নেপালত প্ৰতিকুল বতৰৰ বাবে একাধিক দুৰ্ঘটনা সংঘটিত হোৱাৰ ফলত পৰ্বতাৰোহণত ব্যঘাত জন্মিছে আৰু বহু কেইগৰাকী পৰ্বতাৰোহীৰ মৃত্যুৰ খবৰ পোৱা গৈছে। প্ৰকাশিত তথ্য অনুসৰি সোমবাৰে উত্তৰ-পূব নেপালৰ এটা পাহাৰত হিমস্খলনৰ ফলত কমেও ৭জন পৰ্বতাৰোহীৰ মৃত্যু হয়। আন চাৰিজন লোক আহত হয়, আৰু চাৰিজন লোক এতিয়াও সন্ধানহীন হৈ থকা বুলি জানিব পৰা গৈছে। ৫,৬৩০ মিটাৰ (১৮,৪৭১ ফুট) শৃংগ য়ালুং ৰিৰ বেছ কেম্পত এই দুৰ্ঘটনা সংঘটিত হৈছে।
আৰক্ষী বিষয়া জ্ঞান কুমাৰ মাহাটোৱে জনোৱা মতে, নিহতসকলৰ ভিতৰত তিনিজন আমেৰিকান, এজন কানাডিয়ান, এজন ইটালীয়, আৰু দুজন নেপালী।
উল্লেখ্য যে নেপালৰ পৰ্বতবোৰে বিশ্বৰ বিভিন্ন প্ৰান্তৰ পৰা পৰ্বতাৰোহীক আকৰ্ষণ কৰে। পৃথিৱীৰ ১০টা সৰ্বোচ্চ শৃংগৰ ভিতৰত আঠটা শৃংগ থকা দেশখনত প্ৰতি বছৰে শ শ পৰ্বতাৰোহীক দেখা যায়।
আন এক ঘটনাত পশ্চিম নেপালৰ পানবাৰী পৰ্বত আৰোহণ কৰি থকা অৱস্থাত নিৰুদ্দেশ হয় দুজন ইটালীৰ পৰ্বতাৰোহী। পৰ্যটন বিষয়া হিমল গৌতমে কয় যে ষ্টেফানো ফাৰ’নাটো আৰু এলেছান্দ্ৰ’ কেপুটো তিনিজনীয়া দলৰ অংশ। ঘূৰ্ণীবতাহ মন্থাৰ পৰা হোৱা প্ৰচণ্ড বৰফৰ বাবে কেম্প ৱানত আবদ্ধ হৈ পৰে। শনিবাৰৰ পৰা তেওঁলোকৰ মাজত কোনো যোগাযোগ স্থাপন কৰিব পৰা নাই। বেছ কেম্পত সুৰক্ষিত হৈ থকা দলটোৰ এজনক দেওবাৰে হেলিকপ্টাৰেৰে উদ্ধাৰ কৰা হয়। এতিয়াও সন্ধাকাৰী দলে বকী দুজনক উদ্ধৰ কৰিবৰ বাবে অভিযান অব্যাহত ৰাখিছে।
বতৰৰ প্ৰতিকোলতাৰ বাবে নেপালৰ পৰ্বতাৰোহী আৰু ট্ৰেকাৰসকলৰ বাবে ডাঙৰ সমস্যাৰ সৃষ্টি হৈছে। ট্ৰেকিং এজেন্সিজ এছ’চিয়েশ্যন অৱ নেপালৰ মুৰব্বী সাগৰ পাণ্ডেই কয় যে যোৱা মঙলবাৰৰ পৰা প্ৰচণ্ড বৰফ পৰাৰ পিছৰে পৰা ১০০০ৰো অধিক লোকক আবদ্ধ হৈ পৰিছিল।
প্ৰসংগ ক্ৰমে নেপালত পৰ্বতাৰোহীৰ বাবে হিমস্খলন এক বৃহৎ প্ৰত্যাহ্বন। তথ্য অনুসৰি ১৯৫০ চনৰ পৰা ২০২১ চনলৈ তাত প্ৰায় ১,০৪২ গৰাকী পৰ্বতাৰোহীৰ মৃত্যু হয়। ইয়ৰে প্ৰায় ৪০৫ গৰাকী বিগত ২০ বছৰত মৃত্যু হৈছে।
ভাইবছ আৰু হিমালয়ান ডাটাবেছৰ ২০২২ চনৰ এক প্ৰতিবেদনত কোৱা হৈছে যে হিমস্খলনৰ ফলত এক তৃতীয়াংশৰ মৃত্যুৰ হৈছে। বিগত ৫০ বছৰত ৪৫০০ মিটাৰ (১৪,৭৬৪ ফুট) ওপৰৰ শৃংগত হিমস্খলনত কমেও ৫৬৪ জন পৰ্বতাৰোহীৰ মৃত্যু হৈছে।
৬,০০০ মিটাৰ (১৯,৬৮৫ ফুট) ওপৰৰ ডাঙৰ শৃংগত হিমস্খলনে সকলো মৃত্যুৰ প্ৰায় এক তৃতীয়াংশৰ সৃষ্টি কৰে। মধ্য নেপালৰ ৰ’লৱালিং, লেংটাং, জুগালৰ দৰে অঞ্চলত এনে ঘটনাৰ আশংকা অধিক।
পৰ্যটন বিষয়াসকলে পৰ্বতাৰোহীসকলক বতৰৰ পূৰ্বাভাস পৰীক্ষা কৰিবলৈ আৰু সকলো সময়তে অভিজ্ঞ বিশেষজ্ঞ গাইড ব্যৱহাৰ কৰিবলৈ আহ্বান জনাইছে। বতৰৰ পৰিৱৰ্তন, দুৰ্বল বৰফৰ স্তৰ আৰু শিবিৰসমূহত ভিৰ হোৱাৰ ফলত পৰিস্থিতি অধিক বিপজ্জনক হৈ উঠিছে।
