ঘাইপথত যাতায়তত আৰু বাঢ়িল খৰচ। ভাৰতীয় ৰাষ্ট্ৰীয় ঘাইপথ কৰ্তৃপক্ষই FASTag বাৰ্ষিক পাছৰ মাচুল বৃদ্ধি কৰিছে। এই নতুন হাৰ ২০২৬-২৭ বিত্তীয় বৰ্ষৰ পৰা কাৰ্যকৰী হ’ব। ১ এপ্ৰিলৰ পৰা এই পাছৰ বাবে ব্যক্তিগত বাহনৰ মালিকে দিব লাগিব ৩০৭৫ টকা। পূৰ্বে এই পাছৰ মূল্যা আছিল ৩ হাজাৰ টকা।
১২ মাৰ্চত জাৰি কৰা চৰকাৰী আদেশত এই সিদ্ধান্ত ঘোষণা কৰা হৈছে। অবাণিজ্যিক বাহনৰ ক্ষেত্ৰত এই নতুন মাচুল প্ৰযোজ্য হ’ব। অৰ্থাৎ ব্যক্তিগত গাড়ী, জীপ, ভ্যানৰ মালিকেহে এই পাছৰ সুবিধা ল’ব পাৰিব।
২০২৫ চনৰ স্বাধীনতা দিৱসৰ দিনা আৰম্ভ কৰা FASTag বাৰ্ষিক পাছ আঁচনিৰ মূল লক্ষ্য আছিল ৰাষ্ট্ৰীয় ঘাইপথত নিয়মিতভাৱে যাত্ৰা কৰা চালকসকলক সুবিধা প্ৰদান কৰা। একে সময়তে ডিজিটেল টোল সংগ্ৰহ ব্যৱস্থা আৰু অধিক সম্প্ৰসাৰণ কৰা।
এই পাছ সক্ৰিয় হ’লে এখন বাহন ৰাষ্ট্ৰীয় ঘাইপথৰ টোল প্লাজা সৰ্বাধিক ২০০ বাৰ পাৰ হ’ব পাৰে। বা পাছ মুকলিৰ তাৰিখৰ পৰা এবছৰৰ বাবে বৈধ হ’ব। দুয়োটাৰ ভিতৰত যিটোৱে প্ৰথমে ম্যাদ উকলিব সেই অনুসৰি পাছৰ ম্যাদ উকলি যাব। বিশেষ কথাটো হ’ল বিভিন্ন টোল প্লাজাত বেলেগ বেলেগ মাচুল থাকিলেও এই পাছ ব্যৱহাৰ কৰিলে সুকীয়াকৈ টোল দিয়াৰ প্ৰয়োজন নাই।
কেন্দ্ৰীয় পথ পৰিবহণ আৰু ঘাইপথ মন্ত্ৰালয়ৰ তথ্য অনুসৰি এই আঁচনিয়ে ইতিমধ্যে বিপুল সঁহাৰি লাভ কৰিছে। বৰ্তমান দেশৰ ৫০ লাখৰো অধিক ব্যৱহাৰকাৰীয়ে এই বাৰ্ষিক পাছ ব্যৱহাৰ কৰি আছে। ৰাষ্ট্ৰীয় ঘাইপথত ব্যক্তিগত বাহনৰ প্ৰায় ২৮ শতাংশ টোল লেনদেন এতিয়া এই পাছৰ জৰিয়তে কৰা হয়।
২০১৬ চনত আৰম্ভ হোৱাৰ পিছৰে পৰা দেশৰ টোল পৰিশোধৰ মূল পদ্ধতি হিচাপে পৰিগণিত হৈছে FASTag। চৰকাৰী তথ্য অনুসৰি দেশত এতিয়ালৈকে মুঠ প্ৰায় ১১.৮৬ কোটি FASTag জাৰি কৰা হৈছে। ইয়াৰে প্ৰায় ৫.৯ কোটি FASTag সক্ৰিয় হৈ আছে। বৰ্তমান ৰাষ্ট্ৰীয় ঘাইপথৰ টোল প্লাজাত সংগ্ৰহ কৰা মুঠ টোল ৰাজহৰ ৯৮ শতাংশতকৈ অধিক FASTag ৰ জৰিয়তে সংগ্ৰহ কৰা হয়।
বাৰ্ষিক পাছৰ বাবে ৰাজমাৰ্গ যাত্ৰা এপ আৰু এনএইচএআই আৰু মন্ত্ৰালয়ৰ অফিচিয়েল ৱেবছাইটৰ জৰিয়তে আবেদন বা নবীকৰণ কৰিব পাৰিব। FASTag-লিংকড একাউণ্টত লগ ইন কৰি, বাহনৰ পঞ্জীয়ন নম্বৰ আৰু মোবাইল নম্বৰ প্ৰদান কৰি, ইউপিআই, ডেবিট বা ক্ৰেডিট কাৰ্ড বা নেট বেংকিঙৰ জৰিয়তে ধন জমা কৰি পাছ সক্ৰিয় কৰিব পাৰি। সাধাৰণতে ২৪ ঘণ্টাৰ ভিতৰত এই পাছ সক্ৰিয় হয়।
