মহাৰাষ্ট্ৰৰ নাচিক শিৱাজী নগৰত এক ভয়ংকৰ দুৰ্ঘটনা সংঘটিত হৈছে। একেটা পৰিয়ালৰ ৯ জন সদস্যৰ মৃত্যু ঘটিছে। ডিন্দোৰি তালুক অঞ্চলত এখন যাত্ৰী ভৰ্তি গাড়ীয়ে নিয়ন্ত্ৰণ হেৰুৱাই পথৰ কাষৰ দ কুঁৱাত বাগৰি পৰে। নিহত আটাইকেইজন মহাৰাষ্ট্ৰৰ ইন্দোৰ গাঁৱৰ বাসিন্দা।
শুকুৰবাৰে নিশা প্ৰায় ১০ বজাত সংঘটিত হয় এই দুৰ্ঘটনা। তথ্য লাভ কৰাৰ পিছতে আৰক্ষী আৰু উদ্ধাৰকাৰী দলে ক্ষীপ্ৰতাৰে সেই স্থানত উপস্থিত হয়। গভীৰ নিশালৈকে উদ্ধাৰৰ কাম চলি থাকে।
আৰক্ষীয়ে জনোৱা মতে, নিহত কেইজন হ’ল সুনীল দত্তু দৰগোডে (৩২), ৰেশমা সুনীল দৰগোড় (২৭), আশা অনিল দৰগোড় (৩২), খুশী (১৪), শ্ৰেয়াছ (১১), শ্ৰাবাণী (১১), সমৃদ্ধি (৭), ৰাখী আৰু মাধুৰী (১৩)।
আৰক্ষী আৰু স্থানীয় সূত্ৰৰ পৰা জানিব পৰা মতে, শুকুৰবাৰে সন্ধিয়া এটা কোচিং চেণ্টাৰে এক কাৰ্যসূচীৰ আয়োজন কৰিছিল। চাৰিচকীয়া বাহনেৰে অনুষ্ঠানৰ পৰা ঘৰলৈ উভতি আহিছিল লোককেইজন। শিৱাজী নগৰলৈ উভতি অহাৰ পথত হঠাতে চালকে গাড়ীখনৰ নিয়ন্ত্ৰণ হেৰুৱাত পথৰ কাষৰ কুঁৱাত পৰি যায়।
দুৰ্ঘটনাৰ খবৰ পোৱাৰ পিছতে সেই স্থানত উপস্থিত হয় ডিন্দোৰি আৰক্ষী থানা আৰু এন ডি আৰ এফ বাহিনী। স্থানীয় বাসিন্দাসকলেও উদ্ধাৰৰ কামত সহায় কৰে। সকলোকে উদ্ধাৰ কৰি স্থানীয় ডিন্দোৰী চৰকাৰী চিকিৎসালয়লৈ লৈ যোৱা হয়। তাতে চিকিৎসকে সকলোকে মৃত ঘোষণা কৰে। পিছত হাইড্ৰা ক্ৰেন এখন আনি কুঁৱাৰ পানীৰ পৰা গাড়ীখন উলিয়াই আনে।
প্ৰাৰম্ভিক তদন্তত আৰক্ষীয়ে অনুমান কৰিছিল যে গাড়ীৰ তীব্ৰ গতিৰ বাবে চালকজনে নিয়ন্ত্ৰণ হেৰুৱাব পাৰে। কুঁৱাটোৰ চাৰিওফালে কোনো পৰ্যাপ্ত সুৰক্ষা ব্যৱস্থা নাছিল। ফলত গাড়ীখন কুঁৱাত বাগৰি পৰে।
ডিন্দোৰী আৰক্ষীয়ে জনোৱা মতে, শুকুৰবাৰে নিশা ১০ বজাৰ পিছত দুৰ্ঘটনাৰ খবৰ পোৱাৰ লগে লগে এটা বৃহৎ আৰক্ষী বাহিনী ঘটনাস্থলীত উপস্থিত হৈ উদ্ধাৰৰ কাম আৰম্ভ কৰে। আৰক্ষীয়ে দুৰ্ঘটনাৰ কাৰণৰ তদন্ত অব্যাহত ৰাখিছে।
