৱালেও কেন্দ্ৰীয় চৰকাৰক তীব্ৰ সমালোচনা কৰিছে। ২০২৪ চনৰ নিট পৰীক্ষাৰ দৰেই এইবাৰো দেশৰ বিভিন্ন প্ৰান্তত হাজাৰ হাজাৰ টকাত প্ৰশ্নকাকত বিক্ৰী হোৱা ঘটনাত বিৰোধীয়ে চৰকাৰৰ ভূমিকাক লৈ প্ৰশ্ন উত্থাপন কৰিছে। এই সকলোবোৰ অভিযোগ আৰু প্ৰশ্নকাকত ফাদিলৰ তথ্য পোহৰলৈ অহাৰ মাত্ৰ কেইঘণ্টামানৰ ভিতৰতে ৰাষ্ট্ৰীয় পৰীক্ষণ সংস্থাই ৩ মে’ত অনুষ্ঠিত হোৱা পৰীক্ষা বাতিল কৰাৰ কথা ঘোষণা কৰে। বৰ্তমান চিবিআইয়ে এই সমগ্ৰ ঘটনাৰ তদন্ত চলাই আছে আৰু পৰীক্ষা বাতিল হোৱাৰ ফলত ছাত্ৰ-ছাত্ৰীসকলে এতিয়া পুনৰবাৰ পৰীক্ষাত অৱতীৰ্ণ হ’ব লাগিব।
