পেহেলগাম আক্ৰমণক কেন্দ্ৰ কৰি কেন্দ্ৰীয় চৰকাৰক সমালোচনা কৰাৰ বাবে ভোজপুৰী লোকশিল্পী নেহা সিং ৰাথোৰৰ বিৰুদ্ধে এফআইআৰ দাখিল কৰা হৈছে। অভয় প্ৰতাপ সিং নামৰ এজন ব্যক্তিয়ে তেওঁৰ বিৰুদ্ধে দেশদ্ৰোহৰ গোচৰ ৰুজু কৰিছে। ইয়াৰ পিছতো লোকশিল্পীগৰাকীয়ে নিজৰ মন্তব্যত দৃঢ়তাৰে কেন্দ্ৰীয় চৰকাৰক সমালোচনা কৰিছে।
লক্ষ্ণৌৰ হজৰতগঞ্জ থানাত নেহা সিং ৰাথোৰৰ বিৰুদ্ধে এফআইআৰ দাখিল কৰা হৈছে। অভয় প্ৰতাপ সিঙৰ অভিযোগ যে শিল্পীগৰাকীয়ে ছ’চিয়েল মিডিয়াত ঘৃণা বিয়পাইছে। সাম্প্ৰদায়িক ঘৃণাক প্ৰসাৰিত কৰা, জনশান্তি বিঘ্নিত কৰা, ভাৰতৰ সাৰ্বভৌমত্ব, ঐক্য আৰু অখণ্ডতাক বিপন্ন কৰা আদিকে ধৰি ভাৰতীয় দণ্ডবিধিৰ কেইবাটাও ধাৰাত অভিযোগ দাখিল কৰা হৈছে।
এফ আই আৰৰ পিছতো নেহাই মোডী চৰকাৰক কৰা আক্ৰমণ কৰা বন্ধ কৰা নাছিল। সামাজিক মাধ্যমৰ জৰিয়তে নেহাই কয়, “পেহেলগাম আক্ৰমণৰ পিছত এতিয়ালৈকে চৰকাৰে কি কৰিছে? মোৰ বিৰুদ্ধে এফআইআৰ! মোৰ বিৰুদ্ধে এফআইআৰ দাখিল কৰি চৰকাৰে প্ৰকৃত বিষয়টোৰ পৰা মনোযোগ আঁতৰাই পেলাবলৈ চেষ্টা কৰিছে।”
তেওঁ আৰু কয়, “যদি আপোনাৰ সাহস আছে তেন্তে সন্ত্ৰাসবাদীৰ মূৰ কাটি আনক। আপোনাৰ ব্যৰ্থতাৰ বাবে মোৰ ওপৰত দোষ দিয়াৰ প্ৰয়োজন নাই। গণতন্ত্ৰত প্ৰতিটো ভোট যেনেকৈ গুৰুত্বপূৰ্ণ, প্ৰতিটো প্ৰশ্নও গুৰুত্বপূৰ্ণ। আৰু চৰকাৰৰ সকলো অসুবিধাৰ কাৰণ মোৰ প্ৰশ্ন। সেইবাবেই তেওঁলোকে মোক প্ৰশ্ন কৰাত বাধা দিবলৈ চেষ্টা কৰিছে।”
লগতে শিল্পীগৰাকীয়ে চৰকাৰক প্ৰশ্ন কৰে যে, “আপুনি এতিয়ালৈকে কিমানজন সন্ত্ৰাসবাদীক ধৰিবলৈ সক্ষম হৈছে? দেশৰ জনসাধাৰণে আপোনাক পাকিস্তানলৈ গৈ বিৰিয়ানী খাবলৈ নিৰ্বাচিত কৰিছিল নেকি? ইয়াৰ কিবা উত্তৰ আছে নেকি? একো নাই। প্ৰতিটো প্ৰশ্ন কৰাৰ পৰিৱৰ্তে আপুনি কেৱল জাননী পঠিয়াইছে, এফআইআৰ দাখিল কৰিছে, চাকৰি কাঢ়ি লৈছে, আৰু মানুহক অপমান কৰিছে। এইটো অপৰাধ নহয়নে? দেশৰ জনসাধাৰণক মোৰ প্ৰশ্ন, এই কাৰণেই নেকি আপুনি ভোট দিছিল?”
লগতে নেহাই কয়, “আপুনি যদি প্ৰশ্ন কৰে তেন্তে আপোনাক বিশ্বাসঘাতক বুলি কোৱা হৈছে! বিজেপি দেশ নহয়, নৰেন্দ্ৰ মোডী ঈশ্বৰ নহয়। মোৰ প্ৰশ্নত যদি ইমান আপত্তি আছে, তেন্তে ক্ষমতা এৰি বিৰোধী শিবিৰলৈ আহক। মই আৰু প্ৰশ্ন নকৰো।”
মন কৰিবলগীয়া যে পেহেলগাম আক্ৰমণৰ পিছত এটা ভিডিঅ’ত নেহাই দাবী কৰে যে, “প্ৰধানমন্ত্ৰী নৰেন্দ্ৰ মোদীয়ে বিহাৰ নিৰ্বাচনত পেহেলগাম আক্ৰমণক ৰাজনৈতিক উদ্দেশ্যত ব্যৱহাৰ কৰিব। ঠিক যেনেকৈ ২০১৯ চনত পুলৱামা আক্ৰমণক নিৰ্বাচনত ব্যৱহাৰ কৰা হৈছিল।” এই মন্তব্যৰ বাবেই তেওঁৰ বিৰুদ্ধে দেশদ্ৰোহৰ অভিযোগত এফআইআৰ দাখিল কৰা হৈছে।
মন কৰিবলগীয়া যে ১৯৯৭ চনত বিহাৰৰ জাণ্ডাহত ভোজপুৰী লোকসংগীতৰ জনপ্ৰিয় নেহা সিং ৰাথোৰৰ জন্ম হৈছিল। ২০১৮ চনত কানপুৰ বিশ্ববিদ্যালয়ৰ পৰা বিজ্ঞান শাখাত স্নাতক ডিগ্ৰী লাভ কৰা নেহাই ইয়াৰ পূৰ্বেও কেইবাবাৰো কেন্দ্ৰীয় চৰকাৰ আৰু বিজেপিক সমালোচনা কৰি আহিছে।
