অহা ২০২৬ চনৰ ২১ জুন তাৰিখে অনুষ্ঠিত হবলগীয়া নিট ইউ জি পৰীক্ষাৰ বাবে ৰাষ্ট্ৰীয় পৰীক্ষণ সংস্থাই কেইটামান ছাত্ৰ ছাত্ৰীৰ উপযোগী সালসলনি ঘোষণা কৰিছে। ১২ জুন তাৰিখে প্ৰকাশ পোৱা এখন চৰকাৰী জাননীত কোৱা হৈছে যে এই পদক্ষেপসমূহৰ মূল উদ্দেশ্য হৈছে পৰীক্ষাটো অধিক নিকা আৰু নিৰাপদ কৰাৰ লগতে পৰীক্ষাৰ্থীসকলৰ সুবিধাৰ প্ৰতি লক্ষ্য ৰখা।
বিগত বৰ্ষসমূহৰ পৰা লাভ কৰা মতামতৰ ভিত্তিত ৰাষ্ট্ৰীয় পৰীক্ষণ সংস্থাই পৰীক্ষাৰ সময়সীমা ১৯৫ মিনিটলৈ বৃদ্ধি কৰিছে। এতিয়াৰে পৰা পৰীক্ষা দিনৰ ২ বজাৰ পৰা ৫ বাজি ১৫ মিনিটলৈ অনুষ্ঠিত হ‘ব। সংস্থাই স্পষ্ট কৰি দিছে যে এই সময়ছোৱাৰ ভিতৰতে পৰীক্ষাৰ পূৰ্বে কৰিবলগীয়া নিয়মসমূহ যেনে উপস্থিতিৰ কাকতত স্বাক্ষৰ কৰা আৰু পৰীক্ষকৰ নিয়মীয়া পৰীক্ষণ আদি অন্তৰ্ভুক্ত থাকিব। ইয়াৰ ফলত ছাত্ৰ ছাত্ৰীসকলে প্ৰশাসনিক কামৰ বাবে নিজৰ লিখাৰ সময়খিনি হেৰুৱাব লগা নহয় আৰু কেৱল প্ৰশ্নকাকতত সম্পূৰ্ণ মনোযোগ দিব পাৰিব।
আন এক গুৰুত্বপূৰ্ণ পৰিৱৰ্তন অনুসৰি পৰীক্ষাৰ্থীসকলক হিচাপ আৰু অংক কৰিবলৈ প্ৰশ্নকাকতত আগতকৈ অধিক ঠাই প্ৰদান কৰা হ‘ব। এতিয়াৰে পৰা ২ খন পাতৰ পৰিৱৰ্তে ৪ খন পাত দিয়া হ’ব যাতে ছাত্ৰ ছাত্ৰীসকলে প্ৰয়োজনীয় হিচাপ, টোকা বা চিত্ৰ আঁকিবলৈ পৰ্যাপ্ত ঠাই পায়। আগতে এই পাতসমূহ কেৱল প্ৰশ্নকাকতৰ শেষতহে দিয়া হৈছিল। কিন্তু এতিয়া ছাত্ৰ ছাত্ৰীৰ সুবিধাৰ্থে ২ খন পাত নিৰ্দেশনাৰ ঠিক পিছতে থাকিব আৰু বাকী ২ খন শেষৰ ফালে থাকিব। বাওঁহতীয়া পৰীক্ষাৰ্থীসকলৰ বাবে আগৰ ব্যৱস্থাটো অলপ অসুবিধাৰ কাৰণ হৈছিল বাবে এই নতুন ব্যৱস্থাই তেওঁলোকক বিশেষভাৱে সহায় কৰিব বুলি জানিবলৈ দিয়া হৈছে। ইংৰাজী আৰু আঞ্চলিক ভাষাৰ দুয়োখন প্ৰশ্নকাকততে এই নতুন ব্যৱস্থা উপলব্ধ হ’ব।
ৰাষ্ট্ৰীয় পৰীক্ষণ সংস্থাই উল্লেখ কৰিছে যে এনে সৰু সৰু পৰিৱৰ্তনসমূহেও ছাত্ৰ ছাত্ৰীসকলৰ পৰীক্ষাত এক ইতিবাচক প্ৰভাৱ পেলাব পাৰে। পৰীক্ষাৰ নিকা আৰু নিৰাপত্তা ব্যৱস্থা অটুট ৰাখি ছাত্ৰ ছাত্ৰীসকলক এক আৰামদায়ক পৰিৱেশ দিয়াটোৱেই তেওঁলোকৰ মূল লক্ষ্য।
পৰীক্ষাৰ্থীসকলক প্ৰৱেশ পত্ৰ আৰু তথ্য পুস্তিকাত থকা নিৰ্দেশনাসমূহ ভালদৰে পঢ়ি চাবলৈ আৰু পৰীক্ষা সুচাৰুৰূপে পৰিচালনা কৰাৰ ক্ষেত্ৰত পৰীক্ষা কেন্দ্ৰৰ কৰ্মচাৰীসকলক সহায় কৰিবলৈ অনুৰোধ জনোৱা হৈছে। অধিক জানিবলৈ বা কিবা প্ৰশ্ন থাকিলে ছাত্ৰ ছাত্ৰীসকলে ৯১-১১-৪০৭৫৯০০০ নম্বৰত ফোন কৰি বা নিটৰ আনুষ্ঠানিক ইমেইল নিট ইউ জি ২০২৬ এট এন টি এ ডট এ চি ডট ইন ত যোগাযোগ কৰিব পাৰিব।
