আলফা (স্বাঃ)ৰ সেনাধ্যক্ষ পৰেশ বৰুৱাৰ মৃত্যু হোৱা বুলি আজি পুৱাই ওলোৱা খবৰক লৈ তীব্ৰ চাঞ্চল্যৰ লগতে এক ৰহস্যঘন পৰিৱেশৰ সৃষ্টি হৈছে। এতিয়ালৈকে চোৰাংচোৱাৰ সূত্ৰই একো স্থিতি প্ৰকাশ কৰা নাই।
আনহাতে পৰেশ বৰুৱাৰ মৃত্যু সন্দৰ্ভত কোনো তথ্য নাই বুলি জনালে অসম আৰক্ষীয়ে। অসম আৰক্ষীৰ সঞ্চালক প্ৰধান কুলধৰ শইকীয়াই সাংবাদিকক জনালে এই কথা।
ইফালে অসম আৰক্ষীৰ বিশেষ সঞ্চালকপ্ৰধান পল্লৱ ভট্টাচাৰ্যই কয় যে আলফা (স্বাঃ)ৰ সেনাধ্যক্ষ পৰেশ বৰুৱা দুৰ্ঘটনাত পতিত হোৱাৰ খবৰহে তেওঁলোকৰ হাতত আছে। পৰিয়াল বা চোৰাংচোৱা সংস্থাৰ ওচৰতো পৰেশ বৰুৱাৰ মৃত্যুৰ কোনো নিশ্চিত তথ্য নাই।
বিশ্বাসযোগ্য নহয় বুলি ক’লে অনুপ চেতিয়াই
আনহাতে আজি আলফাৰ সাধাৰণ সম্পাদক অনুপ চেতিয়াই সাংবাদিকৰ আগত সেনাধ্যক্ষ পৰেশ বৰুৱাৰ মৃত্যুৰ বাতৰিক ভিত্তিহীন বুলি কয় আৰু ইয়াক এক অপপ্ৰচাৰ আখ্যা দিয়ে।
“তিনিমাহ পূৰ্বে মটৰ চাইকেল দুৰ্ঘটনাত পতিত হোৱাৰ খবৰ পাওঁ। দুডাল কামিহাড় আৰু সোঁ-ভৰিৰ বুঢ়া আঙুলি ভাগিছিল বৰুৱাৰ। কিন্তু তাৰ এমাহ মানৰ পিছত মোলৈ ফোন কৰি আৰোগ্যৰ পথত বুলি কৈছিল।” অনুপ চেতিয়াই সাংবাদিকৰ আগত আজি পুৱা কয়।
তেওঁ লগতে কয়, “যোৱা ধলা কাণ্ডৰ পিছতো তেওঁ মোলৈ ফোন কৰিছিল। কিন্তু মই বাথৰূমত থকা বাবে ফোনটো ৰিচিভ কৰিব নোৱাৰিলো। গতিকে এইবোৰ কথালৈ চাই ক’ব পাৰি, যিটো বাতৰি প্ৰচাৰ হৈছে, সেইটোৰ বিশ্বাসযোগ্যতা নাই। ই এক ধৰণৰ অপপ্ৰচাৰ।”
উল্লেখযোগ্য যে যোৱা ১৩ অক্টোবৰত পাণ বজাৰত হোৱা বোমা বিস্ফোৰণৰ পিছতো আলফ (স্বাঃ)ৰ সেনাধ্যক্ষজনে সংবাদ মাধ্যমলৈ ফোন কৰিছিল।
ৰহস্যজনক নীৰৱতা আলফা (স্বাঃ)ৰ
তাৎপৰ্য্যপূৰ্ণভাৱে আনদিনা যিকোনো গুৰুত্বপূৰ্ণ বিতৰ্ক উপস্থিত হ’লেই সেনাধ্যক্ষ বৰুৱা বা সংগঠনটোৰ কোনোবাই সংবাদ মাধ্যমলৈ ফোন কৰি তাৰ স্পষ্টীকৰণ দিয়ে। কি্নতু সংগঠনটোৰ পৰা আজি এতিয়ালৈকে কোনো স্পষ্টীকৰণ সংবাদ মাধ্যমৰ হাতত পৰাহি নাই।
