তুৰস্কৰ বিৰুদ্ধে অষ্ট্ৰেলিয়াৰ স্মৰণীয় জয়ৰ নিশাই বিশ্বকাপৰ মঞ্চত এক নতুন ইতিহাস ৰচিত হ’ল। ২০২৬ চনৰ ফুটবল বিশ্বকাপত বদলি খেলুৱৈ হিচাপে পথাৰত নামি বিশ্বকাপত অভিষেক ঘটালে নিচান ভেলুপিল্লাইয়ে। ইয়াৰ ফলত প্ৰায় ২০ বছৰৰ পাছত বিশ্বকাপৰ মঞ্চত এগৰাকী ভাৰতীয় বংশোদ্ভূত ফুটবল খেলুৱৈক দেখা পোৱা গ’ল। ইয়াৰ পূৰ্বে ২০০৬ চনৰ বিশ্বকাপত ফ্ৰান্সৰ হৈ খেলিছিল বিকাশ ধোৰাচুৱে।
কানাডাৰ ভেনকুভাৰত তুৰস্কৰ বিৰুদ্ধে অনুষ্ঠিত মেচখনৰ ৬০ মিনিটত গ’লদাতা নেষ্টৰি ইৰানকুন্দাৰ স্থানত পথাৰত নামে নিচান। সেই মুহূৰ্ততেই বিশ্বকাপৰ ইতিহাসত নিজৰ নাম খোদিত কৰে ২৫ বছৰীয়া এইগৰাকী ফুটবলাৰে। নিচানৰ পিতৃ শ্ৰীলংকাৰ তামিল মূলৰ আৰু মাতৃ এগৰাকী এংলো-ইণ্ডিয়ান। অষ্ট্ৰেলিয়াৰ ঘৰুৱা ফুটবলত তেওঁ বহুদিন ধৰিয়েই এক চিনাকি নাম।
২০২১ চনত মেলবৰ্ণ ভিক্টৰীৰ মূল দলত স্থান পোৱাৰ পাছত তেওঁ আৰু পিছলৈ ঘূৰি চাব লগা হোৱা নাই। বৰ্তমানলৈকে ক্লাবটোৰ হৈ ১৩৮ খন মেচ খেলি নিচানে ২৫ টা গ’ল কৰাৰ লগতে ১৪ টা এচিষ্ট কৰিছে। ২০২১-২২ বৰ্ষত তেওঁ দলৰ অন্যতম গুৰুত্বপূৰ্ণ খেলুৱৈ আছিল আৰু সেই বছৰেই তেওঁ ইয়ং প্লেয়াৰ অৱ দ্য ইয়েৰ বঁটা লাভ কৰিছিল। আনহাতে, ২০২৪-২৫ বৰ্ষত ১২ টা গ’ল আৰু ৯ টা এচিষ্টেৰে তেওঁ ভিক্টৰী গ’ল্ডেন বুট ২০২৫ বঁটাও আঁজুৰি আনিবলৈ সক্ষম হয়।
২০২৪ চনত অষ্ট্ৰেলিয়াৰ ৰাষ্ট্ৰীয় দললৈ নিচানে আমন্ত্ৰণ লাভ কৰে। বিশ্বকাপৰ বাছনি পৰ্বত চীনৰ বিৰুদ্ধে খেলা অভিষেক মেচখনতেই বদলি হিচাপে নামি তেওঁ গ’ল কৰিবলৈ সক্ষম হৈছিল। এতিয়ালৈকে অষ্ট্ৰেলিয়াৰ হৈ ৮ খন মেচ খেলি তেওঁ ৩ টা গ’ল আৰু ১ টা এচিষ্ট কৰিছে আৰু এই আটাইকেইটা গ’ল আহিছে বিশ্বকাপৰ বাছনি পৰ্বত। এই ধাৰাবাহিক প্ৰদৰ্শনৰ বাবেই প্ৰশিক্ষক টনী পোপোভিচে তেওঁক বিশ্বকাপৰ ২৬ জনীয়া চূড়ান্ত দলত স্থান দিয়ে।
মেচখনত আৰম্ভণিৰে পৰাই অষ্ট্ৰেলিয়াই আত্মবিশ্বাসী ফুটবল খেলিছিল। প্ৰথমাৰ্ধৰ ২৭ মিনিটত এক প্ৰত্যাক্ৰমণৰ পৰা নেষ্টৰি ইৰানকুন্দাই এটা সুন্দৰ গ’ল দি দলটোক আগুৱাই নিয়ে। তুৰস্কই গ’ল পৰিশোধ কৰিবলৈ চেষ্টা কৰিছিল যদিও অষ্ট্ৰেলিয়াৰ ৰক্ষণভাগ আৰু যুৱ গ’লৰক্ষক পেট্ৰিক বিচৰ সুন্দৰ প্ৰদৰ্শনৰ বাবে সেয়া সম্ভৱ নহ’ল। মেচৰ ৭৫ মিনিটত কনৰ মেটকাফে বক্সৰ বাহিৰৰ পৰা এক জোৰদাৰ শ্বটেৰে দ্বিতীয়টো গ’ল দি অষ্ট্ৰেলিয়াৰ ২-০ ব্যৱধানৰ জয় নিশ্চিত কৰে।
মেচখনত নিচানে পথাৰত নমাৰ পাছত আক্ৰমণতকৈ ৰক্ষণভাগৰ দায়িত্বহে বেছিকৈ পালন কৰে। তথাপিও বিশ্বকাপৰ মঞ্চত তেওঁৰ এই অভিষেক ভাৰতীয় মূলৰ ফুটবলপ্ৰেমীসকলৰ বাবে এক অতি বিশেষ মুহূৰ্ত হৈ ৰ’ব। প্ৰায় দুটা দশকৰ অন্তত বিশ্বকাপত পুনৰ এগৰাকী ভাৰতীয় শিপাৰ খেলুৱৈৰ উপস্থিতি দেখা গ’ল আৰু নিচান ভেলুপিল্লাই এই গৌৰৱোজ্জ্বল ইতিহাসৰ এক অবিচ্ছেদ্য অংশ হৈ পৰিল।
