নাগৰিকত্ব সংশোধনী বিধেয়কৰ বিৰোধিতা কৰি বিজেপিৰ সংগ ত্যাগ কৰা অসম গণ পৰিষদে এইবাৰ বিধেয়কখনৰ বিৰোধিতাকেই মূল এজেণ্ডা হিচাপে লৈ লোকসভা নিৰ্বাচনত অৱতীৰ্ণ হ’ব বিচাৰিছে। কিন্তু দলটোৱে পুনৰ বিজেপিৰে মিত্ৰতা কৰিব নেকি বুলি প্ৰশ্ন উত্থাপিত হৈ থকাৰ সময়তে এইবাৰ বিধেয়কৰ বিৰোধিতাৰে বিজেপি ত্যাগ কৰা এজন নেতাক অগপই লোকসভাত প্ৰক্ষেপ কৰাৰ সম্ভাৱনা দেখা গৈছে।
‘জাতিধ্বংসী’ বিধেয়কখনৰ বিৰোধিতা কৰি অসমৰ খিলঞ্জীয়া ৰাইজ আৰু জাতীয়-জনগোষ্ঠীয় দল সংগঠনৰ পক্ষত অৱস্থান লৈ বিজেপিৰ পৰা ওলাই অহা এজন নেতা অগপৰ এইবাৰ তেজপুৰ সমষ্টিৰ প্ৰাৰ্থী হ’ব পাৰে।
অগপৰ প্ৰাৰ্থিত্বৰ দৌৰত থকা এই নেতাজন অনুপম বৰুৱা। অগপৰ এক বিশেষ সূত্ৰৰ পৰা নৰ্থ-ইষ্ট নাওৱে এই খবৰ লাভ কৰিছে।
উল্লেখ্য যে যোৱা ৮ জানুৱাৰিত নাগৰিকত্ব সংশোধনী বিধেয়ক লোকসভাত গৃহীত হোৱাৰ পাছতেই বৰুৱাই বিজেপিৰ পৰা পদত্যাগ কৰিছিল। তেওঁ বিজেপিৰ শোণিতপুৰ পশ্চিম জিলা সমিতিৰ প্ৰাক্তন উপ-সভাপতি আছিল।
অৱশ্যে, অনুপম বৰুৱাই এতিয়ালৈ অগপত যোগদান কৰা নাই। কিন্তু তেওঁ অচিৰেই দলটোত যোগ দিব বুলি সভাপতি অতুল বৰাৰ উপৰিও কেইবাগৰাকীও কেন্দ্ৰীয় নেতৃত্বক জনাইছে বুলিও সূত্ৰটোত প্ৰকাশ পাইছে।
ইপিনে, নৰ্থ-ইষ্ট নাওৰ অনুপম বৰুৱাৰ সৈতে হোৱা যোগাযোগত তেওঁ তেজপুৰৰ পৰা প্ৰাৰ্থিত্ব আগবঢ়াবলৈ ওলোৱা কথাষাৰ নুই কৰা নাই।
‘’অগপৰ পৰা তেজপুৰ সমষ্টিত প্ৰতিদ্বন্দ্বিতা কৰিব বিচাৰিছো। দলে যদি টিকট দিয়ে মই সাজু আছো’’, অনুপম বৰুৱাই কয়।
তেওঁ অসম আন্দোলনত যোগ দি জেললৈ গৈছিল বুলি জানিবলৈ দি সদায় জাতীয়তাবাদৰ পক্ষত আছে আৰু সেয়ে বিজেপি ত্যাগ কৰা বুলিও মন্তব্য কৰে।
‘’অসমত আঞ্চলিকতাবাদৰ বাদে গত্যান্তৰ নাই। মই অসম আন্দোলনৰ পৰাই অগপৰ পক্ষতেই আছিলো। কিন্তু ২০১২ চনত পৰিবৰ্তন বিচাৰি বিজেপিলৈ গৈছিলো। কিন্তু যি পৰিবৰ্তন হ’ল সেই পৰিবৰ্তনে জাতিটোলৈ সংশয় মাতি আনিলে। সেয়ে বিজেপিৰ পৰা আঁতৰি আহিলো’’, অনুপম বৰুৱাই নৰ্থ ইষ্ট নাওৰ আগত প্ৰকাশ কৰে।
ইপিনে, তেজপুৰ সমষ্টিৰ পৰা অগপৰ জ্যেষ্ঠ নেতা বৃন্দাবন গোস্বামীয়ে প্ৰতিদ্বন্দ্বিতা কৰিব বুলিও চৰ্চা চলিছিল। আনকি গোস্বামীয়ে নৰ্থ-ইষ্ট নাওৰ আগতো এই সম্ভাৱনীয়তা স্বীকাৰ কৰিছিল। তেওঁৰ উপৰিও দলটোৱে প্ৰেম শৰ্মাকো প্ৰাৰ্থিত্ব আগবঢ়োৱাৰ চিন্তা-চৰ্চা কৰাৰ কথাও জানিব পৰা গৈছে।
অৱশ্যে, অনুপম বৰুৱাই অগপই প্ৰাৰ্থিত্ব নিদিলেও তেওঁৰ আপত্তি নাথাকিব বুলিও আমাক জানিবলৈ দিছে। কিন্তু আঞ্চলিক দলটোৱে এই পৰ্য্যন্ত কোনো সমষ্টিৰে প্ৰাৰ্থী নিশ্চিত কৰা নাই, লগতে মিত্ৰতা সন্দৰ্ভতো কোনো সিদ্ধান্তত উপনীত হ’ব পৰা নাই। গতিকে অগপৰ নিৰ্বাচন কেন্দ্ৰিক চৰ্চা আৰু জল্পনা-কল্পনা সমুহৰ কোন বিলাকে স্থায়িত্ব পাব সেয়া এতিয়াও ধুঁৱলী-কুঁৱলী হৈয়ে আছে।
