ডিমা হাছাও জিলাৰ জনপ্ৰিয় পৰ্যটনস্থলী বৌলচল জলপ্ৰপাতত নিৰুদ্দেশ হোৱা শিলচৰ এনআইটিৰ তিনিগৰাকী শিক্ষাৰ্থীৰ মৃতদেহ উদ্ধাৰ কৰা হৈছে। শনিবাৰে দিনৰ ভাগত সংঘটিত এই দুৰ্ভাগ্যজনক দুৰ্ঘটনাত সহপাঠীক হেৰুৱাই শোকত ভাগি পৰিছে ছাত্ৰ-ছাত্ৰীসকল।
হাৰেংগাজাও আৰক্ষী থানাৰ ভাৰপ্ৰাপ্ত বিষয়া লক্ষীধৰ শইকীয়াই জনোৱা মতে, মৃত শিক্ষাৰ্থীকেইগৰাকী ক্ৰমে উত্তৰ প্ৰদেশৰ সৰ্বকৃতিকা সিং, বিহাৰৰ ৰাধিকা আৰু উত্তৰ প্ৰদেশৰ সৌহাৰ্দ ৰয়
তিনিওগৰাকীয়েই শিলচৰ এনআইটিৰ কম্পিউটাৰ চায়েন্স এণ্ড ইঞ্জিনিয়াৰিংৰ প্ৰথম বৰ্ষৰ শিক্ষাৰ্থী আছিল।
শনিবাৰে শিলচৰ এনআইটিৰ সাতজনীয়া শিক্ষাৰ্থীৰ এটা দল প্ৰাকৃতিক সৌন্দৰ্য উপভোগ কৰিবলৈ হাৰেংগাজাওলৈ আহিছিল। দিনৰ প্ৰায় দুই বজাত দলটোৱে বৌলচল জলপ্ৰপাতত উপস্থিত হোৱাৰ পিছতেই এই দুঃখজনক ঘটনা সংঘটিত হয়।
ঘটনাৰ খবৰ পোৱাৰ লগে লগে হাৰেংগাজাও আৰক্ষী, এছডিআৰএফ, এনডিআৰএফ আৰু সেনা বাহিনীৰ দলে উদ্ধাৰ অভিযান আৰম্ভ কৰে। শনিবাৰে সন্ধিয়ালৈ প্ৰথমে উদ্ধাৰ কৰা হয় সৰ্বকৃতিকা সিংৰ মৃতদেহ। ৰাতি উদ্ধাৰ অভিযান স্থগিত ৰাখি দেওবাৰে পুৱাই পুনৰ অভিযান আৰম্ভ কৰা হয় আৰু আন দুগৰাকী শিক্ষাৰ্থী — ৰাধিকা আৰু সৌহাৰ্দ ৰয়ৰ মৃতদেহো উদ্ধাৰ কৰে।
এই দুঃখজনক ঘটনাই এনআইটি শিলচৰৰ পৰিৱেশৰ লগতে অঞ্চলটোক স্তব্ধ কৰি তুলিছে। এই কৰুণ ঘটনাৰ পিছতে স্থানীয় প্রশাসনে পৰ্যটকসকলক বৌলচল জলপ্ৰপাতত সতৰ্কতা অৱলম্বন কৰিবলৈ আহ্বান জনাইছে।
