বিজেপিৰ ৰাষ্ট্ৰীয় সভাপতি নিতিন নবীনে সোমবাৰে দলৰ নতুন ৰাষ্ট্ৰীয় টীম ঘোষণা কৰে। এই নতুন টীমত দলৰ সাংগঠনিক ব্যৱস্থাত কেইবাটাও গুৰুত্বপূৰ্ণ সালসলনি কৰা হৈছে। আগন্তুক নিৰ্বাচনসমূহক লক্ষ্য কৰি দলটোৱে সংগঠন অধিক শক্তিশালী কৰাৰ চেষ্টা কৰা বুলি এই পৰিৱৰ্তনৰ পৰা স্পষ্ট হৈছে।
নতুন টীমৰ আটাইতকৈ চৰ্চিত পৰিৱৰ্তনটো হৈছে অমিত মালব্যক বিজেপিৰ IT চেলৰ দায়িত্বৰ পৰা আঁতৰোৱা। ২০১৫ চনৰ পৰা দলৰ IT চেলৰ নেতৃত্ব দি অহা মালব্যৰ ঠাইত ছত্তীশগড়ৰ নেতা দীপক মাস্কেক নতুন দায়িত্ব দিয়া হৈছে। নিৰ্বাচনী তথ্য বিশ্লেষণ, IT আৰু সংগঠনৰ কামৰ দীঘলীয়া অভিজ্ঞতাআাছে দীপক মাস্কৰ।
নতুন ৰাষ্ট্ৰীয় টীমত অভিজ্ঞ আৰু নতুন মুখ সংযোজন হৈছে। প্ৰাক্তন কেন্দ্ৰীয় মন্ত্ৰী স্মৃতি ইৰাণীক ৰাষ্ট্ৰীয় সাধাৰণ সম্পাদকৰ দায়িত্ব দিয়া হৈছে। আনহাতে, প্ৰাক্তন ৰাষ্ট্ৰীয় সাধাৰণ সম্পাদক ৰাম মাধৱক ৰাষ্ট্ৰীয় উপ-সভাপতি কৰা হৈছে। ৰাজস্থানৰ প্ৰাক্তন মুখ্যমন্ত্ৰী বসুন্ধৰা ৰাজেকো নতুন টীমত গুৰুত্বপূৰ্ণ দায়িত্ব দিয়া হৈছে।
ইয়াৰ উপৰি পীয়ুষ গোৱেলক দলৰ ৰাষ্ট্ৰীয় কোষাধ্যক্ষ হিচাপে নিযুক্তি দিয়া হৈছে। নতুন টীমত মুঠ ১৩ জন ৰাষ্ট্ৰীয় উপ-সভাপতি, ৮ জন ৰাষ্ট্ৰীয় সাধাৰণ সম্পাদক আৰু ১৬ জন ৰাষ্ট্ৰীয় সম্পাদকক দায়িত্ব দিয়া হৈছে। দলটোৱে যুৱ আৰু মহিলা নেতৃত্বকো নতুন টীমত অধিক গুৰুত্ব দিয়া দেখা গৈছে।
বিজেপিৰ এই সাংগঠনিক সালসলনি আগন্তুক নিৰ্বাচনৰ প্ৰস্তুতিৰ সৈতেও জড়িত বুলি ৰাজনৈতিক মহলত চৰ্চা হৈছে। নতুন নেতৃত্বৰ জৰিয়তে দলৰ সংগঠন, ডিজিটেল প্ৰচাৰ আৰু সাংগঠনিক কাম-কাজ অধিক শক্তিশালী কৰাৰ লক্ষ্য লোৱা হৈছে। নিতিন নবীনৰ নেতৃত্বত এই নতুন টীমে বিজেপিৰ আগন্তুক ৰাজনৈতিক কৌশলত কিমান প্ৰভাৱ পেলায়, সেয়া এতিয়া লক্ষ্যণীয় হ’ব।
