বিত্তমন্ত্ৰী নিৰ্মলা সীতাৰমণে ঘোষণা কৰা জি এছ টিৰ গঠনক লৈ ‘অসন্তুষ্ট’ খোদ কেন্দ্ৰীয় পথ আৰু পৰিবহণ মন্ত্ৰী নীতিন গাডকাৰী। তেওঁ কেন্দ্ৰীয় বিত্তমন্ত্ৰীলৈ পত্ৰ লিখি জীৱন বীমা আৰু স্বাস্থ্য বীমাৰ পৰা জি এছ টি প্ৰত্যাহাৰ কৰিবলৈ দাবী জনায়।
২০১৭ চনত নৰেন্দ্ৰ মোডী চৰকাৰে সমগ্ৰ দেশতে জি এছ টি প্ৰৱৰ্তন কৰিছিল। যিদৰে জি এছ টি প্ৰৱৰ্তন কৰা হৈছে, তাৰ বিৰুদ্ধে বিৰোধীও সৰৱ হৈছে। এতিয়াও কংগ্ৰেছে মাজে মাজে জি এছ টি সৰলীকৰণৰ দাবীত সৰৱ হয়।
লগতে পঢ়কঃ প্ৰাক্তন ভাৰতীয় ক্ৰিকেট তাৰকা অংশুমান গাইকোৱাডৰ দেহাৱসান
ইপিনে, গাডকাৰীয়ে জি এছ টিৰ বিষয়ে এক প্ৰকাৰৰ পত্ৰবোমা প্ৰেৰণ কৰিলে। বৰ্তমানৰ কৰ গাঁথনিৰ অধীনত জীৱন বীমা আৰু স্বাস্থ্য বীমাৰ প্ৰিমিয়ামৰ ওপৰত ১৮ শতাংশ জি এছ টি দিবলগীয়া হয়। পথ পৰিবহণ মন্ত্ৰীয়ে ইয়াক প্ৰত্যাহাৰ কৰিবলৈ আহ্বান জনায়।
শেহতীয়াকৈ মহাৰাষ্ট্ৰৰ নাগপুৰৰ এল আই চি কৰ্মী সংগঠনে এই সন্দৰ্ভত গাডকাৰীক অভিযোগ কৰিছিল। তেওঁলোকে দাবী কৰিছিল যে বীমা খণ্ডই ইমান বেছি জি এছ টি দিবলগীয়া হৈছে। ফলত এই ক্ষেত্ৰখন সংকুচিত হৈ আহিছে। এই ক্ষেত্ৰত গাডকাৰীৰ হস্তক্ষেপৰ দাবী কৰিছিল বীমা কৰ্মীসকলে।
উল্লেখ্য যে নীতিন গাডকাৰী নাগপুৰৰ সাংসদ। বীমা কৰ্মীসকলৰ দাবী সন্দৰ্ভত তেওঁ বিত্তমন্ত্ৰীলৈ এখন পত্ৰ লিখিছে।
লগতে পঢ়কঃ অলিম্পিক পদক জয়ৰ দিশে ধাৱমান লাভলীনা বৰগোহাঁই; নৰৱেৰ প্ৰতিদ্বন্দ্বীক হৰুৱাই কোৱাৰ্টাৰ ফাইনেলত প্ৰৱেশ
পত্ৰখনত গাডকাৰীয়ে কয় যে জীৱন আৰু স্বাস্থ্য বীমাৰ ১৮ শতাংশ জি এছ টিয়ে বীমা খণ্ডক সংকুচিত কৰি তুলিছে। একে সময়তে জ্যেষ্ঠ নাগৰিকসকলো সমস্যাৰ সন্মুখীন হৈছে। তদুপৰি এই দুয়োটা ক্ষেত্ৰই স্পৰ্শকাতৰ। এই ক্ষেত্ৰত কৰ গাঁথনি সংশোধন কৰিব পৰা যায় নেকি চাব লাগে। আগষ্ট মাহৰ তৃতীয় সপ্তাহত পুনৰ জি এছ টি কাউন্সিলৰ বৈঠক। সেই বৈঠকতে গাডকাৰীৰ প্ৰস্তাৱৰ আলোচনা হব পাৰে।
