আজিৰ দিনটোত ৰাজ্যত ট্ৰেণ্ডিঙত আছে বাঘ, গৰু মাংস আৰু হিন্দুত্ব। ছ’চিয়েল মিডিয়াত ইতিমধ্যে বিষয়টোক লৈ তুমুল আলোচনা চলা পৰিলক্ষিত হৈছে।
তেনে সময়তে ছ’চিয়েল মিডিয়াত ভাইৰেল হৈছে নিতুপৰ্ণ ৰাজবংশীৰ এখন বিশেষ কাৰ্টুন।
য’ত বাঘটোৰ মুখত সংলাপ আকাৰে দিয়া হৈছে ‘হেৰা ভৌকেন্দ্ৰ! ধৰ্মটো দিলাই যেতিয়া এতিয়া মই উচ্ছ নে নিম্ন বৰ্ণৰ?, জাত-পাত কি তাকো ফাইনেল কৰি দিয়া!’
এই কাৰ্টুন তেওঁ নিজৰ ফেইচবুক পেজৰ পৰা আপলোড দিয়াৰ পাছতে বহুজনে প্ৰতিক্ৰিয়া প্ৰকাশ কৰাৰ লগতে কাৰ্টুনখন শ্বেয়াৰো কৰা দেখিবলৈ পোৱা গৈছে।
কাৰ্টুনখনৰ বিষয়ে বিশদভাৱে কথা পাতিবলৈ আমি টেলিফোনৰ জৰিয়তে সংযোগ স্থাপন কৰিছিলো কাৰ্টুনিষ্টগৰাকীৰ সৈতে।
এই সন্দৰ্ভত তেওঁ কয় ‘অসমৰ ৰাজনৈতিক প্ৰেক্ষাপটত সাম্প্ৰদায়িকতাৰ জৰিয়তে বিষবাস্প বিয়পাই থকা হৈছে। ধৰ্মৰ আলম লৈ ধৰ্মকে বিভ্ৰান্তি আৰু বদনাম কৰা হৈছে। ৰাজনৈতিক পাক চক্ৰত পৰি ধৰ্মক নিজৰ স্বাৰ্থ সিদ্ধিত ব্যৱহাৰ কৰি থকাৰ দৰে হৈছে।‘
‘এনে পৰ্য্যায় পাইছেহি যে যিকোনো বস্তুকে এতিয়া ধৰ্মৰ বিচাৰ কৰিব লাগিব। মানুহৰ মাজত পৰম্পৰাগতভাৱে ধৰ্মীয় ব্যৱস্থা এটা চলি আহিছে কিন্তু অমাত জীৱ-জন্তুৰ ক্ষেত্ৰত ধৰ্মৰ কথা কাহানিও শুনা নাই। কাৰ্টুনখনত থকা বাঘটোৰ ওপৰত যিহেতু ধৰ্মটো জাপি দিয়া হ’ল যিহেতু এতিয়া বাঘটোৰ জাত-পাত বা বৰ্ণ কি হ’ব?’ কাৰ্টুনখনৰ ভাৱাৰ্থ বাখ্যা কৰি এইদৰে কয় ৰাজবংশীয়ে।
ইপিনে, কাৰ্টুনখনত থকা মুণ্ডহীন কেৱল জিভা ওলাই থকা চৰিত্ৰটোৰ জৰিয়তে মগজু থাকিও ব্যৱহাৰ নকৰা বা জানি-শুনিও ধৰ্মৰ নামত অযথা বিতৰ্কৰ সৃষ্টি কৰা এচামক বুজোৱা হৈছে বুলি তেওঁ জানিবলৈ দিয়ে।
