পশ্চিম এছিয়াৰ যুদ্ধ আৰু ড’নাল্ড ট্ৰাম্পৰ নীতিৰ বিৰুদ্ধে সমগ্ৰ আমেৰিকা আৰু ইউৰোপত প্ৰতিবাদৰ সৃষ্টি হৈছে। আয়োজকসকলে দাবী কৰিছে যে ‘নো কিংছ’ নামৰ এই আন্দোলনত লাখ লাখ লোক ৰাজপথলৈ ওলাই আহিছে।
আমেৰিকাৰ মিনেছ’টাকে ধৰি কেইবাখনো প্ৰদেশ এই প্ৰতিবাদৰ কেন্দ্ৰবিন্দু হিচাপে আত্মপ্ৰকাশ কৰিছে। ছেইণ্ট পল কেপিটেল বিল্ডিঙৰ সন্মুখত হাজাৰ হাজাৰ লোকৰ সমাগম ঘটে। বহুতে আমেৰিকাৰ পতাকাখন ওলোটাকৈ ধৰি ৰাখিছিল, যিটো বিপদৰ প্ৰতীক বুলি গণ্য কৰা হয়।
নিউয়ৰ্কৰ পৰা আইডাহ’লৈকে এই প্ৰতিবাদ প্ৰায় সকলোতে বিয়পি পৰিছে। আয়োজকসকলে দাবী কৰিছে যে মুঠ ৫০খন প্ৰদেশত ৩১০০ৰো অধিক কাৰ্যসূচী গ্ৰহণ কৰা হৈছে। অংশগ্ৰহণকাৰীৰ সংখ্যা ৯০ লাখ অতিক্ৰম কৰাৰ সম্ভাৱনা আছে। প্ৰতিবাদত অংশগ্ৰহণ কৰা এজন প্ৰতিবাদকাৰীয়ে কয়, ‘এই প্ৰশাসনৰ বহু সিদ্ধান্তই আমাক ক্ষুব্ধ কৰি তুলিছে। কিন্তু মানুহে ৰাজপথলৈ ওলাই আহি প্ৰতিবাদ কৰিছে, যিয়ে আমাক আশাৰ সঞ্চাৰ কৰিছে।’
ৱাশ্বিংটনত লিংকন মেম’ৰিয়েলৰ পৰা নেশ্যনেল মললৈ শ শ লোকে সমদল উলিয়ায়। তেওঁলোকৰ হাতত আছিল ‘মুকুট খুলি লোৱা ক্লাউন’ আৰু ‘পৰিৱৰ্তন নিজৰ দেশতে আৰম্ভ হওক’ বুলি লিখা প্লেকাৰ্ড। আৰক্ষীয়ে জনোৱা মতে, ছান ডিয়েগোতো প্ৰায় ৪০ হাজাৰ লোকেও অংশগ্ৰহণ কৰে।
এই আন্দোলনে কেৱল আমেৰিকাতে নহয়, ইউৰোপৰ বিভিন্ন দেশতো প্ৰভাৱ পেলাইছে। ৰোমত হাজাৰ হাজাৰ লোকে সমদল উলিয়ায়। লণ্ডনত যুদ্ধ বিৰোধী শ্লোগান উত্থাপন হৈছে। আমেৰিকাৰ প্ৰবাসী আৰু মানৱ অধিকাৰ সংগঠনৰ আহ্বানত পেৰিছত শ শ লোক সমবেত হয়। পেৰিছৰ এজন আয়োজকে কয়, ‘আমি ট্ৰাম্পৰ যুদ্ধ নীতি আৰু অস্থিৰ সিদ্ধান্তৰ বিৰুদ্ধে প্ৰতিবাদ কৰিছো। আমি শান্তি বিচাৰো।’
অৱশ্যে হোয়াইট হাউছে এই আন্দোলনক তীব্ৰ সমালোচনা কৰিছে। তেওঁলোকে দাবী কৰে যে ইয়াক বাওঁপন্থী সংগঠনৰ দ্বাৰা সৃষ্টি কৰা হৈছে। ইয়াত সাধাৰণ জনতাৰ প্ৰকৃত সমৰ্থন নাই। মুঠৰ ওপৰত বিশ্লেষকসকলৰ মতে পশ্চিম এছিয়াৰ সংঘাতৰ পৰিপ্ৰেক্ষিতত এই প্ৰতিবাদে ট্ৰাম্প প্ৰশাসনৰ বিৰুদ্ধে নতুন ৰাজনৈতিক চাপৰ সৃষ্টি কৰিছে।
