দেশৰ অন্যতম ডাঙৰ প্ৰতিযোগিতামূলক পৰীক্ষা নিট-ইউজি (NEET-UG)ৰ প্ৰশ্নকাকত ফাদিল কাণ্ডত এক চাঞ্চল্যকৰ তথ্য পোহৰলৈ আহিছে। কেন্দ্ৰীয় তদন্তকাৰী সংস্থা চিবিআই (CBI)-য়ে দাখিল কৰা প্ৰায় ২০ হাজাৰ পৃষ্ঠাৰ চাৰ্জশ্বীটৰ পৰা জনা গৈছে যে ‘FIFA World Cup 2026’ নামৰ এটা হোৱাটছএপ গ্ৰুপৰ জৰিয়তে এই সমগ্ৰ কেলেংকাৰীটো চলোৱা হৈছিল। বাহিৰৰ পৰা ফুটবল প্ৰেমীৰ আড্ডা যেন লাগিলেও, আচলতে ইয়াতেই নিট পৰীক্ষাৰ গোপন তথ্য আদান-প্ৰদান কৰা হৈছিল।
চিবিআইৰ তদন্ত অনুসৰি, এই ‘FIFA World Cup 2026’ গ্ৰুপটোত মুঠ ৮ জন সদস্য আছিল। ইয়াৰ জৰিয়তেই এনটিএ (NTA)-ৰ চুক্তিভিত্তিক বিষয়-বিশেষজ্ঞ পি ভি কুলকাৰ্নি আৰু মনীষা মান্ধাৰেৰ দৰে মূল অভিযুক্তৰ নাম পোহৰলৈ আহে। গ্ৰুপটোত বিশেষ বায়’লজি ক্লাছ, সময়সূচী আৰু পৰীক্ষাৰ পিছৰ নম্বৰ গণনাক লৈ নিয়মিত আলোচনা চলিছিল।
পুনেৰ মনীষা ৱাঘমাৰে নামৰ মহিলাগৰাকী এই সমগ্ৰ চক্ৰটোৰ মুখ্য সংযোগকাৰী আছিল। তেওঁ এনটিএৰ অনুমোদিত অনুবাদক আৰু প্ৰুফৰিডাৰ আছিল। তেওঁ পৰীক্ষাৰ্থীসকলক বিশেষজ্ঞসকলৰ ক্লাছত যোগদান কৰাই দিছিল আৰু দাবী কৰিছিল যে এই ক্লাছসমূহৰ পৰাই নিট পৰীক্ষাৰ প্ৰশ্ন আহিব।
মনীষা ৱাঘমাৰৰ স্বামীৰ পুনেত থকা ডেন্টেল ক্লিনিকখনক প্ৰশ্নকাকত ফাদিলৰ মূল কেন্দ্র হিচাপে ব্যৱহাৰ কৰা হৈছিল। তাৰ পৰাই পদাৰ্থ বিজ্ঞান, ৰসায়ন বিজ্ঞান আৰু জীৱবিজ্ঞানৰ ফাদিল হোৱা প্ৰশ্নৰ ডিজিটেল কপি জব্দ কৰা হৈছে।
মনীষা মান্ধাৰে পুনেৰ নিজৰ ফ্লেটত শিক্ষাৰ্থীসকলক লৈ বিশেষ অফলাইন ক্লাছ লৈছিল। তাত তেওঁ একাদশ আৰু দ্বাদশ শ্ৰেণীৰ NCERT কিতাপৰ নিৰ্দিষ্ট অংশ ৰঙা ৰঙেৰে চিহ্নিত কৰাই কাষত প্ৰশ্ন লিখাই দিছিল আৰু সুকীয়া বহীত উত্তৰ লিখাই নিজেই শুধৰাই দিছিল।
ঠিক একেদৰে, ৰসায়ন বিজ্ঞানৰ বিশেষজ্ঞ পি ভি কুলকাৰ্নিয়েও নিজৰ ঘৰত ৯ জন শিক্ষাৰ্থীক লৈ ফাদিল হোৱা প্ৰশ্ন ব্যৱহাৰ কৰি বিশেষ ক্লাছ লৈছিল।
পৰীক্ষাৰ পিছত চিবিআইয়ে শিক্ষাৰ্থীসকলৰ সেই বিশেষ বহী আৰু প্ৰকৃত নিট-ইউজিৰ প্ৰশ্নকাকত মিলাই চাই দেখা পায় যে অধিকাংশ প্ৰশ্নেই হুবহু একে আছিল।
তদন্তত ‘NEET 2026’ নামৰ আন এটা গোপন হোৱাটছএপ গ্ৰুপৰো সন্ধান পোৱা গৈছে। এই কেলেংকাৰীত জড়িত একাধিক লোকক ইতিমধ্যে চিবিআইয়ে গ্ৰেপ্তাৰ কৰিছে। পদাৰ্থ বিজ্ঞানৰ বিশেষজ্ঞ মনীষা হাবালদাৰৰ বিৰুদ্ধেও টকাৰ বিনিময়ত হাতেলিখা ৬৬ টা প্ৰশ্ন ফাদিল কৰাৰ অভিযোগ উঠিছে।
চিবিআইয়ে বৰ্তমান সমগ্ৰ ঘটনাটোৰ তদন্ত অব্যাহত ৰাখিছে।
