ভাৰতীয় ৰে’লৱেই উত্তৰ পূব সীমান্ত ৰে’লৱেৰ অন্তৰ্গত ১১টা ৰে’ল ষ্টেশ্যনক বিমান বন্দৰৰ লেখিয়াকৈ আলোক-সজ্জিত কৰাৰ পৰিকল্পনা কৰিছে।
উত্তৰ পূব সীমান্ত ৰে’লৱেৰ মুখ্য জন সম্পৰ্কৰক্ষী বিষয়া প্ৰণৱজ্যোতি শৰ্মাই কৈছে, ‘‘ৰে’লৱে মন্ত্ৰী পীয়ুষ গোৱেলৰ নিৰ্দেশনা অনুসৰি ৰে’লৱে প্ৰশাসনে উত্তৰ পূব সীমান্ত ৰে’লৱেৰ অন্তৰ্গত কেইটামান নিৰ্বাচিত ৰে’লষ্টেশ্যনৰ আলোকন স্তৰ উন্নত কৰি সেইসমূহক বিমান বন্দৰৰ মানলৈ উন্নীত কৰাৰ পদক্ষেপ গ্ৰহণ কৰিছে।
উত্তৰ পূবসীমান্ত ৰে’লৱেৰ অন্তৰ্গত আলোক-সজ্জিত হ’বলগীয়া ১১টা ৰে’লৱে ষ্টেশ্যন হৈছে গুৱাহাটী, কাটিহাৰ, পুৰ্নিয়া, কিশানগঞ্জ, বাৰছৈ, কামাখ্যা, লামডিং, ডিমাপুৰ, নিউ তিনিচুকীয়া, ডিব্ৰুগড আৰু আগৰতলা।
‘‘এই অভিলাসী পৰিকল্পনাৰ অন্তৰ্গত এই ৰে’ল ষ্টেশ্যনসমূহৰ বিভিন্ন স্থানৰ উজ্জলতা বৃদ্ধি কৰা হ’ব। ঘাইকৈ পাৰিপাৰ্শিক আৰু যাত্ৰী সুবিধাৰ নিমিত্তেই এই আলোকনৰ কাম কৰা হ’ব।’’ শৰ্মাই কয়।
তেওঁ আৰু কৈছে, ‘‘এই পৰিকল্পনাৰ অন্তৰ্গত ৰে’লৱে ষ্টেশ্যনৰ সন্মুখৰ মুক্ত এলেকাৰ উজ্জলতাৰ স্তৰ ১৬০ লাক্স, চাৰিওপাশৰ উজ্জলতাৰ স্তৰ ১১০ লাক্স, অপেক্ষা কক্ষৰ উজ্জলতাৰ স্তৰ ১৫০ লাক্স, মুক্ত প্লেটফৰ্ম এলেকাৰ উজ্জলতাৰ স্তৰ ১০০ লাক্স, আচ্ছাদিত প্লেটফৰ্ম এলেকাৰ উজ্জলতাৰ স্তৰ ২০০ লাক্স, অনুসন্ধান আৰু আসন সংৰক্ষণ কাৰ্যালয় কাউণ্টাৰৰ উজ্জলতাৰ স্তৰ ১৫০ লাক্স, ফুট অভাৰব্ৰীজ/ছাবৱে এলেকা আৰু এস্কেলেটৰ, লিফ্ট আৰু চিৰিৰ কাষৰ স্থানৰ উজ্জলতাৰ স্তৰ ১৫০ লাক্স, আৰু বাহিৰৰ পাৰ্কিং এলেকাৰ উজ্জলতাৰ স্তৰ ৫০ লাক্স ৰখাৰ ব্যৱস্থা কৰা হ’ব।
উল্লেখ্য যে সকলো ৰে’ল ষ্টেশ্যনতেই ১০০শতাংশ এলইডি লাইট স্থাপন কৰি উত্তৰ পূব সীমান্ত ৰে’লৱেই ইতিমধ্যেই উন্নততৰ উজ্জলতা লাভ কৰিবলৈ সক্ষম হৈছে।
উল্লেখ্য যে উক্ত ষ্টেশ্যনসমূহ আৰু ইয়াৰ আশ-পাশৰ এলেকাসমূহ আলোকসজজইত কৰাৰ ফলত বিদ্যুৎশক্তি খৰছ ৰাহি হ’ব। উন্নত লাইটিঙে যাত্ৰীৰ নিৰাপত্তা ব্যৱস্থা উন্নত কৰাৰ লগতে ইয়ে ষ্টেশ্যনটো ছাফ-চিকুন কৰাত সহায় কৰি ইয়াৰ সৌন্দৰ্যও বৃদ্ধি কৰিব বুলি পূব সীমান্ত ৰে’লৱেৰ মুখ্য জন সম্পৰ্কৰক্ষী বিষয়াগৰাকীয়ে জানিবলৈ দিয়ে।
পৰিকল্পনা অনুসৰি, ২০১৯ৰ ১৫ ফেব্ৰুৱাৰিৰ ভিতৰতেই এই কাম সম্পন্ন কৰিব এনএফ ৰে’লৱেই।
